Read Northern Rengma Naga HAGGAI 1 Bible Online

HAGGAI 1 - Northern Rengma Naga bible

HAGGAI 1

¹ Dariya na Persia wi kadimiwa sa keya keniwa mapi, asha tughowa, atsathang atuwa wi Apvüwa na atusenjüh-kechüwa Haggai wina khi. Ketsijüh tsüna Judah wi ahng, Shealtiel tsa Zerubbabel, nu Keqhaikedi ntsawa, Jehozadak tsa Joshua manyi ghena.

²Kemisintsa Apvüwa na Haggai wi khi, “Anyi hathu na khili Kekinyijjenwa ha kesaneng ghena matsü kemehai nyele khiben.”

³Tsaseng wi Apvüwa na atusenjüh-kechüwa Haggai wina ketsijüh hapi anyithu cü:

⁴“Inyithu, mangkesa na hi Kekinyijjenwa yasa pi theng nu nthu na ajjen kemehai wi hangben nu?

⁵Nthu miwi mangwa saben khe nmu kwe?

⁶Nthu na kemeshentsse lli keti ca lela mabi keu ketan wwiya. Nthu na kedsakejjü ben isala nthu na dsajjü pi anonkwen meya. Nthu na kisengtssü ben isala nthu na jjü pi anonkwen meya le! Nthu na athsümeni ben isala nthu na mphi pi yeng meya. Nu kekuli nyi na ma kedsa qo melli meya.

⁷Mangkesa na hati saben khe nthu na nchü kwe?

⁸Khili yyishiphon thu wi wa achanthu sengho Kekinyijjenwa tsü sanenglo; isathu hi nenben nu hi kekinyi-u wi hi kinyi yaben.

⁹“Nthu na alli kejon wwikeya ghang, isala tsüna kezeng-u ketan sa. Nu nthu na alli wwi pvü nu ajjen wi ghothu, hi tsü yasa cüa.

¹⁰Tsalina ciwi atsankegho nmila nu mangla shigüya nben.

¹¹Hi kemegi sengho ayyi miwi — yyishiphon thu, allithu, kemeshentsse llithu, oliv jathu — yangdsaketen tsüdi, anyi nu asahangthu, nu nthu kekuli tsüdi miwi chidha.”

¹²Tsaseng wi Zerubbabel nu Joshua nu Babylonia kushiyyi wina kheneng keghothu tsüdila Apvüwa mathu Nyiza na mathu mangwa salo kiza khe tsü sa. Mathu na Apvüwa nyilowa Haggai atusenjüh-kechüwa tsü messi nu ma jühkina.

¹³Isanu Haggai na Apvüwa ketsijüh tsüpi anyithu cü: “Hi nthu ssibenden, tsüna ijüh khishikechi.”

¹⁴Apvüwa na anyi tsüdi kechü-kenong pi Kekinyijjenwa ghena kekuli sa thsü: Judah wi ahng Zerubbabel; Keqhaikediwa Joshua, nu kushiyyi wina kheneng keghothu tsüdi. Mathu na Kemisintsa Apvüwa mathu Nyiza Kekinyijjenwa ghena kekuli tsü sashhu,

¹⁵tsüna Dariya na kadimiwa sa keya keniwa mapi, asha tughowa, nkwe nu mejü ghanan wi.