Read Northern Rengma Naga LUK 20 Bible Online

LUK 20 - Northern Rengma Naga bible

LUK 20

¹Ghanan kesü Jisu na Kekinyijjen wi anyithu sansi nu Ajühkemehaiwa pi khi keben wi keqhaikedi ntsathu, nu Ayenkesansithu pi keshenpfüthu gweghe gho

²nu ma wi khi, “Ikhang kizalo, no mangwa kekhang wina hathu ha saten nu? Thowa na no hathu saya kemehai kekhang pi no cü nu?”

³Jisu na mathu luneng, “Khili hi la nthu wi pala kesü keü ten na hi kizalo.

⁴Johan baptism tsüna Anyiza wina la anyi wina gho nu?”

⁵Mathu na mathu jawi keccücanli wa, “Ikhang na khatile khi nu? Keujüla ikhang na ‘Anyiza wina le’ khithu, ma isathu ‘Mangkesa na nthu Johan n-nondi nu?’ khiben.

⁶Isala ithu na ‘Anyi wina le’ khithu, anyitenti ha maben la alon pi ikhang kecenthiaben, kepaghenanye mathu na Johan tsüna atusenjüh-kechü kesü le nondiden.”

⁷Tsalina mathu na “Ma khiewa na gho khe ikhang nchü le,” khineng.

⁸Jisu la mathu wi khi, “Isathu hi la mangwa kekhang wina hathu ha saten khe pi nthu kizaya nben.”

⁹ Tsaseng wi Jisu na ajühkaghape ha pi anyithu kiza: “Anyi kesü na kemeshentsse pi yang nu pi alli tsü kedengathu kwen wi denga chi nu matsü kesie kijünyi wa.

¹⁰Kemeshentsse bi kewwi tsüna kegho wi ma amagha kesü kesun pi kedengathu wi ma shei khie wa thsü. Isala kedengathu na amaghawa tsü kiccü cü nu mangla pi ma ncüla kesun pi ghoneng thsü.

¹¹Tsalina ma amagha kepawa kesunchi; isala kedengathu na tsü la kiccü pi kejügheya ntsa sa thsü, nu mangla pi ma ncüla kesun pi ghoneng thsü.

¹²Tsaseng wi ma amagha kechengwa la kesunchi; kedengathu na ma la mesa-mena cüa, nu ma jügüshia.

¹³Tsaseng wi alli pvüwa na khi, ‘Hi khati sadha nu? Hi itsa hi kaghaliwa tsü kesun chiden; mathu na ma nyuwakü metsi!’

¹⁴Isala kedengathu na ma muya meyi khokho wi khi, ‘Hawa ha alli pvüwa tsa le! Ikhang na ma pathi nu ma keben pi ikhang ji saya na!’

¹⁵Tsalina mathu na ma zansen shhula athsütsa wi ma pathia. “Isalethu, alli pvüwa na kedengathu miwi khati saben nu?” Jisu na keü.

¹⁶“Ma ghola anyi tsüthu tsü pathi nu alli tsü pi kedenga kepathu cüaben,” Anyithu na tsü zakeya wi “Ntsakhiwa tsüti saben le!” khi.

¹⁷ Jisu na mathu ghang nu keü, “Isalethu, Ntsawajüh ha jjügi ha mangwa nu? ‘Alon, ajjen kesathu na pi ma men nkemi ti meya mvula kesawa tsüna tsüdi miwi aghutiwa sa shaghadha.’

¹⁸Kesü le kesü lela alon tsü miwi keqancawa kecencha zigheaben, nu keujüla alon tsüwa na kesü miwi qanca lethu, tsü pacha pi ma nikhu saben.”

¹⁹Keqhaikedi ntsathu nu Ayenkesansithu na apen ciwi na Jisu ghanyale sa, kepaghenanye ma ajühkaghape ha khi pi mathu shun keben chüya; isala mathu na anyithu messia.

²⁰Tsalina mathu na matsü kemehai hie, mathu nyu melli pi atsentsa ghe sala wa Jisu jüh kekhi zzi chüya nu ma ghan pi Rom ahng kekhang kekhu wi chiale sa.

