Read Northern Rengma Naga NAHUM 1 Bible Online

NAHUM 1 - Northern Rengma Naga bible

NAHUM 1

¹ Hawa ha Elkosh wina keghowa Nahum na Nineve ghena kemanthi wina kemu cüki kezhü ketsijüh kesü.

²Apvüwa Anyiza na thola ma matang thsü nten; ma ma shun ketenthu meten cüden. Ma lebenketsu wina mathu kuti dhineng den.

³Apvüwa na wan ma lebentsu shagha nten, isala ma khang ntsa nu khiela kesazzithu tsü meten ncüla ben thsü nten. Apvüwa na khiewa lentsen khe ciwi caghamo na shhugho den; akulukeshü tsüna ma lenketsen wi ayyinikhu na keshhugho le!

⁴Ma ajühkhuchi pi atssükedone cü, nu tsüna keqha den! Ma aghaku sapi qha wa thsüden. Bashan wi allithu na wengweng, Karmel Yikha na jü wa, nu Lebanon wi athighIthu na qanca.

⁵Apvüwa ketenpen wi ayikhathu na kuliden; yyishiphon thu na ma tuwi tssü waden. Apvüwa na shhughothu ameghükuju den; ayyiwa nu ma nyithu tsüdila kenün den.

⁶Ma ma lebentsuthu thowa na hangya mehai nu? Thowa na ma lebenketsu wi hangya mehai nu? Ma annikeqhe ti lebentsu shaden; alonshithu na ma tuwi pachazighe pi anikhu saaden.

⁷Apvüwa na mehai; ma agükeccü wi ma nyithu khwe yaden; ma ma wi kheneng keghothu noncca yaden.

⁸Ma atssüketi kekhang ti ma ghinyithu yasatha saaden; ma ma matang ketenthu kesun pi shü wa thsüden.

⁹No mangwa cho sapi Apvüwa shunben nu? Ma no yasa cüben. Thola kuti miwi ma shunya nben.

¹⁰No pi aghazüthu kemisüli keben nu amatsi ti mecang cüben!

¹¹Nineve, no wina anyi kesü gheshighena cho pi pong pvü keten nu acho sapi Apvüwa shun keten na shagha.

¹²Hawa ha Apvüwa na pi ma nyi Israel wi khiben: “Assiriya nyithu na zü nu kejon saben lela mathu yasa nu nmila ben. Inyithu, hi nthu pi ketizen sa thsüa, isala hi tsüti saneng nbendha.

¹³Hi khili Assiriya kekhang na nthu miwi keben tsüpi asakhen sa nu nthu bhen ketheng mighe ssülithu tsü pathiaben .”

¹⁴Hawa ha Apvüwa na Assiriya nyithu ghena ajüh khuchidha: “Mathu na mathu nyan ketsi waya kemehai ashicübvüghathu nmila ben. Hi mathu cenpvüthu kekinyijjen wi atsikezhüthu tsü yasaden. Hi Assiriya nyithu ghena ashüjjen kesü kiden ben, mathu na nhang qo ladha!”

¹⁵ Ghangchilo! nyilo kesü na ajühkemehaiwa sennu ayikha miwi na ghoten le! Ma khangkeya pi thangchi le ghoden! Judah nyithu, nthu khothu tsü salo, nu nthu na Anyiza wi kekishen kedhu khishi ketheng tsüpi ma cülo. gheshighenawa na khiela nthu yyi nkagho neng nbendha. Mathu yasatha sadha le!