Read Northern Rengma Naga LUK 17 Bible Online

LUK 17 - Northern Rengma Naga bible

LUK 17

¹Jisu na ma sansikeyathu wi kiza, “Pala anyithu sa pi kesami wi khulidu thsüa kebenthu tsüna sa metsi ben, isala anyi thowa na tsüthu sa pi sa thsü khe ma ghena qhethiketen saden!

²Hathu jawi kizza ntsawa sa pi khuliwa thsü kesawa na alon keti kesü pi ma sun wi hugiya nu atssükedone wi qanca du kesawa la ma ghena mehai le!

³ Tsalina nthu na mangwa kuli khe kiden-kesha yalo! “Keujüla ncünyuwa na sami lethu, ma khachi, nu ma leben khapegheya lethu, ma kesami teshi cülo.

⁴Keujüla ma ghanan kesü wi ntuwi tagü tughu sami nu tagü tughu ntuwi ghola, ‘Hi leben khapeghe yadha,’ isa khi lethu, no ma kesami teshi pi ncüthu yishü.”

⁵Apostelthu na Apvüwa wi khi, “Ikhang kenondi sa pi ji kayi cülo.”

⁶Apvüwa na luneng, “Keujüla nthu na kenondi hanuwencü kesü cu la ben lethu, nthu na khamegüton kesü wi ‘No ketanla shhugho nu wala atssükedone wi hang walo,’ khi lela tsüna nthu jühkina ben.

⁷“Keujüla nthu na amagha kesü pi allica thsü nyelela khaghaneni noncca thsü theng. Ma alli wina gho lethu, nthu na kaghaji ghola dsajjü yalo ma kizaten kwe?

⁸Tsüti kesawa nye, nthu na ma wi khiben, ‘Hi kedsakejjü kiden cülo, nu hi dsajjü keben jü kugü pi hi cü nu tsaseng wi ccüna no dsajjü yalo.’

⁹Amaghawa na ajüh kekina ghena ma keseng npvü qo kwe?

¹⁰Tsü makesü nthu la nthu na salo kekiza tsüdila kesa seng wi hati khiben, ‘Ikhang na amagha melethu; ikhang na ikhang kekuli sa chidha.’ ”

¹¹Jisu na Jerusalem wi wa keten len sala Samaria nu Galilee manyi jüwi ghoya.

¹²Ma anyu wi wa keten wi agükedsakenaa nyi meshu tagha na gho ma metuya. Mathu na temeja wi ngan nu magha,

¹³“Kesansiwa, Jisu, ikhang nantizen chicülo,” isa khi.

¹⁴Jisu na mathu muya nu mathu wi khi, “Wala keqhaikedithu yala nthu ghang thsülo.” Isanu mathu alenca wi wa keten sa pi mehaiya.

¹⁵Mathu jawi meshu kesü na ma sa pi mehaiya kesa muya nu kheneng gho jisha nu Anyiza seng.

¹⁶Ma ghola Jisu ccü wi nkhwendu nu ma seng. Anyi tsüwa na Samaria nyi kesü.

¹⁷Jisu na khi, “Meshu tagha sa pi mehai cü theng; kepathu meshu tugu khie nu?

¹⁸Mangkesa na asang kesü ha ketan kheneng gho Anyiza seng ben nu?”

¹⁹Jisu na ma wi kiza, “Shagha nu whalo, no kenondi na no sa pi mehai cüdha.”

²⁰Farisithu pahan na Anyiza Kadiyyi na kusi gho ben nu kesa Jisu wi keü. Ma keluneng na “Anyiza Kadiyyi na hati mukeben gho nben.

²¹Anyi thola ‘Ghangchilo, he wi ben le!’ Nyelela ‘Ka wi ben le!’ khiya nben, kepaghenanye Anyiza Kadiyyi na nthu jawi ben.”

²²Tsaseng wi ma sansikeyathu wi khi, “Nthu na Anyi Tsawa tsathang tsü muya mvuthi kesa matsü na ghoben, isala nthu na tsü muya nben.

²³Ciwi anyi pahan na nthu wi kizaben, ‘Ghangchilo, he wi benle!’ nyelela ‘Ghangchilo, ka wi benle! Isala tsü ghang nwa lalo.

²⁴Kepaghenanye ayyi ccügwen kesü wi atsancwe chithu pahanwa la muya keten tsüti Anyi Tsawa kegho tsathang la makesü saben.

²⁵Isala ma atuwa sala nansü nyithu kwen wi ketizen sa ntsa nu nyu na ma meya mvula nsathu yishü.

²⁶ Noah tsü wi kesa tsüti Anyi Tsawa tsü wi la saben.

²⁷ Noah na ahun wi duya nu atssüketi na gho anyi tsüdi meyanthi kesa ghanan kecu anyi tsüdila dsa nu jjü, keshanyi sa.

²⁸ Tsüna Lot tsü wi tsüti saben. Anyi tsüdila dsa nu jjü, pala shei nu pi jeü, pi yang nu ajjen saben.

²⁹Lot na Sodom keteshi ghanan wi tang wi anni nu annilon tsangho pi mathu mecangthi khia.

³⁰Tsü makesü Anyi Tsawa na nyu ya ma kemu thsü ghanan wi tsüti saben.

³¹ “Tsü ghanan wi keujüla anyi kesü ajjen mili wi ben lela kheneng ajjen non wi dula ma tsanqaithu khuyale nsala; tsüti alli wi kebenwa la ajjen wi nwha neng lalo.

³² Lot wubvü cüki tsü meshen yalo.

³³ Anyi thowa na ma kahangli hangsha yale sa khe dediaben; nu thowa na ma kahangli dedichi khe hangsha yaben.

³⁴Hi nthu kizaden, tsü ghaja wi meshu keni gweghe awe kesü wi jenben lela kesü ssiya nu kepawa teshiaben .

³⁵Nza meshu keni gweghe asu süben lela kesü ssiya nu kepawa teshiaben.

³⁶Anyi meshu keni na gweghe allica ben lela kesü ssiya nu kepawa teshiaben .

³⁷Sansikeyathu na ma wi keü, “Apvüwa, khiewa nu?” Jisu na luneng, “Khiewa keshü kamang na ben khe ciwi akamang kemcüwathu na saghu benden.”