Read Northern Rengma Naga LUK 2 Bible Online

LUK 2 - Northern Rengma Naga bible

LUK 2

¹Tsü tsüwi Kadimi Augusta na Rom kadiyyi maben wi nyanzhüghu yalo kesa ahza khuchia.

²Quirinia na Siriya yyi wi ahng sa keben ha nyanzhüghu atuwa sa.

³Tsalina anyi tsüdila anyan zhüyale papa kepvügha nyu wi washan.

⁴Josef la Galilee yyi wi Nazareth wina Judea wi David nyutiwa Bethlehem wi wa, kepaghenanye ma David shicübvügha nyi kesü.

⁵Ma wa anyan zhüyale kesalina ma ssiben le ajühcen kethengwa Maria ssinu wa. Maria na atsa-npvüden,

⁶manyi na ciwi keben wi Maria na atsa kepvügha matsü na gho cua.

⁷Nu ma atsa tssütsewa pvüghaya, nu athsü pi ma meju pi amesü khu kesü wi jen thsü theng, kepaghenanye ciwi kijünyi jjen wi manyi keben pen nmila.

⁸Diyyi ciwi anenikehiethu na aghaja alli wi ben nu mathu khaghanenithu hieden.

⁹Apvüwa nyilo kesü na gho mathu kete wi nganya nu Apvüwa nyankethang na mathu wegüya. Mathu na messi ntsa saya,

¹⁰isala nyilowa na mathu wi kiza, “Nmessi lalo! Kepaghenanye hi nthu ghena Ajühkemehaiwa senghoben, nu tsüna ayyi nyi tsüdila anongheya thsüden.

¹¹Nansü nthu Hangshawa, Apvüwa Khrista tsüna David Nyunutiwa wi pvüghayadha!

¹²Ha nthu ghena azensu kesü saden, nthu na atsawa tsü meju pi amesü khu kesü wi jen thsü ketheng muyaben.”

¹³Tsümeyi tangnyilo süpahizi akhang keti kesü na nyilowa tsü gweghe hati nu Anyiza seng shagha:

¹⁴“Tang kemisi ntsa wi kebenwa Anyiza nyanthangkeyawa salo! nu kecca ya ayyi wi anyi ma nen ketenthu miwi kebenwa salo!”

¹⁵Tangnyilothu na mathu teshi nu tang wi kewa seng wi anenikehiethu na hati khokho wi khi, “Ikhang Bethlehem wi wa nu Apvüwa na pi ikhang kekiza hathu ha kesa tsü ghangchi na!”

¹⁶Tsalina mathu na kaghaji wala Josef nu Maria manyi nu atsawa pi amesü khu wi jen thsü ketheng tsü muya.

¹⁷Anenikehiethu na wa ma muya, nu tangnyilowa na atsawa cüki pi mathu kiza ketheng tsü khi pi mathu kiza.

¹⁸Anenikehiethu na kekhi tsü za keyathu tsüdila amansa.

¹⁹Maria na tsüthu tsüdi pi ma leben wi chipvü nu meshendhu ntsa sa wa.

²⁰Anenikehiethu na tangnyilowa na mathu kekiza ti tsüdila zaya nu mutiya kesalina akhwi sa pi Anyiza seng sen nu wha neng.

²¹ Tazen ghanan wi atsawa hyukahan matsü na gho, nu ma nyan pi Jisu ciya; anyan tsüna tangnyilowa na ma npi npvükeya wina keci.

²²Mosa Yenwa kenie wina satekemetha matsüwa tsüna gho Josef nu Maria manyi cuya. Tsalina manyi na atsawa tsü pi Apvüwa tuwi chile ssinu Jerusalem wi shu.

²³ Apvüwa yen wi hati zhü pi theng: “Atsa tssütsewa pvüghakeya tsüdila satemetha pi Apvüwa wi chiden.”

²⁴ Mathu na Apvüwa yen nienu ahhansha sale kesalina nkhetsü nyelela tuktur keni sen nu shu.

²⁵Tsü tsüwi anyi kesü ma nyan Simon kesa tsüna Jerusalem wi hangben. Ma tsatan nu Apvüwa messikü keten nyi. Ma Israel hangshaya keten tsüwa tsü hieben, nu Kemetha Ghamu na ma ssiden,

²⁶nu ma Apvüwa na khishi ketheng Messiya tsü npi kemu chu shü nbenle kesa Kemetha Ghamu na ma kiza theng.

