Read Northern Rengma Naga MARK 11 Bible Online

MARK 11 - Northern Rengma Naga bible

MARK 11

¹Mathu na Jerusalem tsaki kegho wi Bethfage nu Bethani nyuti keni kete Oliv Yikha wi ghoya. Jisu na hati sansikeya keni kecükegwe

²pi atu wi wa thsü, “Nshinyi tuwi anyu wi tsü walo. Nshinyi ciwi du lethu gada zza kesü nyu ma miwi npi kedonki hu pi ketheng muya ben na tsü, lisha sen nu he wi gholo.

³Keujüla nyu nshinyi keüla mangkesa na nshinyi tsü lisha ben nu? isa lethu. Apvüwa na ha nsenthu yishü ben, nu wan kesun pi he wi gho neng thsüaben le, isa khilo.”

⁴Tsalina manyi wa nan gada zza kesü pi alen kete ajenka wi hugi ketheng muya. Manyi wala tsü lisha ben nan,

⁵anyi ciwi ngan kebenthu na manyi wi keü, “Nshinyi mangkesa na tsü lisha ben nu?”

⁶Manyi na Jisu manyi kekiza ti mathu lunengchi nu mathu na manyi teshi chicü.

⁷Manyi na gada tsü ssinu Jisu wi gho, nu mathu thsü pi gada miwi shi nu Jisu ya ma miwi donki thsü.

⁸Anyi kejonla mathu thsü pi alen wi shi, nu pahan na alli wi aghang shhü sengho alen wi chi.

⁹ Anyi atu wi kewathu nu aseng wi nie ketenthu na jisha nu “Hosanna! Anyiza na sawegü pi Apvüwa nyan wina gho ketenwa kecüwa salo.

¹⁰Anyiza na sawegü pi ithu ba Kadimi David kadiyyi gho ketenwa kecüwa salo! Hosanna! Kemisintsa senglo!”

¹¹Jisu na Jerusalem wi du nu Kekinyijjen wi wala ciwi pala tsüdi ghang kevüli chi. Isala minuwa kesalina ma sansikeyathu Taghakeni ssinu Bethani wi wa.

¹²Pitsüwa wi mathu na Bethani wina ghoneng keten wi Jisu na ghamaya.

¹³Ma alen kesie wina khhaghabvü ton kesü mawa ketan pogho keben muya, nu ma ciwi khhaghabvü bi muyala nyekala sala ghang wa. Isala ma tsü kete wi gho nan mawa ketan muya, kepaghenanye tsüna khhaghabvü ma bi kebün tsü wi nye.

¹⁴Jisu na khhaghabvü ton wi khi, “Anyi thola nmiwi nbi ndsa neng thsüdha!” Nu ma sansikeyathu na ma tsüti kekhi tsü zaya.

¹⁵Mathu na Jerusalem wi ghoya, nu Jisu na Kekinyijjen wi wa anyi ciwi pala shei nu jeü kebenthu tsüdi jügüshia. Ma wala apisa kemili nu tuktur jeü kebenthu miz tsü pakhakuli,

¹⁶nu ma anyi thola Kekinyijjen ccühha wina mangla pvünu nshhu thsü.

¹⁷ Ma nyithu sansi: “Ntsawajüh wi Anyiza na kekhi hati zhütheng, ‘Hi Kekinyijjen pi anyi mizzatenti tsüdi ghena kekhie jjen kesü le ciden, isala nthu na tsü pi kaghanfüthu keben pen kesü sadha.”

¹⁸Keqhaikedi ntsathu nu Ayenkesansithu na ha zaya nu mathu na Jisu pathiale kesa alen bha wa. Isala mathu na ma messi, kepaghenanye anyitenti maben la ma kesansi kina nu amansadha.

¹⁹Minulen wi Jisu nu ma sansikeyathu na anyunutiwa tsü teshia.

²⁰Ghanenwa mitu mathu na alen wi kegoe wa nan khhaghabvü ton tsüna shü dula ma ghazan cu kebenla muya.

²¹Pitor na khati sa khe tsü meshenya nu ma Jisu wi khi, “Kesansiwa, ghangchilo. no khhaghabvü ton kishencü kesa tsüna shüdha le!”

²²Jisu na mathu luneng, “Nthu Anyiza wi kenondi benyalo.

²³ Hi atsentsa nthu kizaden, anyi kesü le kesü lela ayikha hawi kizala shagha nu wa atssükedone wi dulo khi nu ma leben wi ma kekhi tsüti nkesütula nondi ben lethu ma ghena tsüti sa cüben.

²⁴Hi ha jjügi ghena nthu kizaden: Nthu na kekhie kesa wi mangwa khie khe tsü muyadha kesa nondilo, isathu nthu na mangwa khie khe tsü muya ben na.

²⁵Nu khathansha wi nthu na shagha kekhie sa khe nthu na meshu kesütanla kemeshensa ben lethu kesami teshi pi cülo, isathu nthu Ba tang wi kebenwa la nthu kesami teshi pi cüben.”

²⁶(Keujüla nthu na nyu kesami teshi pi ncü lethu, nthu Ba tang wi kebenwa la nthu kesami teshi cü nben.)

²⁷Mathu na kheneng Jerusalem wi gho. Jisu na wa Kekinyijjen wi kegoe keten wi keqhaikedi ntsathu, keshenpfüthu, nu Ayenkesansithu na gho

²⁸ma wi keü, “No mangwa kekhang wina hathu ha saben nu? Thowa na kekhang ha pi no cü nu?”

²⁹Jisu na mathu wi khineng, “Hi nthu wi pala kesü keü ten na hi kizalo, isathu hi la mangwa kekhang wina hathu ha saben khe pi nthu kizaben.

³⁰Johan baptism tsüna Anyiza wina la anyi wina gho nu?”

³¹Mathu ketanla mathu jawi keccücanliwa: “Ikhang na khati le khi nu? Keujüla ikhang na ‘Anyiza wina le’ khithu ma isathu ‘Mangkesa na nthu ma n-nondi nu?’ isa khiben.

³²Isala keujüla ikhang na ‘Anyi wina le khithu, ...’ ” (Mathu na anyithu messi, kepaghenanye anyi tsüdila Johan tsüna atusenjüh-kechü kesü le kesa nondi den.)

³³Tsalina mathu na Jisu wi “Ikhang na nchü le” khineng chia. Jisu na mathu wi “Isathu, hi la hi mangwa kekhang wina hathu ha saten khe pi nthu kizaya nben.”