Read Northern Rengma Naga MATHI 7 Bible Online

MATHI 7 - Northern Rengma Naga bible

MATHI 7

¹“Nthu nyu kesami nbha la, isathu Anyiza la nthu kesami bha nben,

² kepaghenanye nthu na nyu kesami kebha tsüti Anyiza la nthu kesami bha ben, nu nthu na kede pi nyu kecü tsüti ma tsü kede pi nthu cüaben.

³Mangkesa na n-nyon wi kenenkuwa keti keben tsü nmeshenla ncünyuwa nyon wi kenenkuwa kizzakeu tsü ghangten nu?

⁴N-nyon wi kenenkuwa keti na ben lethu no khatinu ncünyuwa kizala, ‘Hi n-nyon wi kenenkuwa kizzakeu tsü khüshi cü na,’ isa khiya mehai nu?

⁵Nthu nkenyeghe kesathu, atuwa sa nthu nyon wi kenenkuwa keti tsü khüshilo, isathu tsaseng wi ncünyuwa nyon wi kenenkuwa kizzakeu tsü mehaitsü muya mehai.

⁶“Pala kemetha pi affü ncü lalo, tsüthu na kheneng nthu ssisale sa keben ketan. Nthu mejüti pi avü tuwi nchi la, tsüthu na tsü cüten keben ketan.

⁷“Khielo, pi nthu cüben na; bhalo, nthu muya ben na; nu ajenka kekhalo, sha pi nthu cüben na.

⁸Kepaghenanye pi khie ketenthu tsüdila cüben; bha ketenthu tsüdila muyaben; nu sha pi kekha ketenthu tsüdila cüben.

⁹Nthu nyu ba kesathu kesü la nthu tsa na amesa khiethu alon pi cüten kwe?

¹⁰Nyelela ma anga khiethu amaghang pi cüten kwe?

¹¹Nthu nkemehaithu ccünkhala pala kemehai pi nthu tsangathu kecü yen chüben. Tsü miwi tang wi kebenwa nthu Ba tsü pala kemehai khaju khatila pi ma wi khie ketenthu cüten nu!

¹² “Nyu yala nthu kenenwa sa thsü mvu keben tsüti nthu nyu kenenwa tsü sa tenlo: hawa ha Mosa Yenwa nu atusenjüh-kechüthu na pi kesansijüh jjügiwa tsüle.

¹³“Ajenka kemanghanwa wi tsü dulo, kepaghenanye annighajü wi kewa jenkawa tsüna mezaqo nu ciwi kewa len tsüna lekete, nu anyi kejon na ciwi waden.

¹⁴Isala kahang wi kewa len jenka tsüna manghanka nu ciwi kewa len tsüna dhu ntsa, nu ciwi anyi kezeng-u ketan tsü muyaben.

¹⁵“Milikemesa atusenjüh-kechüthu ghena nthu kiden-kesha yalo; mathu na amei wi tsü khaghanenithu ti nthu jawi ghoden, isala mathu non wi tsü ntsakhiwa adennithu ti le!

¹⁶Nthu na mathu kekuli wina mathu na khati kesa khe chüyaben. Aghazüton wi kemeshentsse bi bün nten, nyelela ataqaeton wi khhaghabvü bün nten.

¹⁷Achanton kemehai na ma bi kemehai bünden, nu achanton nkemehai na ma bi nkemehai bünden.

¹⁸Achanton kemehai na ma bi nkemehai bün meyacha; nu achanton nkemehai na ma bi kemehai bün meyacha.

¹⁹Achanton ma bi kemehai nkebünwa shüchi pi anni wi khala chiaden.

²⁰Tsalina nthu na mathu kekuli wina milikemesa atusenjüh-kechüthu tsü chüyaben.

²¹“ ‘Apvüwa, Apvüwa’ isa hi ci ketenthu tsüdila tang Kadiyyi wi duyakhi nben, isala tang wi kebenwa iBa kenenwa sa ketenthu ketan na duyaben.

²²Ajühkaghaten tsathang na kegho wi anyi kejon na hi wi, ‘Apvüwa, Apvüwa, isaben! Ithu na n-nyan wina Anyiza ketsijüh khi, n-nyan wina ithu atsaghangthu kejon jügüshi, nu amankesa kejon kuli le!’

²³ Isala hi mathu wi, ‘Hi khiela nthu nchü. Nthu gheshighena nyithu hi wina bvülo’ isa khiaben!

²⁴“Tsalina anyi kesü le kesü lela ijühthu zaya nu tsüthu nie ketenwa na anyi kemetsa kesü na ma jjen pi alon miwi sakeya tsüti le.

²⁵Atsan shathi ntsa gho, aghakuthu pongmeni, nu ameghü na khang ntsa sho pi ajjen tsü shun. Isala ajjen tsüna nqanca, kepaghenanye tsü pi alon miwi sa theng.

²⁶“Isala anyi kesü le kesü lela ijühthu zaya nu tsüthu nkeniewa tsüna anyi kejüphon kesü na ma jjen pi ahachan miwi sa ketheng tsüti.

²⁷Atsan shathi ntsa gho, aghakuthu na pongmeni nu ameghü na khang ntsa sho pi ajjen tsü shun, nu tsüna qanca. Nu tsüna khatila qhethiketen sa qancadha nu!”

²⁸ Jisu na ajüh hathu ha kekhi seng wi anyitenti na ma khati nyu zhüsansi khe amansa.

²⁹Ma Ayenkesansithu ti kesawa nyela kekhang sen nu nyu zhüsansi.