Read Northern Rengma Naga LUK 1 Bible Online

LUK 1 - Northern Rengma Naga bible

LUK 1

¹Kediwa Theofilo: Anyi kejonla mathu piketsü sala ithu jawi mangwa sa khe tsüthu cüki zhü nu kulichidha.

²Mathu na aghatsan wi anyon pi mu nu ketsijüh pi kekhithu na pi ithu kekiza ti zhüchi.

³Tsalina Njenkebenwa, hi tsüthu tsü aghatsan wina mehaitsü sinan kesalina hi nghena tsü aghatsan-ghanu sala zhü chithu mehai benle meshen.

⁴Isanu pi no sansi cü kesathu cüki tsüdi wi no ya atsentsawa tsü maben chüya thsüle kesalina hi hati saben.

⁵ Herod na Judea wi kadimi sa keben tsüwi Abijah keqhaikedishi wi keqhaikedi kesü Zekhariya na ben. Ma wubvü Elizabeth la Aaron keqhaikedi shicübvügha nyi kesü.

⁶Manyi qho Anyiza tuwi hang tsatan nu Apvüwa na ayenkhukechithu tsüdila nie cencu den.

⁷Isala Elizabeth na nkepvügha ghena manyi tsanga nmi, nu manyi qho qhai wadha.

⁸Ghanan kesü Zekhariya na atsathangla kekuli ma dulu wi tsü wala Kekinyijjen wi keqhaikedi kekuli tsü saben.

⁹Keqhaikedi yen kenie wina akezen wwinu Zekhariya na wala kekinyipen wi hankedemvu kemecang-u sa. Tsalina ma Apvüwa Kekinyijjen wi du,

¹⁰nu anyitenti na akhemi wi ben nu hankedemvu mecang keben jü wi tsü kekhie saben.

¹¹Ciwi Apvüwa nyilo kesü na gho ma tuwi hankedemvu mecang pi kekinyipen na ajewa nganya.

¹²Zekhariya na ma mukeya wi qhethiketen nu messiya.

¹³Isala nyilowa na ma kiza, “Nmessi lalo, Zekhariya! Anyiza na no kekhie tsü zayadha, nu nwubvü Elizabeth na atsa kesü pvüghaya ben na. No ma nyan pi Johan cilo.

¹⁴Ma kepvügha wi n-nonkeghe muyaden nu nyu kejonla anonkeghe saben.

¹⁵ Kepaghenanye ma Apvüwa tu wi kedi nyi kesü saben, isanu ma kisengtssü kekhang jjü nben; isala ma pvüghaya meyi na Kemetha Ghamu pi ma pong pvüben.

¹⁶Nu ma Israel nyi kejonla sa pi Apvüwa mathu Nyiza wi gho nengya thsüaben.

¹⁷ Ma atusenjüh-kechüwa Elijah kezü nu kekhang ti Apvüwa tu wi waben. Ma abathu nu atsangathu sa pi ajühkeyali thsü, anyi nyu jüh nkeyathu ssi sengho ketsatan kemeshon len wi chi, nu Apvüwa nyithu sa pi ma ghena kidenya thsüaben.”

¹⁸Zekhariya na nyilowa wi keü, “Keujüla tsüti saben lethu, hi khati nu tsü chüya mehai nu? Hi qhai wadha, nu iwubvü la qhai wadha.”

¹⁹ Nyilowa na luneng, “Hi Gabriel le! Hi Anyiza tu wi ngan benden, hi ajühkemehaiwa ha pi no kizalo hi kesun chi.

²⁰Isala no hi matsü wina sacen ketenthu jüh kekhi tsü nkenondi ghena pala hathu ha npi kesacen chu no ajühkhiya nben.”

²¹Tsü tsüwi anyithu na akhemi wi Zekhariya hieben, ma matsü kesiela Kekinyijjen non wi ben wa kesalina mathu amansa.

²²Ma shhughola ajühkhi pi mathu ccüneng meyala, tsalina mathu na ma Kekinyijjen non wi kemanthi kesü muyale kesa chüya. Ma ajühkhi meyala kesalina akwen sa pi mathu ccüneng.

²³Zekhariya na Kekinyijjen wi ma kekuli sacen nu ma jjen wi wha neng.

