Read Northern Rengma Naga MATHI 26 Bible Online

MATHI 26 - Northern Rengma Naga bible

MATHI 26

¹Jisu na pala hathu ha tsüdi khi pi nyu kesansi seng wi ma sansikeyathu wi khi,

² “Nthu na chükeben ti ghanan keni seng wi Shhukeya Kho tsü sa wa tendha, nu ciwi Anyi Tsawa tsü pi kross miwi jenlo kesalina ghan pi nyu kwen chiaben.

³Tsaseng wi keqhaikedi ntsathu nu keshenpfüthu na Keqhaikedi Kemisiwa Kaifa jjen wi kemetuli,

⁴nu kuthila Jisu ghanya nu ma pi shü thsüale sa.

⁵Mathu khi, “Anyithu jawi kivvü nshagha thsüle kesalina ikhang na akho sa keben tsü wi ha sa yishüle.”

⁶Jisu na Bethani wi anyi kesü agükedsanaa kebenwa Simon jjen wi wa ben.

⁷ Jisu na dsajjütu keben wi nza kesü na adeli hankedemvu ma men kedhu pi alabaster hikhu pongti chi sen gho ma li wi meyisha chi.

⁸Sansikeyathu na ha mukeya wi mathu leben minu nu khi, “Mangkesa na adeli ha tsüdi dedi ben nu?

⁹Adeli ha pi apisa wi jeü ya nu pi ketha-u ncüla!”

¹⁰Jisu na mathu na mangwa khiben khe chüya nu mathu wi khi, “Nthu mangkesa na nzawa ha kivvü ben nu? Ma ighena pala tsikemehai nu kesau sachidha.

¹¹ Kepaghenanye nthu na keshüthangla ketha-uthu gweghe benden, isala nthu na keshüthangla hi gweghe ben nben.

¹²Ma npi wina hi pi vhüa keten ghena kidenya thsüle adeli hankedemvu pi igwo nyen cüdha.

¹³Hi atsentsa nthu kizaden, ayyi maben wi ajüh kemehaiwa ha pi kekhi wi ma kekuli cüki ha khiben.”

¹⁴Tsaseng wi sansikeyathu Taghakeni jawi kesü ma nyan Iskariot Judah tsüna keqhaikedi ntsathu wi wa,

¹⁵ nu khi, “Hi Jisu ghan pi nthu cüthu nthu na mangwa pi hi cüben nu?” Mathu na rükatssü changha si pi ma cüa.

¹⁶Tsü nten na Judah na Jisu ghan pi mathu kwen wi chiale kesa matsü kemehai ghangwa.

¹⁷Azimi nkechi mesa pi kemishu kho tsathang atuwa wi sansikeyathu na Jisu wi gho nu ma keü, “No ikhang yala khiewa wala nghena Shhukeya Kho tsse kedsa ghena kidenya thsü mvu ben nu?”

¹⁸Jisu na hati khi nu mathu kesun pi wa thsü, “Anyunutiwa wi anyi kesü wi tsü walo, nu hati ma wi kizalo, ‘Kesansiwa na khiben, itsüwa tsüna ghodha, hi nu hi sansikeyathu na njjen wi Shhukeya Kho tsü saden.’ ”

¹⁹Sansikeyathu na wala Jisu na mathu kekiza ti Shhukeya Kho tsse tsü kidenya.

²⁰Minulen wi Jisu nu ma sansikeyathu Taghakeni na gho donki nu tsü dsa.

²¹Mathu na dsajjü keben wi Jisu na khi, “Hi atsentsa nthu kizaden, nthu meshu kesü na hi matsa shaben.”

²²Sansikeyathu na mathu hathana ntsa sa nu mathu kesüsü na ma wi keü, “Apvüwa, no ntsakhiwa hi khi nbenshe?”

²³ Jisu na luneng, “Meshu kesü hi gweghe akhu kesü wi amesa dsa kebenwa tsüna hi matsa shaben.

²⁴Ntsawajüh kekhi ti Anyi Tsawa na shüaben, isala anyi Anyi Tsawa matsa kesawa ghena tsü khatila qhethiketen saten nu! Anyi tsüwa ghena tsü ma pvügha nkeghowa ma ghena mehaidha le!”

²⁵Judah nyu kematsawa na ma wi keü, “Apvüwa, no ntsakhiwa hi khi nbenshe?” Jisu luneng, “No tsüti khidha.”

²⁶Mathu na dsajjü keben wi Jisu na amesa be kesü khuya nu kesawegü khiechi, pakhhiya, nu pi ma sansikeyathu cü nu khi, “Ha khupi dsayalo, hawa ha igwo.”

