Read Northern Rengma Naga NAHUM 3 Bible Online

NAHUM 3 - Northern Rengma Naga bible

NAHUM 3

¹Milimesa keten, nyu kepathi nyunutiwa, shuya nu yasa thsüale keben-keyeng pi pong pvü kebenwa dedi tendha.

²Kinalo! Kekihheji pi kekihhe, ccüqe kekhuli, goruthu kephenki, nu gorugarithu kekisiki hhaithu!

³Gorukessithu na kitsan jügü, njünnu phüphü, nu apiethu cwencwe sa! Akamangthu pi misikhhali nbonki, keshü kamangthu si meya khi, anyithu na tsüthu miwi meshüden!

⁴Nineve keqhezawa na metenya bendha. Nyu na nen nu keshü vü na pong ben, ma mizzatentithu nniya nu pi nssümaghathu sa thsüden.

⁵Apvüwa Kekhang ntsawa na khiben, “Nineve, hi no meten cüden! Hi nthsümeni bhu pi nu no kemissü sa, nu mizzatentithu ya no mu thsü, no kejüghekeya tsüdi muyaben.

⁶Hi no nkhichila sa nu kenenkagha pi no pong cüden. Anyithu na qhethiketen nu no ghangben.

⁷No kemuthu tsüdila qhethiketen saaben. Mathu na khiben, ‘Nineve na keyasa wi bendha! Thowa na ma nantizen ben nu? Thowa na ma leben satecca cü mvu ben nu?’ ”

⁸Nineve, no Egipt ghazen nyunutiwa Thebe miwi mehai ben kwe? Ma la akhweti ti ma khweya kemehai ma kekhwewa aghaku kesü Nil na ben.

⁹Ma Sudan nu Egipt miwi kekhang sen, ma kekhang na ma sakhen nmi; Libia na ma pfüwa.

¹⁰Isala Thebe nyithu ssinu kushiyyi wi wa. Alen katenkevü tsüdi wila mathu tsangathu kiccüthi shan. Amighe ssüle pi mathu nyi ccülikesathu husen wa mathu ghan keyathu jawi gishüya.

¹¹Nineve, no la adina waben! No la nghinyithu tubvü le kiden ben!

¹²Nkhweti tsüdila khhaghabvü tonthu wi ma bi na nyün keben ti saaben: ma ton zankeju chilo isathu ma bi na npang wi qanca dughoaben!

¹³Nsüpahithu na nzathu ti, nu diyyiwa na nghinyithu tuwi kekhwe nmila ngan ben. Anni na nkhweti khonghonthu yasa tendha.

¹⁴Vüya le kesa ghena atssü de pi kidenya, nu nkhweti satezüya! Yimecanglonthu saale kesa ghena aniesha ponya, nu mecanglon saale kidenya!

¹⁵No na katsüha saben lela no mecangthi nyelela aghi wi pathiaben. No yasa pi ashiqathu na alli kedsa ti saaben. No na ashiqathu ti jipfüdha!

¹⁶No na asententi sapi atssan wi ghotsithu miwi jidha! Isala khili tsü tsüthu na ashiqathu na agisha zanshigü nu pighe bvü kesa ti nmiladha.

¹⁷No kedithu na kese ghanan kesü wi ashiqathu na ajjen-keshon wi ka keben ti saaben. Isala khathansha wi aghani na shhugho khe mathu na pighe bvü nu thola mathu na khiewa bvüdha khe nchü!

¹⁸Assiriya Kadimiwa, no ahngthu na shüdha, nu no kedithu na anuphanla jen wadha! N-nyithu na ayikhathu miwi bvüzighedha, nu ciwi thola mathu ssinu ajjen wi keghoneng nmidha.

¹⁹Ciwi no yisüthu na makeya nmi, nu mesa-menathu na mehaikeya nmi. No keyasa jühtheüwa tsü zakeyathu tsüdila anonkeghe ghena akwen cenben. Anyi kesüla no kedaggü sakhen nkemi wi tsüna bvüya kwe?