Read Northern Rengma Naga MARK 3 Bible Online

MARK 3 - Northern Rengma Naga bible

MARK 3

¹Tsaseng wi Jisu na kheneng Sinagog wi du nan ciwi akwen kecügüshü nyi kesü ben.

²Anyi pahan na ciwi Jisu na Sabbath tsathang wi nyu sa pi mehai cüthu ma kimenni cüle kesalina hieben.

³Jisu na kecügüshüwa wi, “Shagha nu he atuwi gholo,” kizachi.

⁴Tsaseng wi ma anyithu wi keü, “Sabbath tsathang wi pala kemehai kulila nkemehai kuli nu? kahangli kesü hangshayala pathi kesa ayen ben nu?” Isala mathu na mangla nkhila.

⁵Jisu na ma leben minu nu mathu ghang kevüli, isala ma mathu ghena hathana, kepaghenanye mathu na leben-dhu nu sazziben. Tsaseng wi ma anyi tsüwa wi khi, “Nkwen changchilo.” Anyi tsüwa na ma kwen changchi nan tsüna mehai nengya.

⁶Farisithu na Sinagog teshi nu bvüa nu wala Herod nyithu pahan ssinu mathu Jisu pathiale kesa acho sa.

⁷Jisu nu ma sansikeyathu na Galilee Ghajü ghüsa wi wa nu anyitenti keti na ma nieden. Mathu na Galilee, Judea,

⁸Jerusalem, Idumia yyi, nu Jordan yyi khhakawa, Tur nu Sidon nyunutithu kevü wina gho. Anyi hathu tsüdila Jisu kekuli cüki zaya nu ma wi gho.

⁹Anyitenti na di ntsa sa nu nyu na ma cütenthu keyishü ghena Jisu ma sansikeyathu wi ma ghena ahun kesü kiden cülo kiza.

¹⁰Ma anyi kejon sa pi mehai kecü ghena kesakinaathu tsüdila ma kidhenyale ma wiwa kekheli waben.

¹¹Nu anyi nkemehai ghamu ssi ketenthu na ma mukeya wi mathu ma tuwi khulidu magha nu, “No Anyiza Tsawa le!” khi.

¹²Jisu na nkemehai ghamuthu satekü nu ma cüki khi pi thola nkiza lalo kesa kiza.

¹³Tsaseng wi Jisu na ayikha kesü miwi kiya nu anyi ma nie ketenthu ci pi ma wi chiya. Mathu na ma wi gho,

¹⁴nu ma meshu Taghakeni kessiya nu mathu nyan pi Apostel ciya. Ma mathu wi kiza, “Hi nthu pi hi gweghe ben thsü, nu kesun pi ajühkemehaiwa la khi wa thsü,

¹⁵nu nthu na atsaghangthu jügüya kemehai kekhang benya thsüle kesalina hi nthu kessiyadha.”

¹⁶Hathu na ma kessikeya Taghakeni: Simon (Jisu na ma pi Pitor le ci kesawa);

¹⁷Zebedee tsa keni James nu Johan (Jisu na manyi nyan pi Boanerges ma jjügi “Atsankeshigü Nyithu”) ci;

¹⁸Andria, Filip, Bartholoma, Mathi, Thoma, Alfia tsa James, Thaddaya, Kanaan nyiwa Simon,

¹⁹nu Jisu kematsawa Iskariot Judah.

²⁰Tsaseng wi Jisu na ajjen wi wha neng. Kheneng anyitenti keti kesü na saghuya kesalina mathu na kedsajjü tsü nmu.

²¹Anyithu na, “Ma deja wadha le,” kekhi ghena ma theghithu na tsü za keya wi ma nonccayale wa.

²² Jerusalem wina kegho Ayenkesansithu pahan na hati khiben, “Beelzebul ma wi benle! Atsaghang kediwa na kekhang pi ma cü nu ma tsüghena mathu jügüshiya ben.”

²³Tsalina Jisu na mathu ci pi ma wi chi nu ajühkaghape khi pi mathu kiza, “Khati nu Satan na Satan jügüshiya mehai nu?

²⁴Keujüla diyyi kesü na gishü zighe pi aghisa ben lethu, diyyi tsüwa tsüna nganya nben.

²⁵Keujüla atheghi kesü na gishü zighe pi aghisa lethu, atheghi tsüwa tsüna qancaaben.

²⁶Tsalina keujüla Satan diyyiwa tsüna gishü zighe lethu, tsüna nganya nben isala qanca, nu asakhen saaben.

²⁷“Thola anyi kezü kesü jjen wi dula ma tsanqaithu khusen bvüya nben, isala ma atuwa sa anyi kezüwa tsü bhenya lethu ma wa ma jjen tsü yasaya mehai.

²⁸“Hi atsentsa nthu kizaden, anyithu kesamithu nu mathu na nkemehai kekhithu tsüdila teshi pi cüya mehai.

²⁹ Isala thowa na nkemehai khi pi Kemetha Ghamu shun khe khiela kesami teshi pi cüya nben, kepaghenanye ma anuphan kesami tsü sadha.”

³⁰(Jisu na ha kekhi ha anyi pahan na “Ma nkemehai ghamu kesü ssiten le” kekhi ghena.)

³¹Tsaseng wi Jisu jja nu ma cünyuthu na gho akhemi wi ngan nu wa ma cichilo kesa nyu kesunchi.

³²Anyitenti na Jisu vüla donkiben, nu mathu na ma wi, “Ghangchilo, njja, ncünyu nu ntssüggüthu na akhemi wi ben, mathu na no ciben.”

³³Jisu na luneng, “Thowa na ijja, nu icünyuthu nu?”

³⁴Ma anyi ma vüla donki kebenthu ghang nu khi, “Ghangchilo, hathu hana ijja nu icünyuthu le!

³⁵Anyi thowa na Anyiza na ma ya sa thsü mvu keben tsü saten khe tsüna icünyu, itssüggü, nu ijja le!”