Read Northern Rengma Naga HABAKKUK 1 Bible Online

HABAKKUK 1 - Northern Rengma Naga bible

HABAKKUK 1

¹1Hawa ha Apvüwa na ketsijüh pi atusenjüh-kechüwa Habakkuk keccüca.

²O Apvüwa, hi matsü khathu no hi npi kiqa kechi, nu yasayala wi ithu npi hangsha kecü jüwi no ci benten nu?

³No mangkasa na hi sapi ketizen kesathu hati muya thsü ben nu? No khati kesazzi tsüti kesa tsü ghang benya ten nu? Keyasa nu yasayala na hi vüshakhi yadha, nu ciwi kesali nu kekitagha na apen tsüdi wi ben.

⁴Ayenwa na kezü nmi nu mangla nyedha, nu khiela atsentsawa tsü nsa. Nkemehaithu na ketsatanthu miwi mehaiya bendha, tsalina atsentsawa tsü kemilidha.

⁵ Tsaseng wi Apvüwa na ma nyithu wi kiza, “Nthu ketekevü wi mizzatentithu tsü ghang benlo, isathu nthu na mangwa muya khe tsü ghena amansa ben. Nthu na tsü cüki zaya lela nondi nkeben kekuli pahan sa chiden.

⁶ Hi Babilon aghe-nkemehai nu ceen benya nketen nyithu tsü ssigho kekhang sen thsüden. Mathu na ayyi kepathu wi la nkayale ayyi pvüdhi waden.

⁷Mathu na nyu pateqhe nu patemessi, nu mathu kekapvü wina mathu ketanla ayenwa tsüna mathu le saden.

⁸“Mathu goruthu na shenkitemi miwi la mbhi, adenni kaghama miwi la aghe-nmehai. Mathu goru kessithu na ayyi kelensie wina goru miwi bengho; mathu goruthu na ayyi qanan. Mathu na amumuthu na atsse ghan kedugho ti juchi gho.

⁹“Mathu süpahizithu na yasayala nu nka gho, nu mathu na tetsaki kegho wi anyi tsüdila qhethiketen. Mathu tssüzüthu na ji pi ahachan yyi ti.

¹⁰Mathu na kadimithu nkhichi nu kedi ntsathu nankeqhe. Akhweti-kezhü na mathu khenya nben, mathu na ayyi chhüki pi tsü matang nu tsü nkayaden.

¹¹Tsaseng wi mathu na ameghü ti kewheng nu pfüden, anyi hathu kekhang tsüna mathu cenpvü.”

¹²Apvüwa, adechhü wina no Anyiza le. No iNyiza, metha nu anuphan benden. Apvüwa, iNyiza nu hi kekhwewa, no Babilon nyithu kessiya nu ithu meten cü thsüle kesalina mathu sapi züchi.

¹³Isala no khati anyi aghe-nkemehai hathu ha ghang benya nu? N-nyon na metha mtsü nu nkemehai ghangcha nben, nu no anyi kesazzi kuli kebenwa tsü ghang benya nben. Isalethu no mangkesa na mathu na mathu miwi ketsatan nyithu yasa keben wi ccen benben nu?

¹⁴No khatinu anyithu pi angathu nyelela pala ghei tenti kesü mathu miwi kekhang sennu lenketsütson nkemithu ti saya mehai nu?

¹⁵Babilon nyithu na anyithu pi anga ti kenniji pi ghan yaden. Mathu na kaghanthsü wina mathu ghanya nu mathu ghankeya ghena anonghe nu jisha ben!

¹⁶Mathu na kaghanthsüthu lela kinyi nu ahhansha sapi tsüthu cüben, kepaghenanye mathu kaghanthsü na pala kemehai ntsa tsüdi pi mathu cüden.

¹⁷Mathu na anuphanla mathu njünnu tsü sennu nanketizen nmila mizzatentithu yasa benten kwe?