Read Northern Rengma Naga ZEKHARIYA 1 Bible Online

ZEKHARIYA 1 - Northern Rengma Naga bible

ZEKHARIYA 1

¹ Dariya na Persia wi Kadimi saya nu keniwa mapi asha tazenwa wi Apvüwa na ketsijüh hapi Iddo tsawa Berekhiya tsa atusenjüh-kechüwa Zekhariya cü.

²Kemisintsa Apvüwa na Zekhariya kiza nu anyithu wi khi thsü, “Hi Apvüwa, nthu bamyithu miwi lebentsu ntsa sa,

³isala hi khili nthu wi khiben, ‘Hi wi gho nenglo. isathu hi nthu wi gho nengben.

⁴Nthu bamyithu ti nsala. Kheni atusenjüh-kechüthu na hi ketsijüh pi mathu cü, nkemehai nu kesami wi nhangla yilo mathu kiza. Isala mathu na ihhai nkina nu ijüh n-nie.

⁵Nthu bamyithu nu atusen- jühkechüthu tsüna khili nhang ladha.

⁶Hi imagha atusenjüh-kechüthu wina ayenkhukechithu nu kekitsanthu pi nthu bamyithu cü, isala mathu na tsüthu nkhichila nu tsü ghena ketizen saya. Tsaseng wi mathu na leben khapegheya nu hi Kemisintsa Apvüwa na sale kidenketheng nu mathu na kemuqo wi mathu meten cüdha le kesa chüya.’ ”

⁷Dariya na Kadimi kesa keniwa mapi asha taghakhenwa (Shebat sha) nkwe nu mejü ghanan Apvüwa na aghaja wi kemanthi wina ketsijüh kesü pi hi cü.

⁸ Hi Apvüwa nyilo kesü na goru kenmie kesü miwi wa keten muya. Ma wala ayyiketijü kesü wi mirtle chanton jawi ngan wa, nu ma sengwi goru kepathu kenmie, keshenki, nu kemiki na ben.

⁹Hi ma wi keü, “Kediwa, goru hathu ha ma jjügi mangwa nu?” Ma luneng, “Hi tsüthu jjügi mangwa khe pi no ccücaden.

¹⁰Apvüwa na mathu kesun pi ayyi hhainan wa thsütheng.”

¹¹Mathu na gho khipi tangnyilowa kiza: “Ithu na ayyi maben miwi wa nandha nu ayyi mabenla kekiqa nmila keben mudha.”

¹²Tsaseng wi tangnyilowa na khi, “Kemisintsa Apvüwa, no Jerusalem nu Judah nyunutithu miwi nleben ketsu na khili ha amapi achentagü sadha. No nanketizen pi mathu npi ccüca kechi tuwi tsüna khathu saten nu?”

¹³Apvüwa na leben sa ketecca jüh khipi tangnyilowa lunengchi,

¹⁴nu tangnyilowa na hi wi Kemisintsa Apvüwa na kekhi tsüpi thangchilo kiza: “Hi inyunuti kemethawa Jerusalem cüki kemeshen nu ketizen keti na ben,

¹⁵nu hi mizzatenti ceen nu kecca wi anonkwen kebenthu miwi lebentsu ntsa saben. Kepaghenanye hi inyithu miwi leben ketsu zan neng keben wi mizzatenti tsüthu na inyithu sapi ketizen sa kayi ntsa sa thsüa.

¹⁶Tsalina hi nanketizen pi anyunutiwa ccücale Jerusalem wi gho nengdha. Hi Kekinyijjenwa tsü khu nengya, nu anyunutiwa tsü saneng yaden.”

¹⁷Tangnyilowa na ha la pi thangchilo hi kiza: “Kemisintsa Apvüwa na khiben, ma nyunutithu na mehai neng yaben nu ma kheneng Jerusalem kiqa nu anyunutiwa tsü nkapi ma ji sayaben.”

¹⁸Hi kemanthi kepawa wi amesü ghacü mejü mu.

¹⁹Hi tangnyilo hi ccüneng kebenwa wi keü, “Aghacü hathu ha ma jjügi mangwa nu?” Ma luneng, “Tsüthu tsüna Judah, Israel, nu Jerusalem nyithu pazighe kesa ayyi kekhangthu tsüle.”

²⁰Tsaseng wi Apvüwa na kekuli nyi mejü na kejenjithu senketen pi hi ccüca.

²¹Hi keü, “Anyi hathu ha mangwa sale ghoben nu?” Ma luneng, “Mathu na Judah yyi pachapi nu ma nyithu pazighe kesa mizzatentithu tsü pateqhe nu pashapia le kesa ghena ghodha.”