Read Northern Rengma Naga MARK 10 Bible Online

MARK 10 - Northern Rengma Naga bible

MARK 10

¹Tsaseng wi Jisu na apen tsü teshi nu Jordan Ghaku pvüdhi sen nu Judea yyi wi wa. Anyitenti na kheneng gho ma vüya nu ma keshüthangla sa keten ti mathu sansi.

²Farisithu na gho ma ghan-nanle kesalina ma wi keü, “Anyi kesü na ma wubvü yisha kesa ayen benla nmi nu?”

³Jisu na mathu wi keü neng, “Mosa na ayen khati kesa pi nthu cü nu?”

⁴ Mathu luneng kechi na, “Mosa na anyi kesü ya keyisha lesü zhü pi ma wubvü cü nu kesun pi bvü thsü tenle.”

⁵Jisu na mathu wi kiza, “Nthu leben kedhu ghena Mosa na ayen ha zhü pi nthu cüle.

⁶ Isala adechhü sahangkechi wina Ntsawajüh khi keten ti ‘Anyiza na nza nu npvüza sachi.

⁷ Ha jjügi ghena npvüza kesü na ma bajja teshi nu wala ma wubvü manyi kesütan sa waben,

⁸nu keni tsüna kesütan saben.’ Tsalina manyi tsüna keni nyedha isala kesütan sadha.

⁹Tsüghena Anyiza na zanghu kethengwa tsü anyi na zanzighe yishü.”

¹⁰Mathu ajjen wi kedu seng wi sansikeyathu na gho Jisu wi ha jjügi keü.

¹¹ Ma mathu wi khi, “Npvüza thowa na ma wubvü yisha nu nza kepawa yaya khe ma keqheza sa pi ma wubvü shundha.

¹²Tsü makesü, nza thowa na ma wuba yisha nu npvüza kepawa ssiben wa khe ma keqheza sadha.”

¹³Anyi pahan na ghanyithu ssinu Jisu wi gho nu ma ya ma kwen chang pi ghanyithu miwi chi thsüle sa, isala sansikeyathu na mathu satekü.

¹⁴Jisu na tsü mukeya wi ma leben minuya nu ma sansikeyathu wi kiza, “Ghanyithu tsü nkhala, mathu yala hi wi gho thsülo, kepaghenanye Anyiza Kadiyyi na hathu hati kesa jile.

¹⁵ Hi atsentsa nthu kizaden, anyi kesü le kesü lela ghanyi kesü ti sa nu Anyiza Kadiyyi ya nkeya tsü ciwi duya nben.”

¹⁶Tsaseng wi ma kwen chang pi ghanyi kesüsü miwi chi nu sawegü pi mathu cü.

¹⁷Jisu na kheneng kijünyi wa keten wi anyi kesü na bvü gho ma tuwi akhhutsüdu nu keü, “Kesansi kemehaiwa, hi anuphan kahang muyale kesalina hi mangwa nsathu yishü nu?”

¹⁸Jisu ma wi kiza, “No mangkesa na kemehaiwa hi citen nu? Anyiza ketan khe thola nmehai le.”

¹⁹No ayenkhukechithu tsü chüben: ‘Nyu npathi la; keqheza nsa la; n-ghanfü la; milikemesa wi nyu nkimenni la; nyu nmechu la; nba njja kinyikü tenlo.’ ”

²⁰Anyi tsüwa na khineng, “Kesansiwa, hi ghanyi tsüwi na ayenkhukechi hathu ha tsüdi nieyadha le.”

²¹Jisu na ma ghang pi tizenya nu ma wi kiza, “No pala kesü nsathu yishü ben. Wala no keben tsüdi jeü nu apisa pi ketha-u cülo; isathu tang wi no keben benyaben, tsaseng wi gho hi nie ghalo.”

²²Anyi tsüwa na ajüh ha zaya theng nu ma hathanala bvüa, kepaghenanye ma keban ntsa kesü.

²³Jisu na ghang kevüli chi nu ma sansikeyathu wi kiza, “Keban kesü na Anyiza Kadiyyi wi dule kesa na khatila dhu nu!”

²⁴Sansikeyathu na ajüh tsü kina pi mathu mansa, isala Jisu na mathu wi khi, “Ghanyithu, Anyiza Kadiyyi wi dule kesa na khatila dhu nu!

²⁵Keban kesü na Anyiza Kadiyyi wi dule kesa na sunsiesa kesü na aghaceng ku wi keshhuwa la le!”

²⁶Sansikeyathu na amansa ntsa nu khokho wi keü, “Isathu thowa na hangshaya mehai nu?”

²⁷Jisu na mathu ghangti nu khi, “Hawa ha anyi ghena saya nben, isala Anyiza ghena tsü saya mehai, kepaghenanye Anyiza na pala tsüdila kuliya mehai.”

²⁸Tsaseng wi Pitor kekhi na, “Ghangchilo, ikhang na pala tsüdila teshi nu no nieten le!”

