Read Northern Rengma Naga MARK 15 Bible Online

MARK 15 - Northern Rengma Naga bible

MARK 15

¹Ghanenwa mitu na keqhaikedi ntsathu na kaghajila keshenpfüthu, Ayenkesansithu, nu keshenpfü kemehu maben ssinu keccünengli. Mathu na Jisu bhenya nu ssi wa Pilat kwen wi chicüa.

²Pilat na ma wi keü. “No Judah nyi Kadimiwa tsü kwe?” Jisu na luneng, “No khichidha.”

³Keqhaikedi ntsathu na pala kejon khi pi Jisu kimenni ben,

⁴tsalina Pilat kheneng ma wi keü, “No mathu lunengchi nten kwe? Mathu no kimenni keben jühthu tsü kina chilo!”

⁵Isala Jisu na ajüh kesütanla nkhila, tsalina Pilat na amansa.

⁶Shhukeya Kho tsüwi Pilat na anyithu na ma wi kekhiewa atssüzü kesü lisha chicü keten tsü pi ayen saden.

⁷Tsü tsüwi Barabba na nyu pathi kesalina atssüzüjjen wi anyi nkemehaithu gweghe ben.

⁸Anyitenti na saghuya nu Pilat na kheni sa kegho ti mathu kenenwa tsü sa cülo khie.

⁹Ma mathu wi keü, “Hi nthu ghena Judah nyi Kadimiwa tsü lishachi thsü mvuben ma?”

¹⁰Kepaghenanye ma keqhaikedi ntsathu na anyonkisa wina Jisu ghan pi ma kwen wi chitheng kesa chütha ben.

¹¹Isala keqhaikedi ntsathu na anyithu kechüchi pi Pilat ya mathu ghena Barabba lisha chicülo kesa khie thsü.

¹²Pilat na anyitenti wi keü neng, “Isathu hi anyi kesü nthu na pi Judah nyi Kadimiwa le ci ketenwa tsü pi khati sa thsü mvuben nu?”

¹³Mathu na jisha nu “Ma pi kross miwi jenlo,” isa khi.

¹⁴Pilat na “Isala ma mangwa sazzi theng nu? isa keü. Mathu na tsü miwi misiki magha nu “Ma pi kross miwi jenlo,” khi.

¹⁵Pilat na anyitenti kenenwa sa mvu kesalina mathu ghena Barabba lisha chicüa. Tsaseng wi ma Jisu kihhe cü nu ma pi kross miwi jenlo kesa khuchia.

¹⁶Süpahithu na Jisu ssinu ahng jjen ccühha wi du nu süpahi khang kepathu tsüdi cighu chi.

¹⁷Mathu na athsü kenmie pi Jisu pvü thsü nu aghazüthu pi aliwen sa pi ma li wen cü.

¹⁸Tsaseng wi mathu na ma shalom sa nu “Judah nyi Kadimiwa kesie kahangwa salo,” isa khi.

¹⁹Mathu akhhatssü pi ma li wi kihhe, ma meshuki, nu ma tuwi akhhutsüdu.

²⁰Mathu na ma kekimenni tsü sacen theng nu ma gwo wi athsü kenmie tsü khusha nu ma thsü pi ma pvü neng thsüa. Isanu mathu na ma ssinu kross miwi jenle bvüa.

²¹ Mathu na alenca wi anyi kesü diyyi kepa wina anyunutiwa wi gho keten ma nyan Simon tsü metuya, nu süpahithu na ma meten pi Jisu kross pvü thsü. (Simon na Kuren wina kegho ma Alexander nu Rufu manyi ba.)

²²Mathu na Jisu ssinu apen kesü Golgatha, ma jjügi “Aligü pen,” kesa wi tsü wa.

²³Mathu ciwi kisengtssü mirr pi kesaghu pi ma jjü thsüle sa, isala Jisu na tsü jjü meyala.

²⁴ Tsaseng wi mathu na ma pi kross miwi jen nu ma thsü pi thothu ji saten khe mathu jawi akezen sa nu pi gishüya.

