Read Northern Rengma Naga LUK 21 Bible Online

LUK 21 - Northern Rengma Naga bible

LUK 21

¹Jisu na ghangkevüli chi nan kebanthu na mathu keben pi Kekinyijjen keben kechipen wi cüchi keben muya,

²nu ma denyile ketha-u kesü la pisa kenmiewa keni pi cüchi keben muya.

³Ma khi, “Denyile ketha-uwa hana kepa tsüdi miwi kejiki pi chidha.

⁴Kepaghenanye kepathu na mathu keben kejon qei wina pi chi, isala denyile hawa tsü ma sen nu hang keten keben tsüdi pi chidha.”

⁵Sansikeyathu pahan na keben pi Anyiza kecü nu alon kemehai pi Kekinyijjen tsikemehai sa ketheng cüki keccünengli ben. Jisu na khi,

⁶“Nthu na mu keben ha tsüdi matsü na gho lethu, alon kesütanla ma pen wi nbenla benle; tsüdila pasha ben le!”

⁷Mathu na keü, “Kesansiwa, hathu ha kusi saben nu? Nu hathu ha sa keten wi zensu khati saben nu?”

⁸Jisu khi, “Nyu nthu nmechu thsüle kesalina kiden-kesha yalo, kepaghenanye anyi kejon na inyan wina hati khi ghoben, ‘Hi Khrista le’ nu ‘Matsü na ghodha.’ Isala mathu nie nwala.

⁹Nthu na aghikesa nu kekivvü jüh zakeya wi lela nmessila. Kepaghenanye hathu ha atuwa nsathu yishü, isala asakhenwa tsüna npi tetsaki le!”

¹⁰Ma mathu wi khi, “Diyyi kesü na diyyi kepawa ssinu aghisa ben, nu kadiyyi kesü na kesü ssi kesali ben.

¹¹Ciwi ameghükuju ntsa saben; apen tsüdi wi azeng nu adhagha saben; nu tang wi qhethiketen nu amankesa saben.

¹²Isala hathu tsüdi npi kesa tuwi nyu nthu ghan pi metenmesha; nthu ssi wa Sinagogthu wi ajühkaghaten nu nthu pi atssüzüjjen wi chiaben; inyan ghena nyu nthu ssinu kadimithu nu kekhang kesenthu tuwi waben.

¹³Hana nthu ghena Ajühkemehaiwa pi kekhi tsü kemehai kesü saben.

¹⁴ Matsü npi wina khatile khi pi nthu ketanla nthu sheikhiya nu kesa lebengüccü nben lalo,

¹⁵kepaghenanye hi nthu ghinyithu thola nthu matang nu shunya nkesa ajühthu nu kemetsa pi nthu cüben.

¹⁶Nthu bajjathu, nthu cünyuthu, nthu shilithu, nu nthu pvüshangthu na nthu ghan pi nyu kwen wi chi nu mathu na nthu pahan pathiaben.

¹⁷Anyi tsüdila inyan ghena nthu nanmeghü ben.

¹⁸Isala nthu li wi assen kesütanla bhataghaya nben.

¹⁹Zükeqhe nganyalo, nu nthu ketanla nthu hangsha yaben na.

²⁰“Nthu na khathansha wi süpahizithu na Jerusalem vüsen keben muya khe tsüna wan yasa tendhale kesa chüyaben.

²¹Tsaseng wi Judea wi kebenthu na ayikhathu wi bvü wa nsathu yishü; anyunutiwa non wi kebenthu na bvüshu; nu ayela wi ketenthu na anyunutiwa wi ndu lalo.

²² Kepaghenanye hathu ha tsüdi Ntsawajüh na kekhi tsü sacenya thsüle kesalina ‘Kemeten-kemesha tsathang’ saben.

²³Tsü tsathang wi nza atsa-npvü ketenthu nu kinyibvü atsa ssi ketenthu ghena khatila qhethiketen saten nu! Ayyi ha miwi qhethiketen hathakina na ghoben, nu Anyiza wi kemeten na anyithu miwi ghoben.

²⁴Njünnu pi pahan süthi nu kepathu ssinu diyyi tsüdi wi atssüzü sa waben; nu Judah nyi nkenyethu na mathu tsü npi kecu chu Jerusalem cüten ben.

²⁵ “Aghani, asha, nu ghotsithu wi amankesa saben. Ayyi miwi diyyi tsüdila ketizen sa nu atssükedone kaghamo ghena messi ben.

²⁶Anyithu na ayyi ha wi gho ketenwa ghena messi pi shüca waben, kepaghenanye tang wi kekhangthu tsüdi pakuliaben.

²⁷ Anyi Tsawa na kekhang sen nu anyankethang sala akulukeshü miwi ghoden.

²⁸Khathansha wi hathu sa shagha khe nthu na shagha yaki ghangchilo, kepaghenanye nthu hangshakeya na tetsakidha.

²⁹Tsaseng wi Jisu na ajühkaghape ha pi mathu kiza: “Khhaghabvüton nu achanton kepathu tsüdi meshenchilo.

³⁰Khathansha wi tsüthu wa kaghani shigü shagha keten muya khe mazu wa tendha kesa nthu na chüyaden.

³¹Tsü makesü, nthu na hathu ha sa keben kemu wi Anyiza Kadiyyi na gho tendha kesa nthu na chüyaben.

³²“Anyi khili hang kebenthu tsüdi npi keshü tuwi hathu ha tsüdila sacen ben kesa meshenyalo.

³³Atssan nu ayyi na nmilaben, isala ijüh tsü khiela nmila sa nben.

³⁴“Nthu na dsajjü deja nu nansü kahang ha ghena meshen pi leben-güccü nu atsathang tsüwa yala wan ghola aca ti nthu yaya thsü nsale kesalina meghe-metsashhu benlo.

³⁵Kepaghenanye tsüwa tsüna ayyi wi anyi tsüdi miwi ghoden.

³⁶Nthu na sa ketenthu ha tsüdi wi la mehaitsü benya kemehai kezü muya nu Anyi Tsawa tuwi nganyale kesalina keshüthangla hie nu kekhie sa benlo.”

³⁷Jisu na atsathangla aghanan lethu Kekinyijjen wi nyu sansi nu minu lethu ma wa aghaja Oliv Yikha wi ben wa isa.

³⁸Ghanen kaghapenla anyithu na mitu na wa Kekinyijjen wi ma jühkina den.