Read Northern Rengma Naga MIKA 6 Bible Online

MIKA 6 - Northern Rengma Naga bible

MIKA 6

¹Apvüwa na Israel ssinu ajühkekaghaten kina chilo. O Apvüwa, shagha nu no kaghatenjüh pi chilo; ayikhathu nu yyishiphon thu ya no mangwa khiben khe zaya thsülo.

²Nthu ayikhathu, nthu anuphanla ayyi giketegü sa ketenthu, Apvüwa kaghatenjüh ha kinalo! Apvüwa na kaghatenjüh kesü pi ma nyithu kematang na ben. Ma kemetsi-kemeni kesü sengho Israel shunden.

³Apvüwa na khiben, “Inyithu, hi nthu miwi mangwa sa chidha nu? Hi luneng chilo.

⁴ Hi Ejipt wina nthu ssi shhugho; hi nssümagha sa keben wi nthu kekashaya; hi Mosa, Aaron, nu Miriam kesunchi pi nthu lentsütson thsü.

⁵ Inyithu, Moab Kadimiwa Balak na nthu miwi mangwa sale kiden nu Beor tsawa Balaam na khati ma lunengchi khe tsü meshen yalo. Akakia wina Gilgal wi wa keten kemnanpen wi mangwa sa khe tsüthu meshenya. Hathu ha meshenchithu hi nthu hangshayale kesa ghena mangwa sachi khe nthu na chüyaben.”

⁶Hi Apvüwa tangwi kebenwa Anyiza kinyi le kegho wi mangwa sengho ma cü nu? Hi amesü zza kemehai ntsa sengho mecang pi kekinyi sapi ma cüla?

⁷Keujüla hi khaghaneni hazar hazar, nyelela oliv deli aghakutssü ti llekhen nketen sengho ma cüthu Apvüwa na ma nenben kwe? Hi hi kesami kutimen dhiale kesa ghena itsa tssütsewa pi ma kinyia la?

⁸Nyele, Apvüwa na mangwa mehai khe pi ithu kizadha. Ma ithu wi yamvu kebenwa na ha: mangwa meshon khe tsü kesa, ghaliki kesa pi keccüca, nu satemeni nu ithu Nyiza ssinu kahang.

⁹Apvüwa messi kesa tsüna kemetsa. Ma hati anyunutiwa ciben, “Nthu anyunutiwa wi saghu kebenthu kinalo!

¹⁰Anyi nkemehaithu jjen wi mathu na atsentsa nkenye wina mukeya keben-keyeng na ben. Mathu na hi nanmeghü keten kewhu nkemece tsü senden.

¹¹Khatinu hi anyi kewhuchan nkemetsa nu kewhu nkemece sen ketenthu kesami teshi pi cüya nu?

¹²Nthu kebanthu na ketha-uthu pasha, nu nthu tsüdila milikemesathu.

¹³Tsalina hi nthu kesami ghena nthu kededi nu keyasa kiden shhudha.

¹⁴Nthu na dsaben lela anonkwenya nben, ciwi lela nthu na ghamathi sa benben. Nthu na atsanqaithu pvü nu bvüben, isala nthu na tsüthu pi thenya nben; nthu na katsüha pi theng lela hi aghi wi tsüthu tsü yasa cüben.

¹⁵Nthu na amacü pi chi lela asu wwiya nben. Nthu na oliv deli misügü ben, isala khiela tsü senya nben. Nthu na kisengtssü saaben, isala khiela tsü jjüya nben.

¹⁶ Hawa ha saaben, kepaghenanye nthu na Kadimiwa Omri nu ma tsawa Kadimi Ahab manyi kekuli nkemehai kesa tsü nie wa kesalina. Nthu na manyi chothu tsü sagho ben, tsalina hi nthu ssigho dedi thsüa, nu anyi tsüdila nthu nankeqhe thsüaden . Anyi kahe wi tsüdila nthu nkhichila saaben.”