Read Northern Rengma Naga MALAKHI 3 Bible Online

MALAKHI 3 - Northern Rengma Naga bible

MALAKHI 3

¹ Kemisintsa Apvüwa na luneng, “Hi hi nyilo kesun pi ighena alenwa tsü kiden-keshaya thsüaden . Isalethu, nthu na ghang ketenwa Apvüwa na zulila ma Kekinyijjen witsü ghoben. Nthu na muya mvu keben nyilowa na gho nu hi cenkethenjüh pi thangchiaben.

² Isala thowa na ma kegho tsathang witsü ngan benya mehai nu? Thowa na ma gho lethu, hang benya mehai nu? Ma sapuno kekhang ti, amighe sametha keten anni kesü ti kesa.

³Ma satemetha nu rükatssü satemetha keten kesü ti ajühkaghaten ghoden. Amighe kecü nyi kesü na rükatssü nu suna mecang temetha keten ti Apvüwa nyilowa na keqhaikedithu tsü satemetha den, isanu mathu na kekinyithu kemeshon sennu Apvüwa wi gho thsü le kesalina.

⁴Isalethu, Judah nu Jerusalem nyithu na mathu kheni sa kegho ti kekinyithu sennu Apvüwa wi kegho tsü ma nenben.

⁵Kemisintsa Apvüwa na khiben, “Hi nthu jawi ghola ajühkaghaten den: nu hi wan kedema sa ketenthu, keqhezathu, milikemesa cüki kekhithu, mellidsa ketenthu kutimen mechu ketenthu, denyilethu, magha-maghangthu, nu asangthu miwi mathu ghena kekiyiwa saya ketenthu, nu hi kinyikü nketenthu tsüdi shunla khishiaben .

⁶“Hi Apvüwa, nu khiela kemili nten. Tsalina no Jakob shicübvüghathu, nthu yasatha npi sa.

⁷Nthu na nthu tuwi nthu bamyithu ti iyenthu teshi nu tsüthu n-nieladha. khapeghe sennu hi wi gholo, isathu hi la nthu wi khapeghe ghoben. Isala nthu na keüden, ‘Ithu na no wi khapeghe ghole kesa mangwa nsathu yishü nu?’

⁸Hi nthu keü kebenwa na, anyi kesü na Anyiza kemechu tsüna meshon ben kwe? Nyele, isala nthu na hi mechuben. Nthu na keüben, ‘Khati kesa wina nu?’ Gishü tagha wi kesü nu kekinyi khukechi jjügi wina.

⁹Nthu tsüdi miwi kishen-keshi na bendha. Kepaghenanye mizzatenti mabenla hi mechu ben.

¹⁰ Nthu na gishü tagha wi kesü tsü maben sennu Kekinyijjen wi gholo, isanu ciwi kedsakejjü kejon benya thsü le kesalina. Hi ghan nanlo, isathu nthu na hi tangwi jjenkubhi sha chi nu kedsakejjü alen kepapa tsüdi meyisha pi nthu miwi pong kimenni sacü keben tsü nthu na muyaben.

¹¹Hi pala gheithu ya nthu lli yasa thsü nben, nu nthu kemeshentsse llithu ya ma bi kejon bünya thsüben.

¹²Isalethu nthu yyi na kahang pen kemehai kesü saya keten ghena mizzatenti tsüdila nthu pi kemihhi ntsale ci waben.”

¹³Apvüwa na khiben, “Nthu na icüki qhethiketen kesa khi. Isala nthu na keüben, ‘Ithu na ncüki mangwa khi nu?’

¹⁴Nthu na khidha, ‘Anyiza kekuli kesa tsüna mangla nye. Ma khi kebenthu tsü kesa nyelela ithu na mangwa sadha khe tsü ghena ahathakina pi Apvüwa Kemisintsawa ccüca le kesa tsüna kemehai mangwa ben nu?

¹⁵Ithu na mukeben ti, anyi kekapvüthu na anonghethi saden. Anyi nkemehaithu na mehai kayi kesa ketan nyela mathu kekuli nkemehaithu sennu Anyiza lebenkesie tsü ghan nan nu pala makesü sa bvü neng den.’ ”

¹⁶Tsaseng wi anyi Apvüwa messi ketenthu na khokho keccünengli, nu Apvüwa na mathu na mangwa khi khe kina nu tsü zaya. Ma kete wi lesüshen kesü wi anyi thothu na Apvüwa messi nu kinyiküten khe tsü cüki zhüketheng na ben.

¹⁷Kemisintsa Apvüwa na khiben, “Mathu na inyithu saaben. Hi kuli keshagha tsathang wi mathu na iji ntsa saaben. Aba kesü na atsa ma kekuli sa ketenwa nantizen keten ti hi mathu nantizen cüaden .

¹⁸Inyithu na kheneng kuti anyi ketsatanwa nu gheshighenawa, anyi hi kekuli kesawa nu nkesawa jüwi kepapa mangwa khati saben khe muyaben.”