Read Northern Rengma Naga HABAKKUK 2 Bible Online

HABAKKUK 2 - Northern Rengma Naga bible

HABAKKUK 2

¹Hi ighikehie ducükezhü meghe nu Apvüwa na hi mangwa khilo kiza nu ma mangwa pi ileben-nkagha jüh kekhi tsü luneng ten khe hieden.

²Apvüwa na keluneng hapi hi cü: “Hi mangwa pi no ccüca khe tsüpi pala-pha miwi mechanshu zhükiya, isanu tsüna kutitan na siya kemehai sa thsülo.

³ Tsüpi zhüya, kepaghenanye tsü sacen gho keten tsü npi cu. Isala matsüwa na wan gho tendha, nu hi mangwa pi no ccüca khe tsü sacen metsiden. Tsüna ashina kegho ti saben, isala tsü hiebenlo; tsüna sacen metsiden, tsüna minu nben.

⁴ Nu ketsijühwa tsüna ha: ‘Anyi nkemehaithu na hangya nben, isala ketsatanthu na mathu Anyiza wi jühtsentsa kesalina hang yaben.’ ”

⁵Keben-keyeng na kemechu. Anyi apvükemenethu na kapvü nu ceen benya nten, keshü ti mathu na khiela anonkwenya nten. Tsalina mathu na mathu ghena mizzatentithu nkayaya sa benden.

⁶Anyi nyu mathu nkaya keathu na mathu nkakeyathu miwi aghepvü nu n-ghang mvu saden. Mathu na khiden, “Nthu na nthu ji nkenyethu khuya, isala nthu na dedi tendha! Nthu na khathula nthu men kepvüthu meten pi dhi thsü nu keben muya ben ten nu?”

⁷Isala nthu npi na tsü chüben, nthu nyu nkakeyathu na nthu men pvü nu meten pi kekiyi pi dhi thsüden. Ghinyithu na gho nthu sapi kedheggü thsüben. Mathu na nthu ji shuyaben!

⁸Nthu na mizzatenti nyithu ji kejon shuyadha, isala khili tsü hang keyathu na nthu ji shuya den kepaghenanye nthu na nyu kepathi kekuli sa, nu nthu na yasayala sala ayyi nyithu nu mathu nyunutithu shun kesalina.

⁹Nthu dedi tendha! Nthu na yasayala wina khukeya pi ntheghi keben saya, nu nthu jjenku sapi keyasa nu kemessi wi yazishu benya le sale!

¹⁰Isala nthu kiden kebenwa tsüna kejüghekeya sengho ntheghi miwi chidha; nthu na mizzatenti kejon keyasa wina keyasa sengho nthu ketanla nthu miwi chikeya ketan.

¹¹Ajjen wikeshon lonthu lela nthu matangla magha, nu ajjen milithu wi kemagha tsüna kehiki.

¹²Nthu na dedi tendha! Nthu na kesazzi wina anyunuti kesü sachi nu nyu kepathi wina tsü saya.

¹³Nthu nkakeya mizzatentithu na ma men nkemi kekuli wi mathu sathidha, nu mathu kekuli tsüdila anni wi mecangdha. Kemisintsa Apvüwa na ha sachidha.

¹⁴Isala ayyiwa tsü atssü na atssükedone pong keben tsüti Apvüwa nyankethang palakechü pi pong yaben.

¹⁵Nthu na dedi tendha! Nthu na aghekepvü wina nthu jenphonthu kimenni nu kejügheya cü; nthu na mathu sapi adina keben ti kulu-khukhu sa thsüa.

¹⁶Tsüti nthu na kenyuwakü nyela kejüghekeya pi pongya tendha. Nthu ketanla jjü pi kulu-khukhu saaden. Apvüwa na nthu sapi nthu ketanla nthu kemeten hyiwa tsü jjü thsü tendha, nu nthu kenyuwakü tsü sapi kejüghekeya sa thsüaden .

¹⁷Nthu na Lebanon yinong tsü shhüggü; khili nthu shüchia tendha. Nthu na ma ghangsathu pathi; khili aghangsathu na nthu pateqhe den. Nthu na nyu kepathi kekuli sa nu yasayala sala ayyi nyithu nu mathu nyunutithu shun kesalina hawa ha saaben.

¹⁸Atsikezhü kesü tsü nsenthu keyishü mangwa ben nu? Tsüna anyi kesü na sakechi ketan, nu tsüna milikemesa khe mangla pi nthu kizaya nben. Acenpvü kesü nyu ccünengya nketenwa tsüna mang kemehai sapi ma sa kechiwa ya ma nondiya thsüten nu!

¹⁹Nthu na dedi tendha! Nthu na achan be kesü wi, “Shaghalo!” nyelela alon tsen kesü wi, “Shaghalo!” isa khiden. Atsikezhü kesü na pala pahan pi nthu ccücaya mehai kwe? Tsüna rükatssü nu suna pi mejutheng laya mehai, isala ciwi kahangli nmi.

²⁰Apvüwa na ma Kekinyijjen kemetha wi ben; ayyi wi anyi tsüdila ma tuwi ceen ben thsülo.