Read Northern Rengma Naga MATHI 28 Bible Online

MATHI 28 - Northern Rengma Naga bible

MATHI 28

¹Sabbath tsathang cen nu dhitsüwa Apvüwa tsathang wi ghanen mitu Magdalen Maria nu Maria kepawa manyi na ashüjjenwa tsü ghangchi nanle wa.

²Ciwi zulila ameghükuju ntsa sa, Apvüwa nyilo kesü tang wina dugho ashüjjen lon tsü kulupheghe nu ciwi donkiya.

³Ma tsi na atsancwe ti nu ma thsümeni na aghola ti mekidhi kesa.

⁴Aghikehiethu na messi pi kedheggü nu keshü kamang ti sa.

⁵Tangnyilowa na nza keni wi kiza, “Nshinyi nmessila. Nshinyi na Jisu nyu ma pi kross miwi jen kesawa bha keten tsü hi chüben.

⁶Ma he wi nmile; ma kekhi tsüti ma hangneng-shaghadha. Ghola he wi ma pi kechi pen wi ghangchi nanlo.

⁷Wan wa nu ma sansikeyathu wi, ‘Ma keshü wina hangneng- shaghadha, nu ma khili nthu tuwi na Galilee wi wa tendha; nthu na ciwi ma muya ben le!’ tsüti kizalo. Hi nthu kekiza tsü meshenyalo.”

⁸Tsalina manyi na kaghajila ashüjjen tsü teshi, messi isala anonghe ntsa sa, nu sansikeyathu wi kizale bvüa.

⁹Zulila Jisu na gho manyi metu nu khi, “Kecca na nshinyi ssiben keyawa salo.” Manyi shagha ma ccü ghansen nu kinyi.

¹⁰Jisu na manyi wi kiza, “Nmessi lalo, wala icünyuthu wi mathu Galilee wi walo ciwi hi muya ben na kizalo.”

¹¹Nzathu na kebvü seng wi süpahi ashüjjen ghikehiethu pahan na anyunutiwa wi whala khati sa khe tsüdi khi pi keqhaikedi ntsathu kiza.

¹²Keqhaikedi ntsathu nu keshenpfüthu na mathu cho kidenya; mathu na apisa kejon pi süpahithu cü

¹³nu khi, “Nthu na ma sansikeyathu na aghaja wi nthu jen keben wi ghola ma kamang ghanfüya le khilo.

¹⁴Nu keujüla Ahng na ajüh ha zaya lethu, ikhang na nthu kesami nmile kesa ma juyaben, nu nthu na tsü ghena mangla lebengüccü nben.

¹⁵Aghikehiethu na apisa tsü khuya nu wala mathu salo kekiza tsüti sa. Tsalina ha cüki ha nansü kecu Judah nyithu jawi tsüti khiden.

¹⁶ Sansikeyathu Taghakhen na Jisu mathu kekiza ti Galilee wi ayikha wi wa.

¹⁷Ciwi mathu na ma metuya nu ma kinyi, isala mathu pahan na kesütu.

¹⁸Jisu na tetsaki gho nu mathu wi khi, “Tang wi nu ayyi wi la kekhang tsüdi pi hi cüdha.

¹⁹Tsalina ayyi nyi tsüdi wi wa mathu pi hi sansikeyathu saya thsülo; Abawa, Atsawa, nu Kemetha Ghamu nyan wina mathu pi baptaiz sa cülo,

²⁰nu hi pi nthu kekiza tsüdi pi mathu sansi nu nieya thsülo. Hi keshüthangla wa kahang sakhen kecu wi lela nthu ssi benden.”