Read Northern Rengma Naga ZEKHARIYA 6 Bible Online

ZEKHARIYA 6 - Northern Rengma Naga bible

ZEKHARIYA 6

¹Hi kemanthi kepa wi kesü mu. Ha tsüwi hi gorugari mejü na lezza yikha keni jüwi na shhugho keten mu.

² Gorugari atuwa tsüna goru kenmie na zan, keniwa tsüna goru kenimegho na zan,

³ kechengwa tsüna goru kemiki na zan, nu mejüwa tsüna goru keyaqa na zan den.

⁴Tsaseng wi hi tangnyilowa keü, “Kediwa, gorugari hathu jjügi ha mangwa nu?”

⁵ Ma luneng, “Hathu ha ameghü mejü; mathu na ayyi maben wi Apvüwa tuwi na ghoben.”

⁶Gorugari zanketen goru kenimeghothu tsüna aghawa Babylonia wi, goru kemikithu na nidu wiwa, nu goru keyaqathu na diyyi cüla wiwa waden.

⁷Goru keyaqathu na keshhugho wi mathu na ayyi hhainan wale kesa mehiechala ben. Tangnyilowa na khi, “Wala ayyiwa tsü hhainan lo!” Isanu mathu na tsüti sa.

⁸Tsaseng wi tangnyilowa na hi wi maghachi, “Goru aghawa Babylonia wi kewathu tsüna Apvüwa leben ketsuwa sapi ceen sa thsüdha.”

⁹Apvüwa na ketsijüh hapi hi cü.

¹⁰Ma khi, “Kushinyithu Heldai, Tobijah, nu Jedaiya na aju khukechithu tsü khuya nu wan sennu Zefaniya tsa Josiya jjen wi walo. Anyi hathu tsüdila Babylonia kushiyyi wina kheneng ghodha.

¹¹Mathu na khukechi rükatssü nu suna tsüpi kadiliwen kesü saya, nu pi Jehozadak tsa Joshua Keqhaikedi ntsawa pvü thsülo.

¹² Kemisintsa Apvüwa na hati khiben le ma kizalo, ‘Anyi kesü pi ma cünawa le khi keten tsüna ma khiewa ben khe mehai kayi waben nu Apvüwa Kekinyijjenwa tsü sapfü ben.

¹³Ma tsü sa nu kadimi kesü na kemu-u kekinyiküwa tsü muya, nu ma ma nyithu miwi kekhang senben. Keqhaikedi kesü na ma kadipen kete wi ngan, nu manyi gweghe nu kecca nu kemehaiwa ghena kuliben.

¹⁴Kadiliwenwa tsüna Apvüwa Kekinyijjen wi Heldai, Tobijah, Jedaiya nu Josiya mathu meshenki keben kesü saaben.’ ”

¹⁵Anyi alenkesie wi kahangthu na gho nu Apvüwa Kekinyijjenwa tsü kesa neng wi kiqali ben. Nu khathansha wi tsü sanengya khe Kemisintsa Apvüwa na hi kesun pi no wi chi le kesa no chüyaben. Keujüla no Apvüwa N-nyiza yenkhukechithu niethaya lethu ha tsüdila saaben.