²⁵Aghanen amighe tugu kekihhe jüwi tsü mathu na ma pi kross miwi jen.

²⁶Ma kekimenni jüh na hati: “Judah nyi Kadimiwa.”

²⁷Mathu na kaghanfü nyi meshu keni pi Jisu gweghe kesü pi ajewa nu kepawa pi tavüwa jen.

²⁸ Hatinu ntsawajüh na khi kebenwa tsü sacenya, “Ma pi kesami nyithu gweghe ketizen sa thsüdha.”

²⁹ Anyi ciwi wa ketenthu na mathu li kejen pi hoholo Jisu nankeqhe nu khi, “Aha! No Kekinyijjenwa tsü yasa nu ghanan kecheng jü tsü sa neng tendha man!

³⁰Khili no ketanla no hangshaya nu kross miwi na dugholo.”

³¹Tsü makesü keqhaikedi ntsathu nu Ayenkesansithu la Jisu nankeqhe nu khokho wi khi, “Ma nyu kepa wi hangsha yaben, isala ma ketanla ma hangsha meya le!

³²Ikhang na khili Messiya, Israel kadimiwa na kross miwi na kedugho ghangchi na, isathu ikhang na ma nondi yaben.” Nu pila Jisu gweghe kross miwi jen ketheng keni la ma kimenni.

³³Amighe taghakeni na wa kecheng kekihhe kecu diyyiwa tsü mabenla jang.

³⁴ Amighe kecheng kekihhe wi Jisu na misi ntsa maghachi, “Eloi. Eloi, lema sabachthani?” ma jjügi, “INyiza, iNyiza, no mangkesa hi teshidha nu?”

³⁵Ciwi ngan kebenthu anyi pahan na tsü zaya nu khi, “Kinachilo, ma Elijah ciben le!”

³⁶ Mathu meshu kesü na bvü wa akhishu ti kesa pi kisengtssü wi ten sengho achan kesü wi bhenki pi Jisu jjü thsü nu khi, “Hie ben lalo! Elijah na gho kross miwi ma pieshaya tenla nye khe ithu na ghangchi na!”

³⁷Jisu na ahhai misi ntsa maghachi nu shü wa.

³⁸ Kekinyijjen wi ajenka keshonthsü tsü ma li na cü ma ccü kecu mezüqhe pi keni sa.

³⁹Süpahi meza miwi kediwa na ciwi ngan nu ghang keben wi ma Jisu na khati shü khe tsü muya theng nu khi, “Ntsakhiwa anyi hawa ha Anyiza Tsawa le!”

⁴⁰ Nzathu pahan na temeja wi ben nu ghang ben. Mathu jawi Magdalen Maria, James ghanyiwa nu Josef manyi jja Maria, nu Salome hathu na ben.

⁴¹Mathu Jisu na Galilee wi keben wi ma nie wa nu ma kiqa cü. Nu nza Jerusalem wina ma nie keshhughothu kejonla ciwi ben.

⁴²Minulen wi Josef Arimatheya nyi tsüna gho. Ma keshenpfü kemehu wi nyu ma nyuwakü keten nyi kesü, ma Anyiza Kadiyyi kegho tsü hie ben. Tsüna Kekiden tsathang (tsüna Sabbath tsathang tuwi,) tsalina Josef na kempvüza sala Pilat tuwi wala Jisu kamang tsü khie.

⁴³

⁴⁴Pilat na Jisu shüdha le kesa zakeya wi amansa. Ma süpahi kediwa cichi nu Jisu keshü matsü kesie sadhala khatinu keü.

⁴⁵Ma süpahi kediwa wi Jisu na shüdha le kesa zakeya wi Josef yala akamang tsü pieshaya thsüa.

⁴⁶Josef na linenthsü kesü sengho akamang tsü piesha pi mejuya nu pie wa ma alonshi wi ho ketheng ashüjjen kesü non wi tsü chia. Tsaseng wi ma alon keti kesü kulu pi ashüjjen jenka tsü khen.

⁴⁷Magdalen Maria, nu Josef jja Maria manyi na ghang ben nu Jisu kamang pi khiewa vhütheng khe tsü mu.