²⁴Tsaseng wi ma wubvü Elizabeth na atsa-npvüya nu ma asha manga nyu kuthi. Ma hati khi,

²⁵“Hawa ha Apvüwa na ighena sachi cüdha. Ma hi tizen nu imiwi nyu pangbiwa tsü sen bvüdha.”

²⁶Elizabeth na atsa-npvükeya asha tughowa wi Anyiza na nyilowa Gabriel kesun pi Galilee wi anyu kesü Nazareth kesa witsü chi.

²⁷ Ma yala ketsijüh kesü pi ghala pvünyi-metha kesü na Kadimi David shicübvügha nyi kesü ma nyan Josef kesa wi tsü n-nuwale ajühcen kethengwa tsü kiza thsüle kesalina. Ghala tsüwa nyan na Maria.

²⁸Nyilowa na wala nzawa wi kiza, “Ae, kaghali kepvüwa! Apvüwa na no ssiden nu sawegü pi no cü ntsa sadha!”

²⁹Isala Maria na nyilowa jüh ha mangwa le khiben nu kesa meshen pi ma qhethiketen nu amansa.

³⁰Nyilowa na ma kiza, “Nmessi lalo! Maria, no Anyiza kaghali pvüyadha na.

³¹ No atsa-npvüya nu atsa kesü pvüghaya ben na ma nyan pi Jisu cilo.

³² Ma kedi saden, ma pi Kemisintsa Anyiza Tsawa isa ciden. Apvüwa Anyiza na ma pi ma baqhai David ti kadimi kesü sa thsüden,

³³nu ma Jakob shicübvüghathu miwi anuphan kadimi saden; ma kadiyyi na ma sakhen sa nben!”

³⁴Isala Maria na nyilowa wi keü, “Hi pvünyimetha kesü na khati nu tsüti saya mehai nu?”

³⁵Nyilowa na luneng, “Kemetha Ghamu na nmiwi ghoben nu Anyiza kekhang na no ghong cüben. Tsalina ntsa tsü pvüghaya lethu, ma pi Kemethawa Anyiza Tsawa le ciden.

³⁶Ha meshenyalo, nshiliwa Elizabeth atsanga nmile khi ketenwa tsüna ma keqhai seng wi atsa-npvüyadha, nu ma tsüti kesa na nansü asha tughowa sadha.

³⁷ Kepaghenanye ciwi Anyiza ghena mangla sa nkeya nmi.”

³⁸Maria na khi, “Hi Apvüwa maghalewa, no kekhi tsüti imiwi sa keyawa salo.” Isanu nyilowa na ma teshi nu bvüa.

³⁹Tsaseng wi Maria na kidenya nu kaghajila Judea diyyiwa wi ayikha wi anyuti kesü wi tsü wa.

⁴⁰Ma wa Zekhariya jjen wi du nu Elizabeth shalom sachi.

⁴¹Elizabeth na Maria ma shalom kesa zaya meyi ma pvü non wi memewa tsüna kuli shagha. Kemetha Ghamu na gho Elizabeth pongya,

⁴²ma jisha nu khi, “No nza jawi kemihhi ntsawa, npvü wi kebenwa memewa tsü yala mehai keyawa salo!

⁴³Hi thowa lenu Apvüwa jja na hi hhainan ghoben nu?

⁴⁴Kepaghenanye hi no shalom kesa zaya meyi ipvü non wi memewa na ma nonkeghe wina kephenki shagha le!

⁴⁵Apvüwa jüh kekhi tsüna no wi sacen benle kesa nondikeya ghena no nza kemihhi ntsawa le!”

⁴⁶Maria na khi: “Hi kahang tsüdi pi Apvüwa seng ben;

⁴⁷nu ighamu na hi Hangshawa Anyiza wi ma nonghe bendha,

⁴⁸ kepaghenanye ma hi ma amagha kizza ntsawa ha lela meshenben! Khili nten na anyi tsüdila hi pi kemihhi ntsawa le ci tendha,

⁴⁹kepaghenanye kekhang ntsawa Anyiza na ighena pala keti kuli chicüdha. Ma nyan na kemethawa;

⁵⁰ma nanketizen pi abvüye tsüdi wi ma kinyikü ketenthu ccüca chidha.