²⁷Tsaseng wi ma ahyi kesü pieya nu kesawegü khiechi nu pi mathu cü nu khi, “Nthu tsüdila ha pi jjüyalo,

²⁸ hawa ha ijjü, anyi kejon kesami teshi pi cüle kesa ghena keji kechi Anyiza wi cenkethenjühwa tsü.

²⁹Hi atsentsa nthu kizaden, hi iBawa Kadiyyi wi nthu gweghe kisengtssü ketheüwa kejjü tsathang npi kecu chu hi kisengtssü ha khiela njjü nengdha.”

³⁰Tsaseng wi mathu akhwi kesü sa nu Oliv Yikha wi wa.

³¹ Tsaseng wi Jisu na mathu wi kiza, “Shita wi nthu tsüdila hi teshi nu bvüaben, kepaghenanye Ntsawajüh na khiben, ‘Hi anenikehiewa pathi, nu khaghanenithu tsüna bvüzigheaben.’

³² Isala hi hangneng-keshagha seng wi nthu tuwi na Galilee wi wa benla ben.”

³³Pitor na Jisu wi khi, “Mathu tsüdi no teshi lela hi tsü khiela no teshi nbenle.”

³⁴Jisu na Pitor kiza, “Hi atsentsa no kizaden, shita wi awegü npi kekhou tuwi no kecheng tughu hi nchüle khiaben.”

³⁵Pitor na luneng, “Hi khiela tsüti khi nben, hi no gweghe lela shüaben le!” Nu sansikeyathu kepa wi la tsüdi tsü makesü khia.

³⁶Tsaseng wi Jisu na ma sansikeyathu ssinu apen kesü Gethsemane kesa wi tsü wa nu ciwi ma mathu wi kiza, “Hi ka wi wa kekhie sa keben jü hewi donki benlalo.”

³⁷Ma Pitor nu Zebedee tsa keni ssiya nu ma gweghe wa. Lebengükeccü nu ahathakina na ma miwi gho,

³⁸nu ma mathu wi kiza, “Ileben güccü mtsü nu shü keten ti sadha. Hewi ben nu hi hieben lalo.”

³⁹Ma tsü miwi keu wha nu ayyi wi nkhwendu nu kekhie sa, “Iba, keujüla saya mehai lethu, hi wi ketizenkesa hyiwa ha khuya cülo! Isala hi kenen ti nye, no kenen ti sayalo.”

⁴⁰Tsaseng wi ma sansikeyathu ma kecheng wi gho neng nan mathu jen keben muya; nu ma Pitor wi kiza, “No kecheng khati nu amighe kekihhe kesü jü ketanla hi hie meya nu?

⁴¹Nthu na kemechu wi ndule kesalina hieben nu kekhie saki benlo. Aghamu wi anonghe ntsa saben, isala asajjü wi tsü nchaladha.”

⁴²Jisu na kheneng wa kuti kekhie sa, “Iba, keujüla hi ketizenkesa hyi ha nkejjü tsü sen bvüya nben lethu, no kemeshen ti sayalo.”

⁴³Ma kheneng gho nan ma sansikeyathu jen keben muya; mathu nyon nküchala benla.

⁴⁴Kheneng Jisu na mathu teshi nu wa kecheng tughuwa kishi kekhi jüh makesü khi pi kekhie sa.

⁴⁵Tsaseng wi ma kheneng sansikeyathu wi gho nu khi, “Nthu na khili la cca jenben kwe? Ghangchilo, Anyi Tsawa tsü ghan pi kesami nyithu kwen wi chia keten matsüwa tsüna ghodha.

⁴⁶Shaghalo, ikhang wha na. Ghangchilo, anyi hi matsale ketenwa tsüna hewi tendha le!”

⁴⁷Jisu na ajühkhitu keben wi sansikeyathu Taghakeni jawi kesü Judah tsüna anyitenti ssinu gho. Mathu na keqhaikedi ntsathu nu keshenpfüthu wina kesun kechi, njünnu nu achanghonthu sen nu gho.

⁴⁸Judah na azensu kesü pi mathu cü theng; “Hi wala anyi kesü kimang chi lethu tsüna nthu ma ghanyale kebenwa tsüna ma ghanyalo.”

⁴⁹Judah na meshonqhe Jisu wi wha nu khi, “Kesansiwa, kecca ya no ssi ketenwa salo,” isanu ma kimangchi.

⁵⁰Jisu na luneng, “Ipvüshangwa, no mangwa sale ghoben khe wan sayalo!” Tsaseng wi mathu ghola Jisu ghan pi bhenya.

⁵¹Jisu gweghe ketenthu meshu kesü na njünnu hanshi pi Keqhaikedi ntsawa magha khuna handhia.

⁵²Jisu na ma wi khi, “Annu pi nlicen wi chiyalo. Njünnu sen ketenthu tsüdila njünnu wi shüaben.

