Read Northern Rengma Naga LUK 12 Bible Online

LUK 12 - Northern Rengma Naga bible

LUK 12

¹ Tsü tsüwi anyi kejonla gho saghuya nu mathu khokho ccü kenniliben. Jisu na atuwa ma sansikeyathu wi kiza, “Farisithu zimi ghena kiden-kesha yalo, tsüna mathu nkenyeghe kesawa tsü.

² Pala pi shanbhon kethengthu tsüdila pi nyu ccücaaben.

³Kepaghenanye nthu na kejang wi mangwa khichi khe kewegü wi zayaben, nu ajjen non wi nkhena mangwa le khichi khe ajjen mili ben nu jishachiaben.

⁴“Ipvüshangthu, hi nthu kizaden, kahangwa ha pathi lela tsaseng wi mangla saya nkebenthu tsü nmessi lalo.

⁵Thowa nmessithu yishü khe hi pi nthu kizaden, pathi kesa seng wi pi annighajü wi khala chia keten kekhang kebenwa Anyiza tsü messiyalo. Anle, hi nthu kizaben, Ma messiyalo.

⁶“Akhükhü manga pi apisa keni wi jeü nten kwe? Isala Anyiza na tsüthu kesütan la mali nten.

⁷Tsüketan nyela nthu lissen lela tsüdi si senben. Tsalina nmessi lalo; nthu na akhükhüthu kejon miwi ma men jiki ben na!

⁸“Hi nthu kizaden, thowa na anyithu tuwi ma inyi le khishi khe Anyi Tsawa la Anyiza nyilothu tuwi tsü makesü khishiden.

⁹Isala thowa na anyithu tuwi ma inyi le nkhishi la khe Anyi Tsawa la Anyiza nyilothu tuwi tsü makesü nkhishi la shaben.

¹⁰ “Anyi kesü le kesü lela Anyi Tsawa keshunjüh khi lela kesami teshi pi cüben, isala thowa na nkemehaithu khi pi Kemetha Ghamu shun khe kesami teshi pi cüya nben.

¹¹ “Anyithu na nthu ghan sen nu Sinagogthu, ahngthu, nyelela kekhang kesenthu tuwi ajühkaghaten wa lela nthu na khatile khi pi nthu sheikhi nu kesa lebenketizen nsa lalo.

¹²Kepaghenanye tsü tsüwi Kemetha Ghamu na nthu mangwa nkhithu yishü khe pi nthu sansi cüben.

¹³Anyitenti jawi meshu kesü na Jisu wi khi, “Kesansiwa, icünyuwa ya iba keben pi ishinyi theng kecü tsü gishü pi hi cülo kizalo.”

¹⁴Jisu na ma luneng, “Ipvüshangwa, thowa na hi pi nshinyi jü wi pendhewa nyelela keben kegishüwa sa thsü nu?”

¹⁵Nu ma mathu tsüdi wi khi, “Kiden-kesha yalo, nthu alentagha wi la pala ketepagha kekheneng yalo, kepaghenanye anyi kesü kahang men ha na ma pala kejon keben miwi nye, ma ben ntsawa saben lela tsü nye!”

¹⁶Tsaseng wi Jisu na ajühkaghape ha khi pi mathu kiza, “Kuti jüwi keban kesü na ma lli wi pala kejon muyaden.

¹⁷Ma ketanla hati ma ccüneng wa, ‘Hi asu mukeyathu tsüdi pi ketheng pen nmidha. Hi khati sayadhanu ha?’

¹⁸Ma ketanla hati khi, ‘Hi hati saden, hi isabe tsü pheghe nu sa pi di kayi yaden, nu asu nu pala mukeyathu tsüdi pi ciwi tsanqai yaden.

¹⁹Tsaseng wi hi ketanla hi wi hati khiden, acenpvü kebenwa! No amapi kejon ghena nsenthu keyishü pala kemehai pi tsanqai yadha. Cca dsajjü, nu anonghethi hang yalo!’

