Read Northern Rengma Naga MATHI 10 Bible Online

MATHI 10 - Northern Rengma Naga bible

MATHI 10

¹Jisu na ma sansikeyathu Taghakeni cighu chi nu nkemehai ghamuthu jügüshiya, khuma-khujü nu kesakinaa kepapa kesa tsüdi sa pi mehaiya kemehai kekhang pi mathu cü.

²Hathu hana Apostelthu Taghakeni nyan: Simon (Pitor le ci ketenwa) nu ma cünyuwa Andria; Zebedee tsa James nu ma cünyuwa Johan;

³Filip nu Bartholoma; Thoma nu khajana kekhüwa Mathi; Alfia tsa James nu Thadaya;

⁴Simon, Kanaan nyiwa, nu Jisu matsa kesawa Judah Iskariot.

⁵Jisu na kecükegwe hathu pi anyi Taghakeni hathu cü nu kesun pi wa thsü: “Anyiza nkechü nyithu yyi nu Samaria nyi nyutithu wi nwa lalo.

⁶Tsüti kesawa nye, nthu na Israel nyi khaghaneni bhatagha kesathu wi walo.

⁷Wala ‘Tang Kadiyyiwa tsüna tetsakidha le’ kesa pi sansi chilo!

⁸Kesakinaa sa pi mehai cü, keshü sa pi hangya thsü, agükedsakenaa sa pi mehai cü, nu atsaghangthu jügüshi cülo. Nthu na kekila wi mukeya tsüti kekila wi pi nyu cülo.

⁹Nthu na suna, rükatssü, nyelela apisa mangla npvüla;

¹⁰ kijünyi kewa ghena ajula, agwomejuwa nu accüguwen gilli nyelela akhhatssü lela npvüla. Kekuli nyi kesü na ma nsenthu keyishü tsü mu keya-u le.

¹¹“Nthu na wa anyuti nyelela anyu kesü cuyathu nyu na nthu ssiya mvu keben tsü ghanglo, nu nthu na apen tsü npi keteshi chu ma gweghe benlo.

¹²Nthu na wa ajjen kesü wi duya lethu, ‘Kecca ya nthu ssiben keyawa salo’ khilo.

¹³Keujüla ajjen tsüwa wi keben anyithu na anonkeghe sa nthu ssiya lethu, nthu shalom kesawa tsü ya ciwi benya; isala mathu na anonkeghe sala nthu ssi meya lethu, nthu shalom kesawa tsü khuneng yalo.

¹⁴ Ajjen nyelela anyuti pahan wi nthu ssi meya mvu nyelela nthu jüh nkina mvu lethu, nthu na apen tsü teshi wa keten wi nthu ccü wi ayyinikhu kekhashalo.

¹⁵ Hi nthu kizaden, Ajühkekaghaten tsathang wi Anyiza na anyuti ciwi kahangthu miwi Sodom nu Gommorah nyithu nantizen chiaben!

¹⁶ “Kinalo! Hi nthu pi khaghaneni ti sala kesun pi atennithu jawi chiben. Nthu na amaghang ti meghe-metsa nu nkhetsü ti ayencüki mehai nsathu yishü.

¹⁷ Kiden-keshayalo, kepaghenanye anyithu na nthu ghan sen nu ajühkaghaten ben, nu Sinagog wina nthu kiccü ben.

¹⁸Ighena nyu na nthu ghan sen nu ahngthu nu kadimithu tuwi gho ajühkaghaten ben, Ajühkemehaiwa pi mathu nu Anyiza nkechüthu kiza thsüle kesalina.

¹⁹Mathu na nthu ssinu ajühkaghaten kewa wi nthu na khati nu mangwale khiten nu kesa leben ketizen nsa la, kepaghenanye matsü na kegho wi nthu na mangwa nkhithu yishü khe pi nthu cüben.

²⁰Nthu na ajühkhi ketenthu tsüna nthu jüh nye, isala tsüna nthu Bawa Ghamu na nthu wi ben nu khiben.