⁵³Hi iBa wi kekiqa khiechi lethu, ma wan tangnyilo süpahizithu taghakeni miwi kesunchi cüa keben tsü no nchü kwe?

⁵⁴Isala tsüti sa lethu khati nu Ntsawajüh na tsüti sabenle khi keben tsü sacenya mehai nu?”

⁵⁵ Tsaseng wi Jisu na anyitenti wi khi, “Nthu na hi pi ayen kepakhhi nyi kesü ti sa nu njünnu nu achanghonthu sen nu hi ghanyale ghoben kwe? Hi atsathangla Kekinyijjen wi donki nu nyu sansi lela nthu na hi ghan meya.

⁵⁶Isala atusenjüh-kechüthu na Ntsawajüh wi zhü ketheng tsü sacenya thsüale kesalina ha tsüdila saben.” Tsaseng wi sansikeyathu tsüdila ma teshi nu bvüa.

⁵⁷Jisu ghan keyathu na ma ssinu Keqhaikedi Kemisiwa Kaifa jjen wi wa, ciwi Ayenkesansithu nu Keshenpfüthu tsüdila saghuben.

⁵⁸Pitor na demija wi Keqhaikedi Kemisiwa jjen ccühha kecu wi ma nie wa. Ma ciwi dula aghikehiethu gweghe donki nu khati saten khe ghang ben.

⁵⁹Keqhaikedi ntsathu nu ciwi kemehu maben la Jisu pi shü thsüale kesalina ma kesami bhaben;

⁶⁰isanu anyi kejon na shagha milikemesa cüki khi lela mathu thola ma kesami mu meya. Asakhenwa meshu keni shagha

⁶¹ nu khi, “Anyi hawa ha kekhi na, ‘Hi Anyiza Kekinyijjenwa ha yasa nu ghanan kecheng jü wi tsü saneng cüya mehai le!’ ”

⁶²Keqhaikedi Kemisiwa na shagha nu Jisu wi khi, “Mathu na no kekimenni jüh hati khi keben ha no mathu luneng nten kwe?”

⁶³Isala Jisu na ccen benwa. Keqhaikedi Kemisiwa na kheneng ma wi khi, “Hi khili hang kebenwa Anyiza nyan wina no pi kishen thsüben: no Anyiza Tsawa Messiya tsü la, pi ithu kizalo.”

⁶⁴ Jisu na ma luneng, “No tsüti khidha. Isala hi nthu tsüdi kizaden, khili nten na nthu na Anyi Tsawa na kekhang ntsawa kwen ajewa donki nu tang wi akulukeshü miwi gho keten mu ben le!”

⁶⁵Keqhaikedi Kemisiwa na ma thsü mezüqhe nu khi, “Ma Anyiza kethenjüh khiben! Ithu na ha miwi chüza kepa wi nsen la mehaidha! Nthu na khili ma Anyiza kethenjüh kekhi zayadha!

⁶⁶ Nthu khatile khiten nu?” Mathu luneng, “Ma sazzidha nu pi nshü thsüthu yishü.”

⁶⁷ Tsaseng wi mathu na ma mmi meshuki nu ma kiccü; nu ma cen kecüthu na

⁶⁸khi, “Messiya, thowa na no kihhe ben khe khi nanlo! pi ikhang kizalo.”

⁶⁹Pitor na accühha na ameiwa donki keben wi Keqhaikedi Kemisiwa maghale kesü na ma wi gho nu khi, “No la Galilee nyiwa Jisu tsü gweghe den.”

⁷⁰Isala ma mathu tsüdi tuwi na, “Hi no mangwa cüki khiben khe nchüle,” luneng chia;

⁷¹nu ma accühha kedulen wi tsü shhua. Maghale kepawa na ma muya nu anyi ciwi kebenthu wi khi, “Ma la Nazareth nyiwa Jisu tsü gweghe tenle!”

⁷²Pitor na kheneng ma nchüle khi nu luneng, “Hi kishen nu khiben hi anyi katsü nchü le!”

⁷³Matsü keu seng wi anyi ciwi ngan kebenthu na Pitor wi gho nu khi, “No la mathu jawi kesü sa metsi. Kepaghena nye njüh kekhi wina no ghan yaben.”

⁷⁴Tsaseng wi Pitor na khi, “Hi kishen nu atsentsa nthu wi kiza ben le! Keujüla hi atsentsa nkhi lethu Anyiza na hi meten kecüwa salo! Hi anyi katsü nchü le!” Tsü meyi awegü na khou shagha,

⁷⁵nu Pitor na Jisu ma kekiza jüh tsü meshenya: “Awegü npi kekhou tuwi no kecheng tughu hi nchüle khiaben.” Ma akhemi wi shhula qai shüca wa.