Read Northern Rengma Naga LUK 18 Bible Online

LUK 18 - Northern Rengma Naga bible

LUK 18

¹Jisu na ajühkaghape kesü pi mathu kiza nu mathu na keshüthangla khieben nu accükwen-nshü lalo kesa mathu sansi.

²Ma khi, “Anyuti kesü wi Anyiza nmessi nyelela anyithu nyuwakü nketen pendhenyi kesü ben.

³Anyuti tsüwa wi denyile kesü na gho ma kemeshon shei khi cülo kesa ma wi ‘Hi nankemeghüwa tuwi ishei khi cülo,’ khie khie saden.

⁴Matsü kesie pendhewa na male khi, isani asakhen wi ma ketanla ma wi khi, ‘Hi Anyiza nmessi nu anyithu n-nyuwakü lela

⁵denyile hawa ha hi pondeja wadha nu hi ma jühkaghaten pi cüaden, nyelethu ma ghoneng-ghoja nu hi ilidhamang waben.’ ”

⁶Apvüwa na khi, “Nketsatan pendhewa na kekhi tsü kina yalo.

⁷Anyiza na ma nyithu aghanan le aghaja lela ma wi khie ketenthu shei khi cü nben kwe?

⁸Hi nthu kizaden, ma wan nu mathu shei khi cüben. Isala Anyi Tsawa na kegho wi ma ayyi wi kenondi muyaben ma?”

⁹Jisu na ajühkaghape ha pi anyi mathu na tsatanle nu kepathu meshensa ketenthu wi kiza.

¹⁰“Kuti tsüwi meshu keni gweghe Kekinyijjen wi kekhie sa wa: kesü na Farisi nu kepawa na khajana kekhü.

¹¹Farisiwa na ma kepa ngan nu khie: ‘Anyiza, hi no sengle, kepaghenanye hi anyi kepathu ti pala tepagha, ntsatan, nyelela keqheza nyi nye. Hi no seng, kepaghenanye hi khajana kekhüwa katsü ti nye.

¹²Hi hapta kesü jüwi keni tughu ziden, nu hi mukeya tsüdi wi gishü tagha wi kesü pi no cüden.’

¹³Isala khajana kekhüwa tsü temeja wi ngan nu ma mmi la pieki pi tang wi n-ghang, isala ma leben wheng nu khi, ‘Anyiza, hi kesami nyi kesü ha nantizen chicülo!’

¹⁴ Jisu na khi, ‘Hi nthu kizaden, Farisiwa tsü nyela khajana kekhüwa tsüna Anyiza ssinu meshonya nu ma jjen wi whadha. Kepaghenanye anyi kesü le kesü lela ma pi dithang ketenwa satemeni cüden, nu ma satemeni ketenwa sa pi di cüden.’ ”

¹⁵Anyi pahan na Jisu yala ma kwen chang pi mathu tsangathu miwi chi thsüle kesalina ssinu gho. Sansikeyathu na tsü muya nu mathu ssi kitagha.

¹⁶Isala Jisu na ghanyithu cichi nu khi, “Ghanyithu yala hi wi gho thsülo, mathu nkhenla, kepaghenanye Anyiza Kadiyyi na hathu hati kesa ji.

¹⁷Ha meshenyalo! Anyi kesü le kesü lela ghanyi kesü ti Anyiza Kadiyyi tsü ya nkeya tsü khiela ciwi duya nben.”

¹⁸Judah nyi ccülikesa kesü na Jisu keü, “Kesansi kemehaiwa, hi anuphan kahang muya le kesa ghena khati nsathu yishü nu?”

¹⁹Jisu na ma keü, “No mangkesa na hi pi kemehaiwa le citen nu? Anyiza ketan khe anyi thola kemehai nmi.

²⁰ No ayenkhukechithu tsü chüben: ‘Keqheza nsala; nyu npathila; n-ghanfüla; milikemesa wi thola nkimennila; nba njja kinyikü yalo.’ ”

²¹Anyi tsüwa na luneng, “Hi ghanyi keben tsü wina ayenkhukechi hathu tsüdi nie yadha.”

²²Jisu na ha zakeya wi ma wi khi, “Ciwi la no pala kesü nkulithu yishüben. No keben tsüdi pi jeü nu apisa pi ketha-u cülo, isathu tang wi no keben benya ben; Tsaseng wi ghala hi nie yalo.”

²³Isala anyi tsüwa na ajüh ha zaya theng nu ma hathana wa, kepaghenanye ma keban ntsa kesü.

²⁴Jisu na anyi tsüwa hathana keben tsü muya nu khi, “Keban na Anyiza Kadiyyi wi dule kesa na khatila dhu nu!

²⁵Keban kesü Anyiza Kadiyyi wi dule kesa na sunsiesa kesü na aghaceng ku wi keshhuwa la lekete.”

²⁶Anyi ma jüh ha kizathu na keü, “Isathu thowa hangshaya mehai nu?”

²⁷Jisu na khineng, “Anyi na sa nkeyawa tsü Anyiza na saya mehai.”

²⁸Tsaseng wi Pitor na khi, “Ghangchilo, ikhang na ikhang jjenthu teshi nu no nieden.”

²⁹Jisu na mathu wi khi, “Anle, hi nthu kizaden, anyi thowa na Anyiza Kadiyyi ghena ajjen, awubvü, acünyuthu, abajjathu, nyelela atsangathu teshi khe

³⁰ma khili kahang wi tsü miwi mu nengya nu kahang gho keten wi anuphan kahang muyaben.”

³¹Jisu na sansikeyathu Taghakeni ssi wa mathu kiza, “Kinalo! Ikhang na Jerusalem wi shu tendha, nu ciwi atusenjüh-kechüthu na Anyi Tsawa ghena zhü ketheng tsüdila sacen yaben.

³²Ma ghan pila Judah nyi nkenyethu kwen wi chiaben, mathu na ma nankeqhe, ma metsimeni, nu ma meshuki saben.

³³Mathu na ma kihhe nu ma pathiaben, isala ghanan kecheng seng wi ma hangneng shagha ben.”

³⁴Isala sansikeyathu na hathu ha mangla nchü; ajüh jjügi tsüna mathu tuwi kuthi kesalina mathu na Jisu khi kebenwa tsü nchü la.

³⁵Jisu na Jerikho tetsaki gho keten alen wi anyon nkemu nyi kesü na donki nu kuwhe ben.

³⁶Ma anyitenti na wa keten hhai zakeya wi “Mangwa saben nu?” keü.

³⁷Mathu na luneng, “Nazareth nyiwa Jisu na waden le!”

³⁸Ma maghala, “Jisu, David tsawa! Hi nantizen chicülo!” isa khi.

³⁹Anyi ma tuwi ketenthu na ma ssi kitagha nu ma ccen benlo khi. Isala ma tsü miwi misiki jisha, “David tsawa, hi nantizen chicülo!”

⁴⁰Tsalina Jisu ngan wa nu anyi anyon nkemuwa tsü ssinu ma wi gholo khi. Ma tetsaki kegho wi Jisu na ma wi keü,

⁴¹“Hi nghena mangwa sachi thsü mvuben nu?” Ma luneng, “Kesansiwa, hi ya pala mu nengya mvuben.”

⁴²Jisu na ma wi khi, “Ghangchilo, no kenondi na no sa pi mehai cüdha.”

⁴³Tsümeyi ma nyon na pala muya, nu Anyiza seng nu Jisu nie wa. Anyitenti na tsü kemu wi mathu tsüdila Anyiza seng.