²¹Wahhaithu na Jisu wi khi, “Kesansiwa, ikhang na no kekhi nu kesansijüh tsüna meshon. No nyu nankepapa nsa isala anyi ghena atsentsa Anyiza lenwa tsü pi nyu sansiden kesa chüben.

²²Ithu khajana pi Rom Kadimiwa kecü ayen benla nmi khe ikhang kizalo.”

²³Isala Jisu na mathu cho tsü chüya nu mathu wi khi,

²⁴“Rükatssü kesü pi hi ccücalo. Tsü miwi thowa mmi nu ma nyan zhüki theng nu?” Mathu na “Rom Kadimiwa le” khinengchi.

²⁵Tsalina Jisu khi, “Isathu mangwa na Kadimiwa ji khe pi Kadimiwa cülo; nu mangwa na Anyiza ji khe pi Anyiza cülo.”

²⁶Ciwi mathu anyithu tuwi na ma ghan meyala, tsalina mathu ccen ben nu ma jüh kina pi amansa.

²⁷ Sadukithu na anyi keshü wina hangneng-shagha nbenle khiden. Mathu pahan Jisu wi gho nu keü,

²⁸ “Kesansiwa, Mosa na ithu ghena ayen ha zhüchi: ‘Keujüla npvüza kesü na atsanga nmila ma wubvü teshi nu shü wa lethu, keshüwa shicü benya thsüle kesalina ma cünyu yala denyilewa tsü yaya thsü nsathu yishü.’

²⁹Kheni kuti tsüwi cünyu nyi tagü na ben. Keqhaiwa na ma wubvü yaya nu atsanga nmila shü.

³⁰Tsaseng wi ma cünyu keniwa na denyilewa tsü yaya,

³¹nu kechengwa la tsüti sa. Ma tagü qho denyilewa tsü yaya nu atsanga nmila shü.

³²Asakhenwa denyilewa la shü.

³³Keshü wi hangneng-keshagha tsathang wi nzawa tsüna thowa wubvü saben nu? Ma tagü tsüdila ma ssiben kesalina.”

³⁴Jisu na mathu wi khineng, “Anyithu na kahang hawa wi keshanyi saden,

³⁵isala anyithu keshü wina hangneng-keshagha qothu nu kahang ghaketen wi hang ketenthu na keshanyi sa nben.

³⁶Mathu na tangnyilothu ti sa nu shü nben. Mathu na Anyiza tsangathu sadha, kepaghenanye mathu na keshü wina hangneng-shaghadha.

³⁷Mosa la keshüthu na hangneng- shaghaben kesa mechanshu khi. Aghangbhon kemecang cüki wi ma Apvüwa tsü pi ‘Abraham Nyiza, Isak Nyiza, nu Jakob Nyiza’ khi.

³⁸Ma hangkeben Nyiza khe keshü Nyiza nye, kepaghenanye tsüdila ma wina hangben.

³⁹Ayenkesansithu pahan na khi, “Kesansiwa, mehaitsü luneng chidha!”

⁴⁰Kepaghenanye mathu na pala pi ma keü kü wa.

⁴¹Jisu na mathu keü, “Khati nu Messiya tsüna David shicüle khiya mehai nu?

⁴² Kepaghenanye David na ma ketanla Zakeci lesüshen wi khi, ‘Apvüwa na iPvüwa wi khi: Ikwen ajewa donkiyalo;

⁴³hi nghinyithu pi nccü kenni pen npi kesa thsü chu.’

⁴⁴David na ma pi ‘Apvüwa’ ci lethu, khati nu Messiya tsüna David shicü saya mehai nu?”

⁴⁵Anyi tsüdi ma jühkina keben wi Jisu na ma sansikeyathu wi kiza,

⁴⁶“Nthu na Ayenkesansithu ghena kiden-keshayalo; mathu na agwo- mejuwa kaghazuthu pvünu kegoe nu asenkesapen wi nyu mathu nyuwaküla shalom kesa nen; Sinagogthu nu apen kemehai ntsawa nu kemishu wi kinyikü pen wi ben mvu ketenthu;

⁴⁷denyilethu miwi na mathu ghena kemehaiwa saya nu mathu jjen shuya, nu ammi sala kekhie kesie sa ketenthu le! Mathu kemeten tsüna tsüdi miwi nmehai ntsawa saten le!”