Read Northern Rengma Naga MARK 2 Bible Online

MARK 2 - Northern Rengma Naga bible

MARK 2

¹Ghanan keu seng wi Jisu na Kapernaum wi wa neng, nu ma ajjen wi benle kesa nyu na khi wa.

²Tsalina ciwi anyi ji ntsa na gho saghuya nu ajenka wi lela apen nmila. Jisu na ajühkemehaiwa pi mathu khisansi.

³Ciwi meshu mejü na kecügüshü kesü pienu Jisu wi gho.

⁴Isala anyitenti ghena mathu anyi tsüwa pienu Jisu wi du meyala. Tsalina mathu ajjenmili wi ki Jisu kejentan wi aku bhiya nu mathu kecügüshüwa tsü pi ma we miwi na ciwi du thsü.

⁵Jisu na mathu kenondi tsü mukeya wi ma kecügüshüwa wi, “Itsawa, no kesami teshi cüdha,” isakhi.

⁶Ayenkesansithu pahan na ciwi donki keben mathu leben wi hati meshen,

⁷“Anyi hawa ha mangkesa na hati khiben nu? Ma Anyiza kethenjüh khiben. Anyiza ketan khe thowa na nyu kesami teshi pi cüya mehai nu?”

⁸Jisu na mathu leben wi meshen keben tsü chüya nu mathu wi, “Mangkesa na nthu leben wi pala hati kesa meshen ten nu? khi.

⁹Anyi kecügüshüwa wi, ‘No kesami teshi pi cüdhale,’ kekhi wala ‘Shaghala nwekeshiphi pieya nu alentsen walo,’ manyi khawa le nu?

¹⁰Isathu, hi Anyi Tsawa na ayyi wi kesami teshi pi cüya kemehai kekhang benle kesa nthu ya chüya thsüden.” Tsalina ma anyi kecügüshüwa wi kiza,

¹¹“Hi no kizaben, shagha nwekeshiphi pieya nu ajjen wi whalo!”

¹²Tsümeyi mathu tsüdi tuwi na anyi tsüwa na shagha ma wekeshiphi pieya nu bvüa. Tsalina mathu tsüdi amansa ntsa nu hati khi nu Anyiza seng: “Ithu na khie wi la pala hati kesa npi mule!”

¹³Jisu na kheneng Galilee Ghajü ghüsa wi wa. Anyitenti kesü na gho ma vüla saghuya nu ma mathu zhüsansi.

¹⁴Ma wa keten wi khajana kekhüwa Alfia tsa Levi na ma kekuli jjen wi donki keben muya. Jisu na ma wi khi, “Hi nie ghalo.” Levi na shagha ma nie wa.

¹⁵Jisu na wala Levi jjen wi dsajjü keben wi khajana kekhüthu nu kesami nyithu kejon la ma nu ma sansikeyathu gweghe donkiben, kepaghenanye anyi kejon la ma nie keten ghena.

¹⁶Ayenkesansithu pahan, tsüthu na Farisithu, Jisu na wala kesami nyithu nu khajana kekhüthu gweghe dsajjü keben muya nu ma sansikeyathu wi keü, “Mangkesa na ma anyi hati kesathu gweghe dsajjü ben nu?”

¹⁷Jisu na mathu jüh tsü zaya nu luneng, “Anyi kesakinaathu khe mehai kebenthu na dawa kechüwa nsen la mehai. Hi anyi kesamithu khe ketsatanthu ciyale nghole.”

¹⁸Matsü kesü wi Johan Baptizwa sansikeyathu nu Farisithu na ziben. Anyi pahan na Jisu wi gho nu ma wi keü, “Johan Baptizwa sansikeyathu nu Farisi sansikeyathu na zi lela mangkesa na no sansikeyathu na zi nten nu?”

¹⁹Jisu na mathu wi khineng, “Keshanyi kemishu wi akejjenthu na shanyiwa mathu gweghe keben wi ndsajjüla ben thsüya mehai kwe? Shanyiwa na mathu gweghe keben chu mathu ziya nben.

²⁰Matsü na ghoben le, mathu jawi na shanyiwa ssi bvü lethu tsü ghanan wi ccüna mathu ziben.

²¹“Thola athsü ketheü kesü pi athsü kaghawen miwi khhwenki nten. Keujüla ma tsüti sa lethu, athsü ketheüwa tsüna zanghu nu kaghawenwa pahan mezüqhe sen bvü nu kheni miwi ma ku di kayi shaben.

²²Nyelela thola kisengtssü ketheü pi akhüti kaghawen wi chi nten. Keujüla tsüti sa lethu, kisengtssü tsüna akhüti bvükhhiaben, nu kisengtssü nu akhüti la yasa shaben. Tsüti kesawa nye, kisengtssü ketheü tsü pi akhüti ketheü wi nchithu yishü.”

²³ Sabbath tsathang kesü wi Jisu na awhengsu lli pahan pvüdhi wa. Sansikeyathu na ma gweghe kewalen sala mathu asu bi dsale mahang.

²⁴Tsalina Farisithu na Jisu wi khi, “Ghangchilo, no sansikeyathu na Sabbath tsathang yenwa tsü pakhhi ben le!”

²⁵Jisu na luneng, “David nu ma nyithu na ghama keya wi nu pala pahan ndsathu keyishü tsü wi ma khati sa khe nthu na khiela si meya kwe?

²⁶ Ma Anyiza jjen wi du nu amesa pi Anyiza kekinyiwa tsü khu pi dsa. Hawa ha Abiathar na Keqhaikedi Kemisiwa sa keben tsüwi sa. Ithu Yenwa kenie wina keqhaikedithu ketan amesa tsü dsaden — isala David na tsü dsa nu tsü pi ma nyithu la cü.”

²⁷Nu Jisu na khi, “Anyi ghena Sabbath tsathang sachi khe Sabbath tsathang ghena anyi nsachi.

²⁸Tsalina Anyi Tsawa tsüna Sabbath Pvüwa la le.”