Read Northern Rengma Naga MIKA 5 Bible Online

MIKA 5 - Northern Rengma Naga bible

MIKA 5

¹Jerusalem nyithu, nthu süpahithu saghu yalo! Nyu na ithu vüyadha! Mathu na Israel ccülikesawa ssisa bendha.

²Apvüwa na khiben, “Bethlehem Efratha, no Judah yyi wi anyuti kizza ntsa kesü, isala hi no wina ma theghishi na kheni tsü wina kegho Israel ghena kekhang kesen kesü shhugho thsüden.”

³Tsalina Apvüwa na atsa pvüghaya ketenwa tsü npi mukeya chu ma nyithu teshi pi mathu ghinyithu kwen wi chiaben . Tsaseng wi ma pvüshang kushiyyi wi kebenthu na mathu ketanla mathu nyithu ssinu ajühkeyali yaben.

⁴Khathansha wi ma gho khe, ma Apvüwa wina kegho kezü nu Apvüwa Anyiza jenkebenwa tsü sennu ma nyithu miwi kekhang senben. Ma nyithu na yazishu hangden, kepaghenanye ayyi tsüdi wi anyithu na ma kedi kekhang chüya,

⁵nu ma kecca sengho cüaben. Khathansha wi Assiriya nyithu na ithu diyyiwa nka nu ithu khweti pakhhi dugho khe, ithu na ithu ccülikesa kezü ntsathu kesun pi mathu ssisa thsüben.

⁶ Mathu na aghitsanqai kekhang wina Assiriya, Nimrod yyiwa tsü nkaya, nu Assiriya nyithu na ithu yyi nka kegho wi mathu na ithu hangsha yaben.

⁷Israel nyi hangkeyathu na mizzatenti kejon ghena Apvüwa wina kesun kechi akejan ti, nu aghangthu miwi atsankeghozü ti saaben. Mathu na anyi nyela Anyiza nondi ben.

⁸Mizzatentithu jawi teshi kesathu na ssensitemi kesü na ayinong nyelela amou wi ma tsse jügü keten ti saaben: ma khaghanenithu jawi dula mathu miwi benki nu mathu zandhi-zanghe, nu ciwi kekashakeya nmilaben.

⁹Israel na ma ghinyithu miwi khangya nu mathu tsüdi yasa cüben.

¹⁰Apvüwa na khiben, “Tsü tsüwi hi nthu goruthu ssibvü nu nthu gorugarithu tsüdi yasa cüben.

¹¹Hi nthu yyi wi anyunutithu yasa nu nthu khwetithu tsüdi pasha cüben.

¹²Hi nthu na sen keten avüh tsüdi yasa nu nthu wi atucüki kekhithu nmila thsüaben.

¹³Hi nthu tsikezhüthu nu alonkisheng kemethathu tsüdi yasaben; nthu na nthu ketanla sa keyathu tsü mangla kinyi nbendha.

¹⁴Hi nthu yyi wi acenpvü nzawa Asherah tsikezhü tsüdi zansha nu nthu nyunutithu yasa cüben.

¹⁵Nu hi ilebentsu ntsa kesa wina ijüh meyala kesa mizzatentithu tsüdi miwi ajukhi yaben.”