Read Northern Rengma Naga MARK 7 Bible Online

MARK 7 - Northern Rengma Naga bible

MARK 7

¹Farisithu nu Ayenkesansithu pahan na Jerusalem wina dugho Jisu vüla saghuya.

²Mathu na ma sansikeyathu pahan na mathu kwen nkemetha pi dsajjü keben mu — tsüna mathu na akwen nkemetsi.

³(Kepaghenanye Farisithu nu Judah nyi tsüdila mathu bamyithu kesansijüh tsü nieden: mathu na akwen mehaitsü nkemetsi tsü dsajjü nten,

⁴nu mathu na ayela wi senkegho katsüha lela atuwa npi satekemetha tsü dsa nten.[4] Kepa wi lela mathu bamyithu kesansijüh kejon nieden; tsüna ahyi, apfü, lezzapfü, keqho nu awethu kebhu yenthu.)

⁵Tsalina Farisithu nu Ayenkesansithu na Jisu wi keü, “Mangkesa na no sansikeyathu na abamyithu kesansijüh tsü n-niela mathu kwen nkemetha pi dsajjüten nu?”

⁶Jisu na mathu wi khineng, “Isa na nthu ghena atusenjüh-kekhi tsüna khatila meshon nu! Nthu nkenyeghe- kesathu, ma hati zhütheng: ‘Anyi hathu hana mathu pang wi hi nyuwakü, isala mathu leben wi hi ssi temejaden.

⁷ Mathu hi kekinyi tsüna kaghacang, kepaghenanye mathu na anyi ayen sa kechi tsü pi Anyiza yen ti pi nyu sansiden.’

⁸“Nthu na Anyiza yenkhukechi tsü teshi nu anyi kesansijüh tsü nie waden.”

⁹Jisu na khi, “Nthu na Anyiza yenkhukechi tsü teshi nu nthu kesansijüh tsü niele kesalina acho mehaiben.

¹⁰ Kepaghenanye Mosa kekhi na, ‘Nba nu njja kinyikü yalo’, nu ‘Thowa na ma ba ma jja kishencü khe pi shü thsülo.’

¹¹Isala nthu na anyi kesü pala pahan pi ma ba nyelela ma jja kiqaya kesa tsü pi ‘Hawa ha Korban le’ (ma jjügi ha Anyiza ji sadha) khiden,

¹²isanu ma yala ma ba nyelela ma jja ghena mangla nkulichi thsü laden.

¹³Tsüti nu nthu kesansijüh tsüna nyu sa pi Anyiza jühwa tsü ghü bvü thsüden. Nu kepa wi la hati kesa kejonla saden.”

¹⁴Jisu na kheneng anyithu ci pi ma wi chi nu khi, “Nthu tsüdila ijüh kina nu chüyalo.

¹⁵Ciwi pala mangla amei wina anyi non wi dula ma sa pi nmetha thsü la kesa nmi; isala anyi non wina keshhugho tsüna ma sa pi nmetha thsü saden.”

¹⁶(Nthu akhuna pvüten lethu, kinayalo.)

¹⁷Ma anyitenti teshi nu ajjen wi kedu seng wi ma sansikeyathu na gho ajühkaghape tsü ma jjügi khi pi mathu kizalo ma wi keü.

¹⁸Jisu na mathu wi, “Nthu la tsü chüshi meya kwe? Pala mangla amei wina anyi non wi dula ma sa pi nmetha thsüla nten,

¹⁹kepaghenanye tsüna ma leben wi nyela ma pvü wi du nu kheneng amei wi shhuden.” (Jisu hati kekhi wina atsse tsüdila methale khi.)

²⁰Ma kekhi na, “Pala anyi non wina keshhugho tsüna ma sa pi nmetha thsü laden,

²¹kepaghenanye anyi non wina nu aleben wina keshhugho tsüna nkemehai kemeshen na ma ssi wa shepfü-nyibvü keqheza, kaghanfü, nyu kepathi,

²²keqheza, apvükemene, pala nkemehai, kemechu, nkemehai wi kahang, anyonghokepvü, milikemesa, kekapvü, nu kejüphon—

²³hathu ha tsüdi anyi non wina shhugho ma sa pi nmetha thsü laden.”

²⁴Tsaseng wi Jisu na apen tsü teshi theng nu ayyi Tur nyunuti ketsaki wi tsü wa. Ma ajjen kesü wi du nu nyu ya ma ciwi keben nchü thsü mvu sa, isala ma kuthi meyala.

²⁵Kenyibvü kesü ma nga na nkemehai ghamu ssi keten Jisu cüki zaya nu ghola ma ccü wi kukedu.

²⁶Kenyibvü tsüna Siriya wi Foenikia yyi wi kepvügha Grik nyi kesü. Ma Jisu wi keshikenen nu ma nga miwi atsaghang tsü jügüshi cülo khie.

²⁷Jisu ma wi khineng, “Ghanyithu ya atuwa sa dsajjüya thsüa na, kepaghenanye ghanyithu nün tsü khuya nu pi affüthu tuwi cüchi cü kesa tsüna nmeshon.”

²⁸Isala nzawa na ma wi khineng, “Anle, Apvüwa, isala affüthu lela ghanyithu na pi miz cakhu wi keqancathu tsü dsaten le!”

²⁹Tsalina Jisu na ma wi kiza, “No tsüti kekhi ghena ajjen wi whalo, atsaghang na n-nga teshi nu bvü kesa muya ben na.”

³⁰Tsalina ma ajjen wi wha nan ma nga na jen benla, nu ntsakhiwa atsaghang na ma teshi nu bvü benla.

³¹Jisu na Tur ketekevü tsü teshi nu Sidon len wiwa na Anyuti Tagha yyi tsü pvüdhi sen nu Galilee Ghajü wi wa.

³²Anyi pahan na anyi akhuna ketecu nu ajüh mehaitsü khi nkeya ssinu Jisu wi gho nu mathu ma ya akwen chang pi anyi tsüwa miwi chilo kesa ma wi khie.

³³Tsalina Jisu na anyithu jawi na anyi tsüwa ssi wa makepa saya nu ma kwenzza pi anyi tsüwa khuna wi chi, ma meceng meshhusha chi, nu ma mili pachi.

³⁴Tsaseng wi Jisu na tang wi ghang, nu misikhhali ghadhi nu anyi tsüwa wi khi, “Effatha,” ma jjügi “Sha yalo!”

³⁵Tsümeyi anyi tsüwa khuna na pala zaya, ma mili mehaiya nu lekete ajühkhiya.

³⁶Tsaseng wi Jisu na anyithu wi ha pi thola nkiza lalo kiza ntsa sachi; isala ma khaju tughu tsüti nsa lalo kiza khe mathu na anonghe ntsa nu khi pi nyu kiza pfüpfü wa.

³⁷Tsü zakeyathu tsüdila amansa nu khi, “Ma pala tsüdila kuli pi mehai cüdha! Ma akhuna ketecu lela sa pi zaya thsü, nu ajühkhi nkeya lela sa pi ajühkhiya thsüdha!”