Read Northern Rengma Naga MIKA 4 Bible Online

MIKA 4 - Northern Rengma Naga bible

MIKA 4

¹Atsathang ghaketenthu witsü Kekinyijjen na keben yikhawa tsüna tsüdi miwi kemisi ntsawa saaden, yyishiphon tsüdi miwi kijüki aden. Mizzatenti kejon na ciwi tsü dugho,

²nu mathu nyithu na khiben, “Ithu Apvüwa yyishiphon wi Israel Nyiza Kekinyijjenwa witsü shu na. Kepaghenanye ma ithu na mangwa sa thsü mvuben khe pi ithu sansi cüben; ithu na ma kessiya kesa lenthu tsü ton den. Kepaghenanye Apvüwa kesansi jühwa tsüna Jerusalem wina ghoden; ma Zion wina ma nyithu ccüneng den.”

³ Ma mizzatentithu jawi, kekhang kedi akete nu kelensie wi kebenthu jawi kekivvü südhe cüden. Mathu na mathu njünnu pi amkhu cü, mathu pie pi annuzathu cü yaben. Mizzatentithu na khiela aghi wi wa nbendha, khiela aghi ghena kiden neng nbendha.

⁴ Tsüdila ma kemeshentsse llithu nu khhaghabvü tonthu jawi thola ma npateqhela cca nu hang waben. Kemisintsa Apvüwa na ha khishi chidha.

⁵Mizzatenti kesüsü tsüdi ma cenpvü kinyi nu jühkinaden, isala ithu tsü anuphanla Apvüwa ithu Nyiza jühkina nu ma kinyiden.

⁶Apvüwa na khiben, “Hi anyithu meten cü nu mathu pi kushiyyi wi ketizen sa kebenthu tsü saghuya keten matsüwa na gho tendha.

⁷Mathu na accü nmehai nu kelensie wi ben, isala hi teshi kethengthu tsü ssinu ketheü kesü ketegükeya sa, nu mathu na mizzatenti kedi kesü sayaden. Hi tsü nten na anuphanla Zion Yikha miwi na mathu miwi kekhang senden.”

⁸Nu Jerusalem, Anyiza na no wi ben nu anenikehie kesü ti ma nyithu hie keghowa na kheneng kuti nji sa kegho kadiyyiwa tsüpi ghazen nyunutiwa sayaben.

⁹No mangkesa na misi ntsa magha ben nu? No mangkesa na nza kesü na kepvügha wi kinaa ti ketizensa ben nu? Tsüna no kadimiwa nmi, nu nlen ketsütsonthu na shü kesa ghena kwe?

¹⁰Jerusalem nyithu, nza kesü na anga pvügha keben ti kuweng nu ghadhilo kepaghenanye nthu na khili anyunutiwa tsü teshi nu agheja wi hang wa tendha. Nthu na Babilon wi waden, isala ciwi Apvüwa na nthu ghinyithu kwen wina nthu hangsha yaben.

¹¹Mizzatenti kejon na nthu ssisale saghuyadha. Mathu na khiben, “Jerusalem tsü yasa nsathu yishü le! Ithu na anyunuti hawa ha keyasa muben!”

¹²Isala mizzatenti hathu na Apvüwa leben wi mangwa ben khe nchü. Asu pi nyeggü le saghu ketheng ti mathu saghutheng nu meten cü le keben tsü mathu na chüshi meya.

¹³Apvüwa na khiben, “Jerusalem nyithu, wala nthu ghinyithu meten cü lo! Hi nthu sapi amesü süpon kesü na amighe pi ma ghacü sa nu lezza pi ma mezzen sapvü keten kezü ti sa cüden. Nthu na mizzatenti kejon cücha, nu mathu na yasayala wina mukeya keben-keyeng tsü nthu na pi ayyi maben Pvüwa, hi kinyi ben.”