²⁹Jisu na khineng, “Hi atsentsa nthu kizaden, anyi thowa na ighena nu ajühkemehaiwa ghena ajjen, acünyuthu, atssüggüthu, aba, ajja, atsangathu, nu allithu teshi khe,

³⁰ma nansü kahang ha wi jiki ntsa muyaden. Ma tsü miwi meza-meza muya keten na ajjenthu, acünyuthu, atssüggüthu, ajjathu, atsangathu, nu allithu, —nu kemeten-kemesha la muyaden; isala kahang gha keten wi ma anuphan kahang muyaden.

³¹ Khili atu sa keben kejon na asakhen saben, nu khili asakhen sa keben kejon na atu saben.”

³²Jisu nu ma sansikeyathu na khili Jerusalem wi shu tendha. Jisu na sansikeyathu tuwi waden, nu mathu na amansa; nu anyi mathu nie ketenthu na messiben. Jisu na kheneng kuti ma sansikeyathu Taghakeni ssi wa nyu na ma miwi kulichi keten cüki khi pi mathu kiza.

³³Ma mathu wi “Kinalo, ikhang na Jerusalem wi shu tendha, ciwi nyu na Anyi Tsawa ghan pi keqhaikedi ntsathu nu Ayenkesansithu kwen wi chiaben . Mathu na ma meshensa pi shü thsülo pi Judah nyi nkenyethu kwen wi chiaben.

³⁴Mathu na ma nankeqhe, ma meshuki, ma kihhe, nu ma pathiaben; isala ghanan kecheng seng wi ma hangneng-shagha shaben.”

³⁵Tsaseng wi Zebedee tsa James nu Johan manyi Jisu wi gho nu khi, “Kesansiwa, no yala ishinyi ghena pala pahan kuli thsü mvuben le!”

³⁶Jisu na manyi wi keü, “Hi nshinyi ghena mangwa sachi thsü mvuben nu?”

³⁷Manyi luneng, “No kadipen wi donki nu n-nyankethang sa kegho wi ishinyi yala kesü nkwen ajewa nu kesü tavüwa donkiya thsü mvuben le!”

³⁸ Jisu na manyi wi kiza, “Nshinyi na mangwa khieben khe nshinyi na nchü. Nshinyi na hi jjü keten ketizen kesa hyiwa tsü jjüya mehai kwe? Nyelela hi baptaiz sa kentenwa tsü saya mehai kwe?”

³⁹Manyi “Sayamehai le” khineng. Jisu na manyi wi khi, “Nshinyi hi jjü keten hyiwa tsü jjüya mehai nu hi baptaiz sa ketenwa tsü saya mehai,

⁴⁰isala ikwen ajewa nu tavüwa donkiya kemehai tsüna hi kessiya kemehai kemeshon nmi. Tsüwa tsüna Anyiza na thothu ghena apen tsü keten theng khe tsüthu ji le!”

⁴¹Sansikeya kepathu ma tagha na tsü cüki zakeya wi mathu James nu Johan manyi miwi leben minu.

⁴² Tsalina Jisu na mathu tsüdi cighu pi ma wi chi nu khi, “Nthu na anyi Anyiza nkechüthu miwi kekhang kesenthu na mathu miwi apvüwa saten nu accülikesathu na mathu miwi kekhang tsüdi senten kesa tsü chüben.

⁴³ Isala nthu jawi tsü tsüti sa nben. Keujüla nthu thowa na kediwa sa mvu khe ma nthu tsüdi maghawa nsathu yishü;

⁴⁴nu nthu jawi thowa na atu sa mvu khe ma tsüdi nssümaghawa saben.

⁴⁵Kepaghenanye Anyi Tsawa lela nyu ya ma kekuli sa thsüle ngho, isala ma nyu kekuli sa nu ma kahangli khuchi pi anyi kejon hangshayale kesa ghena ghole.”

⁴⁶Mathu na Jerikho wi ghoya, nu Jisu nu ma sansikeyathu na anyitenti keti kesü ssinu wa keten wi anyon nkemu kekuwhe nyi kesü ma nyan Bartima kesa Tima tsa tsüna alen wi donkiben.

⁴⁷Ma tsüwa tsüna Nazareth nyiwa Jisu le kesa zakeya wi jisha nu khi, “David tsawa Jisu! Hi nantizen chicülo!”

⁴⁸Anyi kejon na ma satekü nu ma ccen ben walo ma kiza. Isala ma tsümiwi misiki magha nu khi, “David tsawa, hi nantizen chicülo!”

⁴⁹Jisu na ngan nu “Ma cichilo” khi. Tsalina mathu na ma wi “N-nongheya nu shaghalo, ma no ciben le!” khi.

⁵⁰Tsalina ma ma thsü pi khala nu kephenki sen nu Jisu wi gho.

⁵¹Jisu na ma wi keü, “Hi nghena mangwa sachi thsü mvuben nu?” Anyon nkemuwa na luneng, “Kesansiwa, hi yala pala mu nengya thsülo.”

⁵²Jisu na ma kiza, “Whalo, no kenondi na no sa pi mehai cüdha.” Tsümeyi ma nyon na pala muya nu ma alen wi Jisu nie wa.