Read Northern Rengma Naga LUK 19 Bible Online

LUK 19 - Northern Rengma Naga bible

LUK 19

¹Jisu na Jerikho wi du nu pvüdhi waden.

²Ciwi khajana kekhü kedi ntsa kesü ma nyan Zakhia na ben, ma keban kesü.

³Ma Jisu tsü ghangchi mvu sa, isala ma kizza-kemelu nyi kesü nu anyitenti ghena ma Jisu mu meya.

⁴Tsalina ma anyitenti tu wina bvü wa Jisu na wa keten len wi ambaton kesü wi ki nu ghang ben.

⁵Jisu na ciwi ghola yaki Zakhia ghang chi nu khi, “Zakhia, wan dugholo! Hi nansü njjen wi nbenthu yishüben.”

⁶Zakhia na kaghaji dugho ma nonghe ntsa sa nu ma ssiya.

⁷Anyi tsü kemuthu tsüdila nbvümugho wa, “Anyi hawa ha kesami nyi kesü kejjen sala ma jjen wi ben wadha!”

⁸Zakhia na shagha nu Apvüwa wi kiza, “Kinachilo, Apvüwa! Hi keben gishü pahan pi ketha-u cüaden, nu keujüla hi anyi pahan mechu nu nyu ji khuya theng lethu, hi tsümiwi keshen mejü pi ma cüaten le!”

⁹Jisu na ma wi kiza, “Nansü hangshakeya na ajjen ha wi ghodha, kepaghenanye anyi ha la Abraham shicü kesü.

¹⁰Anyi Tsawa tsüna anyi bhatagha kesathu bha nu hangsha yale gho.”

¹¹Tsaseng wi Jisu na ajühkaghape kepa wi la khi pi ma jühkina kebenthu kiza. Ma Jerusalem tetsaki wa tendha, nu mathu na Anyiza Kadiyyi tsüna wan gho tendhale sa.

¹²Tsalina ma khi, “Kedi nyi kesü diyyi kelensie wi kadimi saya nu kheneng ajjen wi ghole sa.

¹³Ma npi kewa wi ma maghathu tagha cichi nu rükatssü kesüsü pi mathu gishü cü nu khi, ‘Hi npi kegho neng chu ha pi asensa benlalo.’

¹⁴Isala ma nyithu na ma nanmeghü nu ma seng wi nyilothu kesun pi hati khi thsü, ‘Ikhang na anyi hawa pi ikhang kadimiwa sa thsü mvu nben.’

¹⁵“Anyi tsüwa na kadimi saya nu ghoneng. Ma apisa pi cü ketheng ma maghathu na khajuju kiyiya khe chüyale kesalina ma tuwi gholo kesa ahza khuchi.

¹⁶Atuwa na gho nu khi, ‘Kediwa, no rükatssü kesü pi hi kecü tsü pi tagha kiyidha.’

¹⁷Ma pvüwa na ma wi kiza, ‘Mehaidha, no amagha kemehaiwa. No pala kizzakeu wi jühtsentsa kesalina hi no pi anyunutithu tagha kenonccawa sa thsüden.’

¹⁸Amagha keniwa na gho nu khi, ‘Kediwa, no rükatssü kesü pi hi kecü tsü pi manga kiyiyadha.’

¹⁹Ma pvüwa na ma wi la khi, ‘No anyunutithu manga kenonccawa saben.’

²⁰Amagha kepawa na gho nu khi, ‘Kediwa, nrükatssü tsüna he wi ben, hi athsü pi meju pi theng le!

²¹No kecügü nyi ghena hi no messi, kepaghenanye no nji nkenye lela yaden, nu no pi nkeyangchi wi lela wwiden.’

²²Kediwa na ma wi khi, ‘No amagha nkemehaiwa! Hi njüh tsü sen nu no meshensa den. No hi kecügü nyi nu iji nkenye lela yaten nu hi pi nkeyangchi wi lela wwiden kesa chüben.

²³Isathu, mangkesa na ipisa tsü pi apisajjen wi chi nsa nu? Isalethu hi kegho neng wi ma kekiyi muya kesa le!’

