Read Northern Rengma Naga MARK 9 Bible Online

MARK 9 - Northern Rengma Naga bible

MARK 9

¹Ma mathu wi khi, “Hi atsentsa nthu kizaden, anyi he wi kebenthu pahan na Anyiza Kadiyyi kekhang sa kegho npi kemu chu shü nben le!”

² Ghanan tugho seng wi Jisu na Pitor, James, nu Johan ma kecheng ssinu mathu gweghe ayikha kemisi kesü wi wa nu mathu ghang keben wi Jisu na ma tsi kepa sa.

³Ma thsümeni na miki pi cwencwe sa nu ayyi wi anyi thola ghasü pi tsüti miki nkeya ji sa.

⁴Ciwi sansikeyathu na Elijah nu Mosa manyi na gho Jisu ssinu ccüneng keben mu.

⁵Pitor na Jisu wi khi, “Kesansiwa, ikhang he wi keben hana mehai ntsawa le! Ikhang na nithsüjjen kecheng: kesü nghena, kesü Mosa ghena, nu kesü Elijah ghena tsüti sa na.”

⁶Ma nu kepathu na messi ntsa sa kesalina ma mangwa kekhiu khe nchü la.

⁷ Tsaseng wi akulukeshü na gho mathu kejibhonya nu ahhai kesü na, “Hawa ha hi kaghaliwa itsa — ma jühkinalo!”

⁸Tsümeyi mathu na ghang kevüli chi nan Jisu ketan khe thola mathu gweghe keben mu meya.

⁹Isanu mathu na ayikha wina dugho nu Jisu na mathu kiza ntsa sachi, “Nthu na mangwa muyadha khe Anyi Tsawa na keshü wina npi hangneng-keshagha chu tsü pi thola nkiza lalo.”

¹⁰Mathu na ma jüh tsü kinaya, isala mathu jawi “ ‘Keshü wina hangneng- keshagha’ ha ma jjügi mangwa nu?” isa khi pi keccünengli wa.

¹¹ Nu mathu na Jisu keü, “Mangkesa na Ayenkesansithu na Elijah na atuwa gho ben le khiten nu?”

¹²Ma luneng kechi na, “Pala tsüdila kidenya thsüle kesalina ntsakhiwa Elijah na atuwa ghoden. Isala mangkesa na Ntsawajüh na Anyi Tsawa na ketizen sa ntsa nu nyu na ma meya mvula benle khiben nu?

¹³Isala hi nthu kizaden, Ntsawajüh na ma cüki kekhi tsüti Elijah na ghodha, nu anyithu na ma miwi mathu kenenwa tsü sale.”

¹⁴Mathu na wa sansikeya kepathu gweghe keya wi anyitenti na gho mathu vüya nu Ayenkesansithu na mathu ssinu keccücanli ben.

¹⁵Anyithu na Jisu mukeya wi mathu tsüdi amansa nu bvü wa ma shalom sa.

¹⁶Jisu na ma sansikeyathu wi keü, “Nthu na mangwa ghena mathu ssinu keccücanli ben nu?”

¹⁷Anyitenti jawi meshu kesü kekhi na, “Kesansiwa, hi itsa na nkemehai ghamu ssiketen ghena ajühkhi nkeyawa tsü ssinu no wi ghoben.

¹⁸Nkemehai ghamu tsüna ma ghantenya lethu ma pashü pi ayyi wi cüchiden. Ma ciwi ma meceng n-nugha nu ma yha tsüden nu nzonkhhali saden. Hi no sansikeyathu wi nkemehai ghamu tsü jügüshi cülo khie lela mathu na tsü sa meya le!”

¹⁹Jisu na mathu wi khi, “Nthu n-nondi pi khatila nu! Hi khathu nthu gweghe nbenthu yishü nu? Hi khathu nthu gweghe benten nu? Ma ssinu he wi gholo.”

²⁰Mathu na ma ssinu Jisu wi gho. Atsaghang na Jisu muya meyi ghanyiwa tsü pashü pi ayyi wi cüchi nu kuwengwa thsüa, nu ma meceng n-nugha shhugho wa.

²¹Jisu na ma ba wi “Ma matsü khathu hati sawadha nu?” tsüti keü. Ma luneng, “Ma ghanyi tsü wina dha le.

²²Matsü kejon wi la nkemehai ghamu na ma pi shü thsüale kesalina ma pashü pi anni nu atssü wi cüchiden. No saya mehai lethu, ikhang nantizen nu ikhang kiqa chicülo.”

²³Jisu na ma luneng, “Anle, nghena saya mehai. Anyi kenondi kebenwa ma ghena pala tsüdila saya mehai le!”

²⁴Tsümeyi ma ba na magha nu khi, “Hi la kenondi ben lela zeng mtsü le! Hi kiqa pi ji kayi benya thsülo!”

²⁵Jisu na anyitenti mathu tsaki gho keten muya nu ma nkemehai ghamu satekü nu khi, “Ajühkhi nkeya nu akhuna ketecu ghamu, hi no wi kizaben; ghanyiwa gwo wina shhugho nu khiela ma wi ndu neng lalo!”