²⁰Isala Anyiza na ma wi kiza, ‘Kejüphonwa! Shita no kahangli ha khuya lethu, thowa na no pala pi nghena tsanqai kethengthu ha tsüdi khuyaben nu?’ ”

²¹Jisu khi, “Anyithu Anyiza wi keben nyela mathu ketanla mathu ghena saghu ketenthu na hati saben.”

²²Tsaseng wi Jisu na ma sansikeyathu wi kiza, “Hi nthu kizaden, nthu ketanla nthu gwosajjü ghena mangwa dsajjü nu athsümeni mangwa mphimeni nu kesa meshen pi leben ketizen nsala.

²³Kepaghenanye kahang ha kedsakejjü miwi diki nu agwosajjü ha athsümeni miwi dikiben.

²⁴Aduwethu cüki tsü meshen nanlo: mathu amacü pi yang nu wwi nten; mathu pala pi ketheng pen nyelela asabe nmi; isala Anyiza na mathu ghanja benden. Nthu na awathu miwi ma men benki ntsale.

²⁵Nthu thowa na tsü meshen pi leben gükeccü ghena ma kahangli sa pi si nengya mehai nu?

²⁶Keujüla nthu na pala kizzakeu lela noncca meya lethu mangkesa na kepawa cüki meshen pi leben güccü benten nu?

²⁷ Ashaghathu keshigü cüki tsü meshen chi nanlo: mathu kuli nyelela mathu ghena athsümeni sa nten. Isala hi nthu kizaden, Kadimi Solomon lela ma keben tsüdi sen nu athighi hathu ti athsümeni tsikemehai nsen le!

²⁸Anyiza na hati aghangwa nansü alli wi benla nu dhitsü wi pi annibhon wi mecang ketenwa tsisa cü lethu, ma tsü miwi nthu thsümeni sa pi ncüten kwe? Nthu kenondi na khatila zeng nu!

²⁹“Tsalina nthu na keshüthangla mangwa dsa nyelela mangwa jjü nu kesa meshen pi leben ketizen nsa lalo.

³⁰(Kepaghenanye ayyi wi Anyiza nkechüthu na pala hathu ha tsüdi meshenki benden.) Nthu Ba na nthu hathu ha nsenthu keyishü chüben.

³¹Isala ma Kadiyyi bha tegüya lethu ma pala hathu tsüdi pi nthu cüben.

³²“Akhang kizzawa, nmessi lalo, kepaghenanye Abawa na Kadiyyi pi nthu kecü tsüna ma kenenle.

³³Nthu keben tsüdi jeü nu apisa pi ketha-u cülo. Mme wa nkesa ji apisa hikhu tsü pi nthu ji saya nu nthu keben pi tang wi khiela zeng neng wa nkeben pen wi tsanqai yalo, kepaghenanye ciwi kaghanfü na ghanfüya nben nu akimi la pvüya nben.

³⁴Kepaghenanye nthu keben na khiewa ben khe nthu leben la keshüthangla ciwi benden.

³⁵“Athsü pi nthu geshi qhanya nu anni cankiya nu kiden-kesha benyalo.

³⁶ Tsüna amaghathu na mathu pvüwa na keshanyi kemishu wina gho neng keten hie keben tsüti kesa. Ma khathansha wi gho ajenka kekha chi khe mathu wan wa sha pi ma cüden.

³⁷Amaghathu kiden sen nu hie keben wi mathu pvüwa na gho mu keyathu na kemihhi ntsa. Hi nthu kizaden, ma ghola ma geshi qhanya nu mathu yala donkiya thsü nu kedsakejjü pi mathu cüben.

³⁸Ma ghaja non wi nyelela atsathang keten pang wi gho lela kiden sen nu hie keben mu keyathu na kemihhi ntsa.

³⁹ Ha meshen yalo; keujüla ajjen pvüwa na kaghanfü gho keten tsü chü lethu ma hieya nu kaghanfü yala ma jjen yasa thsü nkesa le.

