Read Northern Rengma Naga ZEKHARIYA 7 Bible Online

ZEKHARIYA 7 - Northern Rengma Naga bible

ZEKHARIYA 7

¹Dariya na kadimi sa keya mejü mapi asha tuguwa (Kislev sha) mejü ghanan wi Apvüwa na ketsijüh kesü pi hi cü.

²Bethel nyithu na Sharezer nu Regemmelek nu mathu nyithu kesun pi wala Kemisintsa Apvüwa Kekinyijjen wi Apvüwa kesawegü khie,

³nu keqhaikedithu nu atusenjüh-kechüthu wi kekeü ha keü thsü: “Kekinyijjenwa tsü yasa kesa ghena ithu na amapi kejon wila asha mangawa wi zi nu anongü gho kesa ti sabenla khati nu?”

⁴Apvüwa ketsijüh hawa ha hi wi gho.

⁵Ma khi, “Ayyi wi anyithu nu keqhaikedithu wi mathu na amapi achentagü jüwi asha mangawa nu tagüwa tsüwi kezi nu anonkegü tsüna hi kekinyikü wina nyele kizalo.

⁶Nu mathu na kedsa nu kejjü wi tsüna mathu nonkekwenwa ghena ketan sa.”

⁷Jerusalem na mehai kayi nu anyi na sha ntsa keben nu anyunutiwa kevü anyunutithu wi ketan nyela acülawa yegu nu niduwa yyishiphon ccüthu wi anyi sha ntsa hang keben tsüwi hawa ha Apvüwa na kheni atusenjüh-kechüthu wina kekhi.

⁸Apvüwa na ketsijüh hapi Zekhariya cü:

⁹Hi kheni yenkhukechi hathu pi inyithu cü: “Nthu na atsentsawa tsü nsathu yishü, nu keccaketssü nu nanketizenli pi khokho nkeccücalithu yishü.

¹⁰Denyilethu, maghamaghangthu, nu asang nthu jawi kahangthu, nyelela kahhatunyi kesü le kesü lela npashala. Nu khokho paketena len nkidenla.”

¹¹“Isala inyithu na leben-dhu nu nkina mvula hhaghe. Mathu na mathu kemeshen khenya

¹²nu mathu leben sapi alon kekhang ti sa. Kepaghenanye mathu na hi kheni atusenjüh-kechüthu wina kesansijüh tsü nkina mvula kesalina hi ilebentsu ntsa sa.

¹³Kepaghenanye mathu na hi kekhi tsü nkekina ghena mathu kekhie kesa wi hi mathu nluneng.

¹⁴Caghamo kesü ti hi mathu mo zighe pi asang diyyithu wi hang wa thsüa. Ayyi kemehaiwa ha yisha nu anyi kesüla ciwi nhang thsüla le.”