Read Northern Rengma Naga HABAKKUK 3 Bible Online

HABAKKUK 3 - Northern Rengma Naga bible

HABAKKUK 3

¹Hawa ha atusenjüh-kechüwa Habakkuk na kekhie kesa kesü:

²O Apvüwa, hi no kekuli cüki zaya, nu hi imansa ntsa saben. Khili ithu tsüwi la no kekuli keti saketenthu tsü saneng chilo. No nlebentsu keben wi lela nantizenchi cülo.

³Anyiza na Edom wina kheneng ghoden; kemetha Nyiza na Paran yyishiphon thu wina kheneng ghoden. Ma tsikemehai na atssanthu pong, nu ma keseng na ayyi pongben.

⁴Ma atsancwe kekiza ssinu gho; kethang na ma kwen wina wegü shhugho, ciwi ma kekhang pi kuthitheng.

⁵Ma ketizenkesa kesun pi ma tuwi wa thsü, nu keshü na ma nielo kizaden.

⁶Ma ngan wathu ayyi na kedheggü; ma mukeya wi mizzatenti na kenünden. Anuphan yikhathu na pakhhi zighe; ma kheni tsüwi kewapen anuphanla benketen yyishiphon thu tsüna qandu.

⁷Hi Kushan nyithu na messi, nu Midia nyithu na kenün keben mu.

⁸Apvüwa, aghakuthu na no sapi lebentsu thsü kwe? Atssükedone na no sapi aghepvü thsü kwe? No akulukeshü miwi lentsen; caghamo kulukeshü tsüna ngorugari, no khangkeya senghola n-nyithu kecü wi.

⁹No nlamugho senle kidenya, nlakusüthu pi gale kidenya. Ntsancwe na ayyi ghonkhhi gishü.

¹⁰Ayikhathu na no kemu wi kedheggü; atssan wina atssü keshusha dugho. Ayyi cakhu wi atssü na ghamo, nu mathu misikhhali lle shhugho.

¹¹Nlakusüthu na cwencwe mbhi kewa wi, nu npie kewegü phüphü kewa wi aghani nu asha na ngan wa.

¹²No nlebenketsu wina ayyi pvüdhi wa; nleben keminu wina mizzatentithu cüten.

¹³No n-nyithu hangshaya le kesa ghena shu, no kessikeya kadimiwa hangsha le kesa ghena. No gheshighena ccülikesawa kihhecha, nu ma senkeniethu yasatha sa.

¹⁴Nlakusüthu na ma süpahizi benchüwa ghonthia, tsüna caghamo kesü ti ithu jügüzighele kegho wi, kuthila ketha-uthu pasha keten ti kapvüshüsha gho.

¹⁵No ngoruthu ssinu atssükedone cüten, nu atssüketi na melu shagha.

¹⁶Hi hathu tsüdila za nu hi kenün; hi messi pi ikhemeggü kechen. Igwo na chha wa nu iccümeshüshü sa. Hi ceen nu matsüwa tsü kegho hieden, Anyiza na hi ssikesali ketenthu tsü meten cüaben.

¹⁷Khhaghabvü tonthu na ma bi nmila lela, nu kemeshentsse tonthu wi ma bi nmila, oliv tonthu na nbünla lela, nu allithu wi asu nmula, khaghanenithu tsüdi shü lela, nu amesüsi jjenthu na ghacang,

¹⁸tsüti sa lela hi anonghe nu nong benden, kepaghenanye Apvüwa Anyiza na hi hangshawa.

¹⁹Apvüwa Kekhang ntsawa na kezü pi hi cü. Ma hi sapi amejü kesü ccü ti sa, nu hi ayikhathu miwi yazishu benya thsüden.