Read Northern Rengma Naga MATHI 25 Bible Online

MATHI 25 - Northern Rengma Naga bible

MATHI 25

¹Tsü tsüwi tang Kadiyyi na hati saben. Ciwi ghala meshu tagha na mathu nnikecanki sen nu shanyiwa ssiyale wa.

²Mathu meshu manga na kejüphon nu meshu manga na kemetsa.

³Kejüphonthu na mathu nnikecanki khuya, isala annitssü gilli khu meyala.

⁴Isala kemetsathu na mathu nnikecanki ghena annitssü pi ahikhu pongti chiya.

⁵Shanyiwa na gho minuten wa, tsalina ghalathu na kumu nu jen wa.

⁶“Isala ghaja non wi jisha nu ‘Ae, shanyiwa na gho tendha le! Ghala ma ssiyalo!’

⁷Ghalathu ma tagha na shagha nu mathu nnikecanki cankiya.

⁸Tsaseng wi kejüphonthu na kemetsathu wi khi, ‘Nthu nnitssü pahan pi ikhang cülo, kepaghenanye ikhang nnikecanki na nyen wa tendha.’

⁹Kemetsathu na luneng, ‘Nyele, ciwi ikhang ghena nu nthu ghena la sen qo nbenle. Wala kejeü pen wi nthu ghena pahan sheiyalo.’

¹⁰Tsalina kejüphon ghalathu na annitssü sheiyale wa, nu mathu na wa kesa jü wi shanyiwa na ghoa. Ghala manga kiden sen nu kebenthu na ma gweghe keshanyi kemishu wi wa nu ajenka khenya.”

¹¹“Tsaseng wi ghala kepathu na gho nu khi, ‘Apvüwa, Apvüwa! shachi pi ikhang la cülo!’

¹² Isala shanyiwa na luneng, ‘Hi atsentsa nthu kizaden, hi nthu nchüle!’ ”

¹³Jisu na khi, “Tsalina nthu kiden-kesha nu hie benlo, kepaghenanye nthu na atsathang nu matsüwa tsü nkechü ghena.”

¹⁴ “Tsü tsüwi tang Kadiyyi na hati saben. Ciwi anyi kesü na ma jjen teshi nu kijünyi wa keten wi ma maghathu cichi nu ma keben pi mathu dhenchi.

¹⁵Ma mathu na saya kemehai qei wi pi mathu kesüsü gishü cü: ma pisaten manga pi kesü cü, pisaten keni pi kepawa cü, nu pisaten kesü pi kepawa la cü; isanu ma kijünyi wa.

¹⁶Amagha pisaten manga mukeyawa na wan tsü sen wa asensa nu pisaten manga kiyiya.

¹⁷Tsü makesü amagha pisaten keni mukeyawa la sen wa keni kiyiya.

¹⁸Isala amagha pisaten kesü mukeyawa na tsü sen wa ayyiku kesü wi chhüvhü, nu ma pvüwa pisa tsü pi kuthia.

¹⁹“Matsü kesie seng wi amaghathu pvüwa tsüna gho neng nu mathu na khati kiyiya khe ghangwa.

²⁰Amagha pisaten manga mukeyawa na pisaten manga kiyi sen gho nu khi, ‘Apvüwa, no pisaten manga pi hi cüle. Ghangchilo, hi he wi manga kiyi yadha.’

²¹Ma pvüwa na khi, ‘Mehaidha, no jühtsentsa kesen nu amagha kemehaiwa. No jühtsentsa sa nu pala kezeng-u wi noncca pi mehai kecü ghena hi no pi pala kejon noncca thsüden. Ghala hi gweghe anonghe yalo!’

²²Tsaseng wi amagha pisaten keni mukeyawa na gho nu khi, ‘Apvüwa, no pisaten keni pi hi cüle. Ghangchilo, hi he wi keni kiyi yadha.’

²³Ma pvüwa na khi, ‘Mehaidha, no jühtsentsa kesen nu amagha kemehaiwa. No jühtsentsa sa nu pala kezeng-u wi noncca pi mehai kecü ghena hi no pi pala kejon noncca thsüden. Ghala hi gweghe anonghe yalo!’

²⁴Tsaseng wi amagha pisaten kesü mukeyawa na gho nu khi, ‘Apvüwa, hi no kecügü nyi; no pi nkeyangchi wi lela wwiden, nu no pi nkivvüchi wi lela saghuden kesa hi chüben.

