Read Northern Rengma Naga MARK 13 Bible Online

MARK 13 - Northern Rengma Naga bible

MARK 13

¹Jisu na Kekinyijjen teshi nu bvü keten wi ma sansikeyathu kesü na ma wi khi, “Kesansiwa, ghangchilo! Ajjen nu alonthu ha khatila amankesa nu!”

²Jisu na luneng, “No ajjen ha muben ma? Alon kesütanla ma pen wi nbenla, nu tsüdila pasha ben le!”

³Jisu na Kekinyijjen kejentan Oliv Yikha wi donki keben wi Pitor, James, Johan, nu Andria, hathu na gho kuthila ma wi keü,

⁴“Kusi hathu ha saben khe pi ikhang kizalo. Nu hathu ha tsüdi sacen keten wi zensu khati saben nu?”

⁵Jisu na mathu kiza, “Nyu ya nthu nmechu thsüle kesalina kiden-kesha yalo.

⁶Anyi kejonla inyan wina hati khi ghoben, ‘Hi Khrista le’ isanu mathu anyi kejon mechuben.

⁷Nthu na akete wi nu kelensie wi aghikesa nu kekivvü jüh zaya lela leben güccü nsala. Hathu ha atuwa nsathu yishü isala asakhenwa tsüna npi gho.

⁸Diyyithu na khokho ssi kesali; nu kadiyyithu na khokho ssi kaghashen ben. Apen tsüdi wi ameghükuju nu azeng saben. Hathu hana atsakepvügha wi kinaa atuwa ti kesa.

⁹“Isala nthu kiden-kesha yalo, kepaghenanye nyu na nthu ghan sen nu ajühkekaghaten pen wi waben. Sinagogthu wina nthu kiccü; nthu na kekhang kesenthu nu kadimithu tuwi ngan nu ighena Jühtheü Kemehaiwa pi mathu kizaben.

¹⁰Isala asakhenwa tsü npi kegho wina Ajühkemehaiwa ha pi anyi tsüdi wi khichi nsathu yishü.

¹¹Nyu na nthu ghan sen nu ajühkekaghaten pen wi wa lethu, nthu na npi wina mangwa le khitennu kesa leben güccü nsala; isala matsü wina mangwa pi nthu cü khe tsü khilo. Kepaghenanye nthu na khi ketenwa ajüh tsüna nthu jüh nye isala Kemetha Ghamu wina ghoben.

¹²Anyithu na mathu cünyuthu ghan pi nyu kwen wi chi nu shü thsüaben, nu abathu la mathu tsangathu wi tsüti saben. Atsangathu na mathu bajjathu ssi kaghashen nu mathu pi shü thsüaben.

¹³ Ighena nyu tsüdila nthu nanmeghü ben. Isala thowa na kekheneng sen wa asakhen cuya khe ma hangsha yaben.

¹⁴ “Nthu na ‘Qhethiketen Kesawa’ tsüna ma pen nkenye wi ngan keben muben.” (Kesithu na: ha mangwa jjügi khe chüshi yalo!) “Tsaseng wi Judea wi kebenthu tsüdila ayikha wi bvü wa nsathu yishü.

¹⁵Anyi ajjen mili wi kebenwa na matsü dedi sen du ajjen wi atsanqai khuya le nsala.

¹⁶Anyi alli wi kebenwa na kheneng ajjen wi whala ma thsü khuyale nsala.

¹⁷Tsü tsüwi kinyibvü atsa-npvü, nu atsa ssi ketenthu ghena khatila qhethiketen saten nu!

¹⁸Hathu ha pathsü wi nsa thsüle kesalina Anyiza wi kekhie sabenlo.

¹⁹ Kepaghenanye tsü tsüwi ketizenkesa na adechhü Anyiza na ayyi kesachi wina ghola khili kahang kecu wi tsüti npi sa, nu ghaketen wi la tsüti sa neng nben.

²⁰Isala Apvüwa na atsathang tsü sa pi zeng cüdha, keujüla ma tsüti nsa lethu anyi thola hangya nkesa. Ma nyi ma kessiya kesathu ghena atsathang tsü sa pi zeng cüdha.”

²¹“Keujüla anyi kesü na nthu wi ‘Ghangchilo, Messiya na he wi benle,’ nyelela ‘Ghangchilo, ma kawi benle,’ khi lela ma n-nondi lalo.

²²Kepaghenanye milikemesa Messiyathu nu milikemesa atusenjüh-kechüthu na ghoben. Mathu na saya kemehai chu Anyiza na kessi keyathu lela mechu sen bvüale kesalina amankesa nu azensuthu saben.

²³Nthu kiden-kesha yalo! Hi matsü npi wina pala tsüdi pi nthu kizadha.”

²⁴“Ketizenkesa tsathangthu seng wi aghani na jang, asha na nwegüla,

²⁵ ghotsithu na tang wina qanca dugho, nu atssan wi kekhangthu pakuliaben.

²⁶ Tsaseng wi Anyi Tsawa na akulu- keshü miwi na khang ntsawa nu anyankethang sa ghoben.

²⁷Ma tangnyilothu kesun pi ayyi ccügwen mejü wi kesü na wa pahanwa kecu chi nu Anyiza na kessikeya nyithu saghu yaben.

²⁸“Nthu khhaghabvü ton wina chüyalo. Khathansha wi ma cüna wi mawa kaghani na bighi shigü shagha khe mazu wa tendhale kesa nthu na chüyaden.

²⁹Tsü makesü, nthu na pala hathu kuli keben kemu wi matsü na tetsakidha nu ghole kidenyadha kesa chüyalo.

³⁰Anyi nansü hang kebenthu ha tsüdi npi keshü tuwi hathu ha tsüdi saben kesa meshenyalo,

³¹Atssan nu ayyi na nmilaben, isala ijüh tsü nmila sa nben.

³² “Anyi thola tsü tsathang nu matsüwa tsüna khathansha wi ghoben khe nchü. Abawa ketan khe tangnyilothu nu Atsawa lela nchü.

³³Kiden-kesha, meghe-metsa nu hie benlo, kepaghenanye nthu na matsüwa tsüna khathansha wi ghoten khe nchü.

³⁴Tsüna anyi kesü na ma jjen wi kekuli pi ma maghathu dhenchi, kesüsü ma kekuli salo pi cüchi nu ajjen kehiewa wi hieben lalo kiza nu kijünyi wa kesa tsüti saben.

³⁵Kiden-kesha nu hie benlo, kepaghenanye nthu na ajjen pvüwa na kusi ghoten khe nchü. Tsüna minulen, aghaja non, atsantheghi keben nyelela aghani shhugho meyi wi saya mehai.

³⁶Keujüla ma zuli gho lethu, ma nthu na jen keben mu meya thsüla.

³⁷Hi nthu wi kiza keben ha tsüdi wi kiza benle. Hie benlo.”