Read Northern Rengma Naga ZEKHARIYA 2 Bible Online

ZEKHARIYA 2 - Northern Rengma Naga bible

ZEKHARIYA 2

¹Hi kemanthi kepawa wi anyi kesü na ma kwen wi kekitegüji kesü sen keten mu.

²Hi keü, “No khiewa waten nu?” Ma luneng, “Wala Jerusalem kitegü, nu ma kemeza nu kesie khathu saben khe ghang chiden.”

³Tsaseng wi hi kemu na tangnyilo hi ccüneng kebenwa tsüna atuwi shhugho, nu tangnyilo kepa wi kesü na gho ma metu.

⁴Atuwa tsüna kepawa wi khi, “Bvü wa anyi pvünyi kekitegüji sen ketenwa wi Jerusalem wi anyi nu asangthu na ji ntsa sa nu aghapeng sale kesa ghena di mtsü shaben le kizalo.

⁵Apvüwa na ma ketanla anyunutiwa tsü khwele kesalina anni khweti kesü sala tsü vüyaben nu ma nyankethang sala ma ciwi hangben le kesa khishidha.”

⁶Apvüwa na ma nyithu wi khi, “Hi nthu jügüzighe pi apen tsüdi wi chia. Isala khili, nthu kushinyithu, Babylonia wina bvüya nu Jerusalem wi kheneng gholo.

⁸Anyi kesü le kesü lela nthu kihhethu tsüna ituwi ma men keben ntsawa kihhe ben.” Tsalina Kemisintsa Apvüwa na ma nyithu yasa kesa mizzatentithu ghena ketsijüh hapi hi cü nu kesunchi:

⁹“Apvüwa na ma ketanla nthu ssisaden, nu matsü kesü wi nthu magha kesa anyithu tsüna nthu yasaden.” Khathansha wi ha sa khe anyi tsüdila Kemisintsa Apvüwa na hi kesun chile kesa chüyaben.

¹⁰Apvüwa na khi, “Anonkeghe khwi salo, Jerusalem nyithu! Hi nthu jawi hangle gho tendha le!”

¹¹Tsü tsüwi mizzatenti kejon na Apvüwa wi gho nu ma nyithu sayaben. Ma nthu jawi hang, nu ma hi kesun pi nthu wi chile kesa nthu na chüyaben.

¹²Apvüwa na kheneng kuti ma yyi kemetha wi Judah pi ma ji ntsa saya, nu Jerusalem na anyunuti tsüdi jawi ma kenen ntsawa tsü saaben.

¹³Anyi tsüdila Apvüwa tuwi ceen benlo, kepaghenanye ma ma kahang pen kemetha wina gho tendha.