²⁵Hi messi, tsalina npisa tsü sen wa ayyiku wi kuthile. Ghangchilo, npisa na he wi benle.’

²⁶Ma pvüwa na khi, ‘No nkemehai nu kenontssü maghawa! No hi pi nkeyangchi wi lela wwiden, nu hi pi nkivvüchi wi lela saghuden kesa chüben kwale?

²⁷Isathu, no ipisa pi apisajjen wi chitheng nu hi kegho neng wi ma midhon pi kekiyi saghu mukeya thsü-u.

²⁸Khili ma wi apisa tsü khuya nu pi pisaten tagha kebenwa tsü wwa cülo.

²⁹ Kepaghenanye anyi thowa na pala pahan ben khe pi wwaneng cüden, nu ma ji ntsa benya thsüden. Isala anyi thowa na mangla nmi khe ma wi keu keben tsü lela sen bvüaben.

³⁰ Nu amagha mangla nkenyewa ha pi akhemi kejang wi khala chilo; ma ciwi qai nu ma yha kemeküli benden.’

³¹ “Anyi Tsawa na Kadimi sa kegho wi tangnyilothu tsüdi ma gweghe gho nu ma kadipen wi donki,

³²nu ayyi wi mizzatentithu tsüdi ghola ma tuwi saghuben. Tsaseng wi ma anenikehie kesü na anenithu jawi khaghaneni kessishiya kesa ti tsüthu gishü pi akhang keni saben.

³³Ma anyi ketsatanthu pi ma kwen ajewa chiya nu kepathu pi tavüwa chiyaben.

³⁴Tsaseng wi Kadimiwa na anyi ma kwen ajewa kebenthu wi khiben, ‘Nthu iBa kesawegü kepvüthu! Ghala ayyi npi kesachi wina nthu ghena kiden ketheng kadiyyiwa ha ghong yalo!

³⁵Hi ghama keben wi nthu na hi ghanja cü; hi dighe keben wi nthu na pi hi jjüya thsü; hi kijünyi sa keben wi nthu na hi ssi pi nthu jjen wi chiya,

³⁶nu kemessü keten wi nthu na athsümeni pi hi mphi thsü; hi sanaa keben wi nthu na hi noncca, nu atssüzü sa keben wi nthu na hi ghangchi cü.’

³⁷Tsaseng wi ketsatanthu na ma luneng ben, ‘Apvüwa, ikhang kusi no ghama keben wi pi no ghanja cü, nu dighe keben wi pi no jjüya thsü nu?

³⁸Ikhang kusi no kijünyi sa keben muya nu no ssi pi ikhang jjen wi chiya, nu kemessü keben wi athsümeni pi no mphi thsü nu?

³⁹Ikhang kusi no sanaa nyelela atssüzü sa keben wi no ghangchi cü nu?’

⁴⁰Kadimiwa na luneng ben, ‘Hi atsentsa nthu kizaden, nthu na kusi inyi hathu jawi kizza ntsawa kesü miwi ha sachi khe tsüna ighena sachile.’

⁴¹“Tsaseng wi ma anyi ma kwen tavüwa kebenthu wi khiben, ‘Nthu Anyiza kishen-keshi kepvüthu, hi wina bvülo! Atsaghang nu ma nyilothu ghena kiden ketheng anuphan annighajü wi tsü bvülo!

⁴²Hi ghama keben wi nthu na hi ghanja ncü, nu dighe keben wi nthu na pi hi njjü thsü.

⁴³Hi kijünyi sa keben wi nthu na nthu jjen wi hi ssi meya, kemessü keben wi nthu athsü pi hi mphi nthsü; hi sanaa keben nu atssüzü sa keben wi nthu hi noncca ncü.’

⁴⁴“Tsaseng wi mathu na hati ma luneng ben, ‘Apvüwa, ikhang na kusi no ghama, dighe, kijünyi sa, kemessü, sanaa nyelela atssüzü sa keben mu nu ikhang na no kiqa ncüla nu?’

⁴⁵Kadimiwa na khineng ben, ‘Hi atsentsa nthu kizaden, nthu na kusi inyi hathu jawi kizza ntsawa kesü nkiqa cü mvu la khe tsüna hi nkiqa cü mvu lale!’

⁴⁶ Tsaseng wi hathu ha kesun pi anuphan kemeten wi chiaben, isala ketsatanthu na anuphan kahang wi waben.”