Read Northern Rengma Naga MARK 16 Bible Online

MARK 16 - Northern Rengma Naga bible

MARK 16

¹Sabbath tsathang kecen seng wi Magdalen Maria, James jja Maria, nu Salome hathu na handemvu sen wa Jisu kamang nyen cüle sa.

²Apvüwa tsathang wi aghani shhugho meyi mathu na ashüjjen wi wa.

³Alenca wi mathu na khokho wi khi, “Thowa na ikhang ghena ashüjjen wi alon tsü kulupheghe thsüa nu?” (Tsüna alon keti kesü.) Isanu mathu na wa ghangchi nan alon tsü kulupheghe kethengla muya.

⁵Tsalina mathu na ashüjjen wi wha nan anyi pvünyi kesü na athsümeni kemiki pvünu ajewa donki keben muya nu mathu na amansa.

⁶Ma mathu wi khi, “Nmessi lalo, hi nthu na Nazareth nyiwa Jisu pi kross miwi jen kesawa tsü bhaden kesa chüben. Ma he wi nmi, ma hangneng-shaghadha le! Ghala he wi mathu na ma pi kechi pen wi ghangchi nanlo!

⁷ Wala ketsijüh ha pi sansikeyathu nu Pitor la kizalo: ‘Ma nthu wi kekiza ti nthu tuwi na Galilee wi waden, nthu ciwi ma muyaben.’ ”

⁸Mathu ashüjjen wina bvü wa mathu messi nu qhethiketen sa. Mathu messi ntsa sa kesalina tsü khi pi thola nkiza. [

⁹Apvüwa tsathang wi ghanen mitu Jisu na hangneng-keshagha seng wi ma kheni ma gwo wi atsaghangthu tagü jügüshi kesawa Magdalen Maria yala ma muya thsü.

¹⁰Ma wala Jisu pvüshangthu na ahathana nu qai kebenthu tsü kiza.

¹¹Isala mathu na Maria na Jisu hang benle nu ma Jisu muya le kekhi tsü n-nondi.

¹²Haseng wi Jisu na matsi makepa sala meshu keni diyyiwa wi wa keten alenca wi ma muya thsü.

¹³Manyi na kheneng gho kepathu wi kiza, Isala mathu na tsü la n-nondi.

¹⁴Asakhenwa, Jisu na sansikeyathu Taghakhen yala mathu dsajjü keben wi ma muya thsü. Ma mathu kha kepaghenanye mathu na ma hangneng-keshagha seng wi ma mukeyathu jüh tsü n-nondi nu leben-dhu.

¹⁵ Ma mathu wi khi, “Ayyi maben wi wa nu ajühkemehaiwa pi ayyi nyi tsüdila sansilo.

¹⁶Thowa na nondi nu baptaiz saya khe ma hangsha yaben, thowa na n-nondi khe pi shü thsüaben.

¹⁷Kenondithu amankesa kuliya kemehai kekhang pi cüden: mathu na inyan wina atsaghangthu jügüshi; mathu na ajüh ketheü khi;

¹⁸keujüla mathu na amaghangthu zankiya nyelela aji jjüya lela mangla sa nben; mathu kwen chang pi kesakinaathu miwi chithu tsüthu na mehai yaben.”

¹⁹ Apvüwa Jisu na mathu ssinu keccüneng seng wi tang wi ma ssiki nu Anyiza kwen ajewa donkiwa.

²⁰Sansikeyathu na apen tsüdi wi wa nyu sansi, nu Apvüwa na mathu ssinu kuli nu mathu jüh tsüna atsentsa le kesa amankesathu kuli.] [ KAGHAWEN SAKHEN KEPA KESÜ [6] Nzathu na Pitor nu ma pvüshangthu wi wa nu pi mathu kekiza cüki tsüdi khi pi mathu kiza. Haseng wi Jisu na kemetha nu anuphan hangben keten hangshakeya ketsijüh ghena ma sansikeyathu kesunshi pi nishu na wa nidu tsüdi wi chia.]