Read Northern Rengma Naga MARK 8 Bible Online

MARK 8 - Northern Rengma Naga bible

MARK 8

¹Tsaseng wi anyitenti kesü na gho saghuya. Anyithu na kedsakejjü nmila kesa wi Jisu na ma sansikeyathu cichi nu mathu kiza,

²“Hi anyi hathu ghena leben güccüben, kepaghenanye mathu ghanan kecheng hi gweghe bendha nu mathu khili kedsakejjü mangla nmiladha.

³Keujüla hi mathu ya ndsa njjüla kesun pi ajjen wi wha thsü lethu mathu na alenca wi picathi shüaben, kepaghenanye mathu pahan na alen kesie wina ghoben.”

⁴Ma sansikeyathu na ma wi khineng, “He wi ayyikeshü wi thowa na anyi hathu tsüdi ghanjaya kemehai kedsakejjü muyaben nu?”

⁵Jisu na mathu wi keü, “Nthu amesa be khaju ben nu?” Mathu na “Abe tagü ben le,” khineng.

⁶Ma anyithu na ayyi wi donkiyalo khichi. Tsaseng wi ma amesa be tagü tsü khuya, Anyiza wi kesawegü khie nu pakhhiya, nu pi anyithu gishü cülo kesa pi ma sansikeyathu cü. Sansikeyathu na tsü pi anyitenti tsü gishü cüa.

⁷Mathu na anga kizzakiki la keu ben. Jisu na tsü ghena kesawegü khiechi nu sansikeyathu na tsü la pi anyithu gishü cülo kiza.

⁸Anyi tsüdila dsa pi anonkwen ntsa saya— ciwi anyi hazar mejü-u na ben. Tsaseng wi sansikeyathu na kedsatu ashijü tagü saghuya. Jisu na anyithu kesun pi bvü thsü,

¹⁰meyi ma sansikeyathu gweghe ahun kesü wi duya nu Dalmanutha yyi wi wa.

¹¹ Farisithu pahan na gho Jisu ssinu ajüh keccücanli. Mathu na ma ghan nan le kesalina tang wi amankesa kesü sachilo khie.

¹² Isala Jisu na misikhhali ghadhi chi nu khi, “Mangkesa na khija-ghashenen nyi ha amankesa ketan ghang ten nu? Hi atsentsa nthu kizaden, amankesa pi khija-ghashenen nyi ha ccüca nben le!”

¹³Ma mathu teshi nu ahun kesü wi du neng nu aghajü khhakawa wi wa.

¹⁴Sansikeyathu na amesa kedsa qo pvüya mali nu mathu na ahun non wi amesa be kesütan ben.

¹⁵ Jisu na mathu kitsanchi, “Meghe-metsa yalo, Farisithu nu Herod zimi ghena kiden-kesha yalo!”

¹⁶Sansikeyathu na mathu jawi hati keccünengli wa, “Ikhang amesa nkemi ghena ma hati khiben le!”

¹⁷Jisu na mathu mangwa khiben khe tsü chüya nu mathu wi keü, “Nthu mangkesa na amesa nkemi jjügi tsü khiben nu? Nthu khilila chü meya nyelela meshen meya kwe? Nthu leben na jeng ntsa sadha kwe?

¹⁸ Nthu anyon pvü tenthu nmu kwe? Nthu akhuna pvü tenthu nza kwe? Nu nthu meshenshi meya kwe,

¹⁹hi anyi hazar manga ghena amesa be manga pakhhi pi gishü kecü tsü? Nthu na kedsatu ashijü khaju saghuya nu? Mathu na “Ashijü taghakeni le,” khinengchi.

²⁰Jisu na keü, “Nu hi anyi hazar mejü ghena amesa be tagü pakhhi pi gishü kecü tsü, nthu na kedsatu ashijü khaju saghuya nu?” Mathu na “Ashijü tagü le,” khinengchi.

²¹Ma mathu wi keü, “Nthu na khilila tsü chüshi meya kwe?”

²²Mathu na Bethsaida wi ghoya, ciwi anyi pahan na anyon nkemu kesü ssinu Jisu wi gho nu ma anyi tsüwa kidhenchi cülo kesa khie.

²³Jisu na anyon nkemuwa kwen zanya nu ssinu anyu na ameiwa shhu. Jisu na ma meceng meshhusha pi anyi tsüwa nyon wi chi nu ma kwen chang pi ma miwi chi nu keü, “No mangla mula nmu nu?”

²⁴Anyi tsüwa na yaki ghang nu khi, “Anle, hi anyithu na kegoe keten muben, isala mathu mu pi achanton na alentsen keten ti le!”

²⁵Jisu na kheneng ma kwen chang pi anyi tsüwa miwi chi. Khilitsü anyi tsüna mehaitsü ghangchi nan ma nyon na mehai nengya nu mehaitsü mushiya.

²⁶Tsaseng wi Jisu na anyi tsüwa wi “Anyu tsüwa wi nwha neng lalo,” khi nu kesun pi kepathu gweghe ajjen wi wha thsüa.

²⁷Tsaseng wi Jisu nu ma sansikeyathu na Kaesarea Filippi kete anyuthu wi wa. Ma alenca wi mathu wi keü, “Anyithu na hi pi thowa le khiten khe hi kizalo.”

²⁸ Mathu na luneng, “Pahan na no Johan Baptizwa le khi; kepa na no Elijah le khi; nu kepathu na no atusenjüh-kechüthu kesü le khiden.”

²⁹ Ma mathu wi keü, “Isathu, nthu tsü hi pi thowa le saten nu?” Pitor na luneng, “No Messiya le!”

³⁰Tsaseng wi Jisu na mathu wi “Icüki pi thola nkiza lalo,” kiza ntsa sachi.

³¹Tsaseng wi Jisu na ma sansikeyathu sansi nu khi: “Anyi Tsawa na ketizen sa ntsa nu keshenpfüthu, keqhaikedi ntsathu, nu Ayenkesansithu na ma meya mvula saben. Ma pi shü thsüaben, isala ma ghanan kecheng seng wi hangneng-shagha ben.”

³²Ma ha mehaitsü khi pi mathu kiza. Tsalina Pitor na ma ssi wa ma kha.

³³Isala Jisu na kheneng wa ma sansikeyathu ghangchi, ma Pitor satekü nu khi, “He wina bvülo, Satan, kepaghenanye no kemeshen tsüna Anyiza wina nyela anyi wina kegho le!”

³⁴ Tsaseng wi Jisu na anyitenti nu ma sansikeyathu ci pi ma wi chi nu mathu kiza, “Keujüla anyi kesü le kesü lela hi gweghe gha mvu lethu ma ketanla ma mali nu atsathangla ma kross pvüya nu hi nie n-ghathu yishü.

³⁵ Anyi thowa na ma kahang tepagha ten khe dediaben, isala thowa na ighena nu ajühkemehaiwa ghena ma kahangli khuchi ten khe tsü mu neng yaben.

³⁶Kepaghenanye anyi kesü na ayyi keben tsüdi pi ma ji saya lela ma kahangli dedi lethu ma mangwa kekiyi muya ben nu? Mangla kekiyi nmi le!

³⁷Ciwi mangla pi anyi kesü kahangli mithon saya nben.

³⁸Keujüla anyi kesü le kesü lela ighena nu ajühkemehaiwa ghena keqheza nu kesami nyithu shüsha tuwi jüghe lethu Anyi Tsawa na tangnyilo kemethathu ssinu Abawa nyankethang sa kegho wi anyi tsüwa cüki la pi khi jüghe waben.”