²¹ “Anyithu na mathu cünyuthu ghan pi shü thsüaben, nu abathu na atsangathu tuwi tsü makesü saben; atsangathu na abajjathu shun nu mathu ghan pi shü thsüaben.

²² Ighena anyi tsüdila nthu nanmeghü ben. Isala thowa na kekheneng sen wa asakhen cuya khe ma hangsha yaben.

²³Mathu na anyuti kesü wi nthu metenmesha lethu, kepawa bvülo. Hi nthu kizaden, Anyi Tsawa na npi kegho tuwi nthu na Israel nyuti tsüdi wi nthu kekuli sacen nben.

²⁴ Asenkeniewa kesü tsüna ma kesansiwa miwi ndiki; nyelela amaghawa tsüna ma pvüwa miwi ndiki.

²⁵ Tsalina asenkeniewa na ma kesansiwa ti saya nu amaghawa na ma pvüwa ti saya lethu tsüna mehaidha. Keujüla ajjen wi aliwa pi Beelzebul le cithu, ajjen tsüwa wi atheghi kepathu nyan pi tsü miwi nkemehaiki ciden!

²⁶ “Tsalina anyithu nmessi lalo. Khili nmula kebenthu tsüdila sa pi muya thsüaben, nu kuthi kebenthu tsüdi pi chüya thsüaben.

²⁷Hi kejang wi mangwa pi nthu kiza khe nthu na kewegü wi tsü nkhi nengthu yishü, nu nthu na kekuthi wi mangwa zaya khe ajjenmili wi kinu tsü nkhi chithu yishü.

²⁸Kahangli ketan khe aghamu pathiya nkebenthu tsü nmessi lalo, isala kahangli nu aghamu la pi annighajü wi yasa kebenwa Anyiza tsü messiyalo.

²⁹Apisa kesü pi akhükhü keni shüya mehai, isala akhükhü kesütan la nthu Bawa kemeshen nkenye tsü ayyi wi qancadu nten.

³⁰Isala nthu ghena tsü nthu lissen tsüdila si senben.

³¹Tsalina nmessi lalo; nthu na akhükhü kejon miwi ma men dhu.

³²“Keujüla anyi kesü na anyithu tuwi ma ijile kesa khishü lethu, hi la tang wi iBa tuwi ma ghena tsüti khiben.

³³ Isala anyi thowa na anyithu tuwi hi meya mvula sa khe hi la tang wi iBa tuwi ma meya mvula shaben.

³⁴“Hi keccawa sen nu ayyi wi ghole nmeshen lalo. Nyele, hi keccawa nyela njünnu kesü sen nu ghole.

³⁵ Atsathu na abathu shun, angathu na ajjathu shun, nu accünyiethu na anyiethu shun thsüle kesalina hi ghodha;

³⁶nu anyi kesü nankemeghü ntsawa na ma jjenku wina shhugho ben.

³⁷“Anyi thowa na hi ketizen miwi ma ba nyelela ma jja tizen kayi khe isenkenie nsa qo; nu anyi thowa na hi ketizen miwi ma tsanga tizen kayi khe ma isenkenie nsa qo.

³⁸ Anyi thowa na ma kross pvünu iseng nie meya khe ma iseng kenie nsa qo.

³⁹ Anyi thowa na ma kahangli hangsha yale sa khe dedi shaben, isala thowa na ighena ma kahang khuchi khe mu nengya shaben.

⁴⁰ “Anyi thowa na nthu ssiya khe hi la ssiyaden; nu thowa na hi ssiya khe hi kesun kechiwa la ssiyaden.

⁴¹Anyi thowa na Anyiza nyilo ssiya khe ma Anyiza nyilo ghena akutimenwa tsü pi gishü yaben; nu anyi thowa na ketsatan nyi ssiya khe ma ketsatan nyi ghena akutimen tsü pi gishü yaben.

⁴²Hi nthu kizaden, anyi thowa na atssü kicü hyi kesü la pi hi sansikeya hathu jawi kizza ntsawa kesü jjü thsü khe ma hi sansikeya nyi ghena, akutimen muya metsiben.”