²⁶Atsaghang na magha chi nu ghanyiwa pashü pi ayyi wi cüchi nu ma wina shhugho. Ghanyiwa tsüna keshü kamang ti sa kesalina mathu tsüdila “Ma shüdha le!” khi.

²⁷Isala Jisu na ghanyiwa kwen zanya nu ma ya shagha thsüle sa, nu ma shaghaya.

²⁸Jisu na ajjen non wi kedu seng wi ma sansikeyathu na gho ma wi “Mangkesa na ikhang na atsaghang tsü jügüshi meya nu? isa keü.

²⁹Jisu na luneng, “Hati kesa ha kekhie wina ketan khe mangla sanu jügüya nben.”

³⁰Jisu nu ma sansikeyathu na apen tsü teshi nu Galilee pvüdhi wa. Jisu na anyi thola ma khiewa ben khe nchü thsü mvu,

³¹kepaghenanye ma hati khi pi ma sansikeyathu sansiben: “Anyi Tsawa tsü ghan pi nyu kwen wi chi nu ma pathi thsüaben, isala ma ghanan kecheng seng wi hangneng-shagha ben.”

³²Isala mathu na tsü jjügi chüshi meyala nu ma wi tsü keü messi.

³³Mathu na Kapernaum wi gho ajjen kesü wi dukeya seng wi Jisu na ma sansikeyathu wi keü, “Nthu na alenca wi mangwa khi pi keccücanli ten nu?”

³⁴ Isala mathu na ma jüh nluneng, kepaghenanye mathu na alenca wi mathu jawi thowa na kedi ntsawa saten nu kesa khi pi mathu keccücanli.

³⁵ Jisu na donkiya nu ma Taghakeni tsü ci pi ma wi chi nu khi, “Anyi thowa na atuwa sa mvu khe ma asakhenwa nu tsüdi maghawa nsathu yishü.”

³⁶Tsaseng wi ma ghanyi kesü ssiya nu pi mathu tuwi ngan thsü. Ma kwen chang pi ghanyiwa tsü lapengya nu mathu wi khi,

³⁷ “Anyi thowa na inyan wina ghanyi hati kesathu ssiya khe hi la ssiyaden; nu thowa na hi ssiya khe hi ketan nyela hi kesun kechiwa la ssiyaden.”

³⁸Johan na Jisu wi khi, “Kesansiwa, ikhang na anyi kesü n-nyan wina atsaghangthu jügüshi keben mu nu ma khenle, kepaghenanye ma ithu gweghe nten.

³⁹Isala Jisu na mathu kiza, “Ma khenle nsa lalo, kepaghenanye anyi thola inyan wina amankesa kuli benla nu wan hi kethenjüh khiwa nben le.

⁴⁰ Kepaghenanye thowa na ithu shun nten khe ma ithu ghena.

⁴¹ Hi atsentsa nthu kizaden, anyi thowa na nthu na Khrista nyan sen keten ghena atssü hyi kesü la pi nthu jjü thsü khe ma kutimen muya metsiden.”

⁴²“Anyi thowa na kenondi kezengthu ha kesü la sa pi hi nondi ketenwa ya sami thsü khe kenenggülon keti kesü pi ma sun wi hugi nu pi atssükedone non wi khalachi kesawa la ma ghena mehai.

⁴³ Tsalina keujüla nkwen kesü na no sa pi sami thsü lethu, tsü dendhilo! Nkwen keni pvünu anni nyen nketen nnighajü wi wa kesa tsü nkwen kesütan pvünu kahang wi keduwa nghena mehai.

⁴⁴(Ciwi ‘aghei mathu dsa ketenthu tsüna shü nten, nu anni mathu mecang keten tsüna nyen nten’.)

⁴⁵Keujüla nccü kesü na no sa pi sami thsü lethu, tsü dendhilo. Nccü keni pvünu annighajü wi wa kesa tsü nccü kesütan pvünu kahang wi keduwa la nghena mehai.

⁴⁶(Ciwi ‘aghei mathu dsa ketenthu tsüna shü nten, nu anni mathu mecang keten tsüna nyen nten’.)

⁴⁷ Nu keujüla n-nyon kesü na no sa pi sami thsü lethu, tsü kuhoshi pilo. N-nyon keni pvünu annighajü wi wa kesa tsü n-nyon kesütan pvünu Anyiza Kadiyyi wi keduwa nghena mehai.

⁴⁸ Ciwi ‘aghei mathu dsa ketenthu tsüna shü nten, nu anni mathu mecang keten tsüna nyen nten.’

⁴⁹“Amcü pi ahhansha kesa satemetha keten tsüti anni pi tsüdila satemetha shaben.

⁵⁰ Amcü na mehai, isala keujüla tsüna kesheng nmila lethu, khati sanu tsü ya sheng neng thsüya mehai nu? “Nthu jawi ashukesa mcü benyalo, nu khokho tuwi ccatssü hang tenlo.”