Read Northern Rengma Naga ZEKHARIYA 8 Bible Online

ZEKHARIYA 8 - Northern Rengma Naga bible

ZEKHARIYA 8

¹Kemisintsa Apvüwa na ketsijüh hapi Zekhariya cü:

²“Hi Jerusalem nyithu ghali ntsa kesalina hi tsü kiqa mvu sagho, kaghaliwa tsüna hi sapi ma ghinyithu miwi lebentsu thsüa.

³Hi inyunuti kemethawa wi ghoneng nu ciwi hangden. Tsüna jühtsentsa kesen nyunutiwa, nu Kemisintsa Apvüwa yyishiphon tsüpi kemetha yyishiphon wa le ciaben.

⁴Kheneng kuti npvüza nu nza keqhaithu na qhai ntsa pi akhhatssü sennu alentsen ketenthu na ghola anyunutiwa lentontithu wi donkiben.

⁵Nu kheneng pvüzanyi nu lanyithu na ghola alenthu pongla kiponli ben.

⁶“Ha khili teshi kesa mizzatentithu tuwi saya nkeben ti kesa, isala tsüna ighena tsü sayaben.

⁷Hi inyithu ssinu bvü kesa yyiwi mathu kekasha yaben,

⁸nu niduwa nu nishuwa na mathu ssi neng ghola Jerusalem wi hangben. Mathu na inyithu sa, nu hi mathu Nyiza sa, ketsatan nu jühtsentsa sennu mathu miwi kekhang senden.

⁹Lebenzüyalo! No kheni hi Kekinyijjen ha saneng le kesa giketegü tsü wi atusenjüh-kechüthu na kekhi jüh tsü makesü za yaben.

¹⁰Tsü npi tuwi anyi kesüla anyithu nyelela aghangsathu milliya kemehai nsa, nu thola ma ghinyithu tuwi yazishu nsa. Hi anyithu pi khokho keshunli thsü.

¹¹Isala hi khilitsü mizzatenti hawi hang kebenthu kenoncca makepa saaben.

¹²Mathu na cca nu allica yaben. Ciwi atsan na kejon gho nu mathu kemeshentsse bi kejon bünya nu alli kejon wwi yaben. Hi kesawegü hathu tsüdi pi mizzatenti wi anyi hang kebenthu cüaben.

¹³Judah nu Israel wi anyithu! Kheni tsüwi asangthu na hati khi nu khokho kishencü den, “Judah nu Israel miwi kegho ketizenkesa tsüti nthu miwi la keghowa salo.” Isala hi nthu hangshayaden, nu asangthu tsüna khokho wi khiben, “Judah nu Israel miwi kegho kesawegüthu tsü ya nthu miwi la keghowa salo!” Tsalina lebenzüya, nu nmessi lalo.’

¹⁴Kemisintsa Apvüwa na khiben, “Nthu bamyithu na hi sapi lebentsu thsü kesa wi hi ketizenkesa pi mathu miwi chi le kidenya, nu hi kemeshen nkemilila tsüthu tsü sa.

¹⁵Isala hi khilitsü sawegü pi Jerusalem nu Judah nyithu cüaden . Tsalina nmessi lalo.

¹⁶ Nthu na hathu ha saaben: khokho tuwi atsentsawa khi. Ajüh kekaghatenpen wi atsentsawa khuchi nu kecca sengho den.

¹⁷Kesükesü paketenali le alen nkidenla. Milikemesa khi nu nkishenla. Hi milikemesa, atsentsa nkenye, nu yasayala tsü nanmeghüden.”

¹⁸Kemisintsa Apvüwa na ketsijüh hapi Zekhariya cü:

¹⁹“Asha mejüwa, mangawa, tagüwa, nu taghawa wi kezi saaketen tsüpi Judah nyithu ghena anonkeghe nu kenong khothu sa wa tendha. Nthu na atsentsawa nu kecca nghalithu yishü.”

²⁰Kemisintsa Apvüwa na khiben, “Anyunuti kejon wina anyithu na Jerusalem wi gho keten matsüwa na gho tendha.

²¹Anyunuti kesü wina gho ketenthu na anyunuti kepawa wi gho ketenthu wi khiben, ‘Ithu na Kemisintsa Apvüwa kinyi nu ma wi kesawegü khie waden. Ithu gweghe ghalo!’

²²Anyi kejon nu kekhang ntsa mizzatentithu na Jerusalem wi ghola Kemisintsa Apvüwa kinyi nu ma wi kesawegü khieben.

²³Tsü tsüwi asangthu meshu tagha na Judah nyi kesü wi gho hati khiben, ‘Ikhang la no gweghe wa mvuben, kepaghenanye Anyiza na no gweghe tenle kesa ikhang na zayadha.’ ”