⁵¹Ma ma kwen kekhangwa changchi pi kekapvü nu mathu kemeshen tsüdi sa pi bvüzighedha.

⁵² Ma mathu kadipen wina kadimi kekhangthu zansha, nu kizzathu pieki cü.

⁵³Ma pala kemehai pi ghama kebenthu ghanja cü, nu kebanthu kesun pi kemessü bvü thsüdha.

⁵⁴Ma ithu bamyithu wi khishi ketheng ti ghola ma magha Israel kiqa cüdha.

⁵⁵ Ma anuphan la Abraham nu ma shicübvüghathu tsüdi nanketizen tsü meshen benden.!”

⁵⁶Maria na asha kecheng cen Elizabeth gweghe benla nu ajjen wi wha neng.

⁵⁷Elizabeth na kepvügha tsü cuya nu ma atsa kesü pvüghaya.

⁵⁸Ma jenphonthu nu ma shilithu na Apvüwa na ma nantizenchi kecü tsü zaya nu mathu tsüdi gweghe anonghe ntsa sa.

⁵⁹ Tazen ghanan wi mathu na atsawa hyuhan le gho nu mathu na ma nyan pi ma ba Zekhariya nyan tsü ci mvu sa.

⁶⁰Isala ma jja na khi, “Nyele, ma nyan pi Johan ciden.”

⁶¹Mathu na ma wi kiza, “Isala nshili kesütanla pi tsü nyan nci le.”

⁶²Tsaseng wi mathu na akwen sa pi ma ba ccüneng nu atsawa nyan pi thowa ci mvuben khe keü chi.

⁶³Zekhariya na kezhüji kesü khieya nu tsü miwi “Ma nyan na Johan” tsüti zhüchi. Mathu tsüdila amansa.

⁶⁴Tsümeyi Zekhariya na ajühkhi nengya nu ma Anyiza seng shagha.

⁶⁵Ajenphonthu tsüdila messi nu hathu cüki ha Judea diyyiwa yikha tsüdi wi la khi wa.

⁶⁶Ha za keyathu tsüdila mathu leben wi “Atsa hawa ha khati sa shagha ten nu?” isa. Kepaghenanye Apvüwa kekhang na ma ssi tsentsa saden.

⁶⁷Johan ba Zekhariya na Kemetha Ghamu pi ma pong pvünu atusenjüh- khi kechi:

⁶⁸“Israel Nyiza Apvüwa senglo! Kepaghenanye ma gho ma nyithu kiqa nu lishachi cüdha.

⁶⁹Ma ma maghawa David shicübvügha wina ithu ghena Hangshawa kesü pieki cüdha.

⁷⁰Ma kheni atusenjüh-kechü kemethathu wina

⁷¹ma ithu ghinyithu nu nankemeghüthu kwen wina ithu hangshaya benle khishi chitheng.

⁷²Ma ithu bamyithu nantizenchi, nu ma kemetha Cenkethenjühwa tsü meshen benden khi.

⁷³Ma ithu baqhai Abraham wi kishen, ma ithu ghinyithu kwen wina ithu kekashaya, nu ithu yala kemessi nmila ma kekuli sa thsüben kesa khishi chitheng,

⁷⁴

⁷⁵isanu ithu kahang chula ma tu wi metha nu tsatan benya thsüle kesalina.”

⁷⁶“No, itsa, no pi Kemisintsa Anyiza wi atusenjüh-kechüwa ciden. Kepaghenanye no Apvüwa tuwi na wala ma ghena alen saden,

⁷⁷ma nyithu kiza nu mathu yala hangshakeya nu kesami teshi kecü muya thsüle kesalina.

⁷⁸Ithu Nyiza na nantizenden, Ma hangshakeya kewegü ya ithu miwi na shhugho thsü,

⁷⁹ nu tang wina keshü kejang wi hang ketenthu tsüdi miwi wegü, nu ithu lentsütson pi kecca len wi chi cüben.”

⁸⁰Atsawa tsüna qhai shagha nu asajjü nu aghamu len wi zü kayi. Ma Israel nyithu tu wi kekuli sa keshhugho tsathang npi kecu chu ayyikeshü wi hang.