⁴⁰Nthu na kiden sen nu hie nbenthu yishü, kepaghenanye Anyi Tsawa na nthu meshen nkeben jüwi ghoaben.

⁴¹Pitor na khi, “Apvüwa, no ajühkaghape ha ikhang ghena ketanla anyi tsüdi ghena khiben nu?”

⁴²Apvüwa na luneng, “Thowa na amagha kemehaiwa nu kemetsawa nu? Tsüwa tsüna ma pvüwa na ma yala ajjen tsüdi miwi kediwa sa thsü, nu matsü wina kedsakejjü pi amagha kepathu cü thsü kesawa tsüle!

⁴³Amagha hati sa keben wi ma pvüwa na gho mu keyawa na kemihhi ntsa le!

⁴⁴Ntsakhiwa, hi nthu kizaden, ma amagha tsüwa pi ma keben tsüdi miwi kediwa sa thsüaben.

⁴⁵Isala keujüla amagha tsüwa tsüna ma ketanla, ipvüwa na matsü kesie seng wi ccüna gho nengben isa khi nu amagha kepathu nza npvüza la kiccü, dsa nu jjü pi adina ben lethu,

⁴⁶ma pvüwa na ma meshen nu chü nkeben tsü wi ghanan kesü gho neng shaben. Apvüwa na gho ma ketsendhipi nu pi ajüh nkeyathu jawi khala chiaben.

⁴⁷“Amagha kesü ma pvüwa na ma sa thsü mvu keben chü nu ma tsüthu tsü sale kesa kiden-keshaya nu nsa lethu kejon tughu ma kihhe ntsa saben.

⁴⁸Isala amagha thowa na ma pvüwa na ma sa thsü mvu keben nchüla pala pahan sa nu kekihhe-u sa khe kezeng-u ketan ma kihheben. Kejon pi cü kethengwa wi kejon yaden; tsü miwi ji kayi pi cü kethengwa wi ji kayi yaden.

⁴⁹“Hi anni pi ayyi wi chile gho, nu tsüna qhe shagha lethu khatila inonghe ten nu!

⁵⁰ Hi baptiz kesü nsathu yishüben, nu hi tsü npi kecen chu khatila leben güccü ten nu!

⁵¹Nthu na hi kecca sengho ayyiwa cüle meshen ben kwe? Hi nthu kizaden, kecca nyele, isani gishü zighe kesawa tsü.

⁵²Khili nten na meshu manga theghi na gishü zigheaben, meshu kecheng na keni shun nu meshu keni na kecheng shun isaben.

⁵³ Abathu na mathu tsathu shun, nu atsathu na mathu bathu shun; ajjathu na mathu ngathu shun, nu angathu na mathu jjathu shun; anyiethu na mathu cünyiethu shun, nu acünyiethu na mathu nyiethu shun isaben.”

⁵⁴Jisu na anyithu wi kiza, “Nthu na akulukeshü na nishuwa gho keten muya lethu, atsangho le bendhale khiden, nu ntsakhiwa tsüti saden.

⁵⁵Nu nthu na acülawa meghü na sho gho lethu, yeng wa tendhale khiden, nu ntsakhiwa tsüti saden.

⁵⁶Nkenyeghe kesathu! Nthu na ayyi nu akulu ghang nu atsannen khiyaden; isathu nthu mangkesa na nansü kahang tsüwa ha chü meya nu?

⁵⁷“Mangkesa na no ketanla nghena kemeshonwa saya nten nu?

⁵⁸Keujüla anyi pahan na nthu ssinu ajühkaghaten nu ajühkekaghaten pen wi wa lethu, nthu piketsü sa nu alenca wina ma ssinu kicennali tsü südheyalo. Keujüla nthu na tsüti nsa lethu, ma nthu ssinu pendhewa wi wa nu nthu pi ayenkesenwa kwen wi chiaben, nu nthu pi atssüzü sa thsüaben.

⁵⁹Hi nthu kizaden, nthu na asakhenwa apisa kesü la pi npi kedhikhi chu nthu na shhughoya nben.”