²⁴Tsaseng wi ma anyi ciwi ngan kebenthu wi kiza, ‘Ma wi rükatssü tsü khuya nu pila amagha ma kwen wi tagha kebenwa tsü wwa cülo.’

²⁵Isala mathu na ma wi khi, ‘Ma rükatssü tagha bendha le!’

²⁶ Ma khineng, ‘Hi nthu kizaden, anyi kesü le kesü lela pala pahan kebenwa pi wwa neng cüben, isala thowa na mangla nmi khe ma keu kebenwa tsü lela sen bvüaben.

²⁷ Khili hi nankemeghüthu, hi mathu miwi kadimi nkesa thsü mvuthu tsü ssi gho ituwi na mathu pathilo.’ ”

²⁸Jisu na hati khi nu mathu tuwi na Jerusalem wi wa.

²⁹Ma Oliv Yikha wi Bethfage nu Bethani manyi kete wi kegho wi ma sansikeyathu meshu keni kesun pi ma tuwi wa thsü,

³⁰nu hati khi, “Nshinyi tuwi anyu wi tsü walo, nshinyi ciwi du lethu gada zza kesü nyu ma miwi npi keben pi hugi ketheng muya benna tsü lisha sen nu he wi gholo.

³¹Keujüla nyu na nshinyi wi mangkesa na nshinyi tsü lisha ben nu keü lethu, nshinyi na Apvüwa na ha nsenthu yishü benle ma kizalo.”

³²Tsalina manyi na wa nan Jisu na manyi kekiza ti muya.

³³Manyi wala gada zza tsü lisha keben wi ma pvüwa na manyi wi keü, “Nshinyi mangkesa na tsü lishaben nu?”

³⁴Manyi na luneng, “Apvüwa na ha nsenthu yishüben.”

³⁵Isanu manyi na tsü ssinu Jisu wi gho. Tsaseng wi mathu na athsü pi gada zza miwi shi nu Jisu yala ma miwi donki thsü.

³⁶Ma tsü miwi na wa keten wi anyithu na mathu thsü pi alen wi shi.

³⁷Ma wa Oliv Yikha wina kedugho len Jerusalem kete wi wa keten wi ma sansikeyathu anyitenti na jisha sen nu Anyiza seng nu mathu na amankesa keti mukeya ghena ma seng.

³⁸ Mathu na hati khi: “Anyiza na sawegü pi Apvüwa nyan wina gho ketenwa Kadimi kecüwa salo! Tang wi kecca na ben nu Anyiza nyanthang keyawa salo.”

³⁹Farisithu pahan na anyitenti jawi na Jisu kiza, “Kesansiwa, no sansikeyathu ya ccen benlo kizalo!”

⁴⁰Jisu na luneng, “Hi nthu kizaden, keujüla mathu na ccen ben wa lela alon hathu ketanla magha shagha ben.”

⁴¹Ma anyunutiwa tsü tetsaki gho nu mukeya wi tsü ghena qai,

⁴²nu khi, “Keujüla no nansü mangwa na kecca ghena nsenthu yishü khe tsü chüshiyathu mehai kesanan! Isala no khili tsü nmudha!

⁴³Kepaghenanye nghena matsü na ghoden, ciwi nghinyithu na akhweti sa pi no vüya nu alen tsüdi wi no khenyaben.

⁴⁴Mathu na anyi nkhweti non wi kebenthu nu no la yasatha saben; nu alon kesütanla ma pen wi nben laben, kepaghenanye no Anyiza na no hangshayale kegho tsüwa tsü nchüla.”

⁴⁵Tsaseng wi Jisu na Kekinyijjen wi dula asenkesathu jügüshi,

⁴⁶ nu mathu wi khi, “Ntsawajüh wi Anyiza na kekhi hati khi theng, ‘Hi Kekinyijjen pi kekhie jjen kesü saden,’ isala nthu na tsü pi kaghanfüthu keben pen saben le!”

⁴⁷ Jisu na atsathangla Kekinyijjen wi nyu sansi. Keqhaikedi ntsathu, Ayenkesansithu, nu anyi ccülikesathu na ma pathi mvu sa,

⁴⁸isala mathu na tsüti kesa len mu meya, kepaghenanye anyithu tsüdila ma jühkekhi tsü kesütanla nteshi mvula kinaben.