²⁷Aghamu na Simon ssinu Kekinyijjen wi wha, nu atsawa bajja la Jisu pi Ayenwa kenie wina sachile ssinu Kekinyijjen wi gho.

²⁸Simon na atsawa tsü pieya nu hati Anyiza seng:

²⁹“Apvüwa, no khishikechi tsü sacen chidha, nu no nmaghawa yala cca bvü thsü yilo.

³⁰Kepaghenanye hi inyon pi no hangshakeya tsü muyadha,

³¹tsüna no anyi tsüdi tuwi na kiden ketheng:

³²Kewegü kesü na no kenenwa tsü pi Judah nyi nkenyethu ccüca chi, nu anyankethang sen nu n-nyi Israel miwi gho.”

³³Atsawa bajja na Simon na ma cüki kekhi tsü kina pi amansa.

³⁴Simon na sawegü pi mathu miwi chi nu hati ma jja Maria kiza, “Anyiza na atsawa ha kessi pi Israel nyi kejonla qanca nu shaghaya thsüben. Ma Anyiza wina kegho zensu kesü nyu na meya mvula kesa kesü saben,

³⁵nu mathu kekuthi kemeshen sa pi nyu ccücaaben. Nu ahathakina na njünnu nleben kecun keben ti saben.”

³⁶Ciwi Asher mizza nyi Fanuel nga denyile keqhai kesü ma nyan Anna atusenjüh-kechü na ben. Ma n-nuwa nu ma wuba manyi amapi tagü ketan hang, nu khili ma kahang mapi achentazen nu mejü sa wadha. Ma ghaja ghanan lela Kekinyijjen nteshila Anyiza kekuli sala zi nu kekhie sa benden.

³⁷

³⁸Tsü tsüwi ma ghola Anyiza seng nu atsawa cüki khi pila Anyiza na Jerusalem hangshaya keten hie kebenthu tsüdila kiza.

³⁹ Josef nu Maria manyi Apvüwa Yenwa kenie wina kekuli tsüdi sacenya nu Galilee wi mathu nyuti Nazareth wi ghoneng.

⁴⁰Atsawa na qhai shagha züya nu Anyiza wi kemetsa nu nanketizen pi ma pong pvüya.

⁴¹ Jisu bajja na amapi kaghapenla Shhukeya Kho tsü ghena Jerusalem wi shuden.

⁴²Jisu kahang mapi taghakeni wi pi mathu yen sa keten ti akho ghena Jerusalem wi shu.

⁴³Mathu na akho kesacen seng wi ajjen wi kheneng gho, isala pvüzanyiwa Jisu na Jerusalem wi ben wa. Ma bajja na tsü nchü;

⁴⁴manyi kemeshen ma mathu jawi tenle sala ghanan thangthang lenketsen wi kewa seng wi mathu shilithu nu pvüshangthu jawi ma bha wa.

⁴⁵Manyi ma mu meyala kesalina Jerusalem wi ma bha neng wa.

⁴⁶Kecheng ghanan wi manyi na ma Kekinyijjen wi Judah nyi kesansithu jawi donki nu mathu jühkina nu mathu wi pala keü keben muya.

⁴⁷Ma jühkina kebenthu tsüdila ma pala kechü nu keluneng tsü za pi amansa.

⁴⁸Ma bajja na ma mukeya wi amansa nu ma jja na ma kiza, “Itsawa, no mangkesa na hati sa pi ishinyi cüben nu? Nba ishinyi na qhethiketen nu leben güccüla no bhaden.”

⁴⁹Ma manyi luneng, “Nshinyi mangkesa na hi bhaten nu? Nshinyi hi iBa jjen wi benden kesa tsü nchü kwe?”

⁵⁰Isala manyi na ma keluneng tsü jjügi chüshi meyala.

⁵¹Isanu mathu gweghe sen nu Nazareth wi wha neng nu ciwi ma manyi jühkina nu hang. Ma jja na hathu tsüdi pi ma leben wi chipvü nu ben wa.

⁵² Jisu na qhai shagha metsa kayi, Anyiza nu anyi kaghali pvüya.