Read Northern Rengma Naga LUK 23 Bible Online

LUK 23 - Northern Rengma Naga bible

LUK 23

¹Anyi ciwi kebenthu mabenla shagha Jisu ssinu Pilat tuwi wa,

²nu mathu na hati khi pi ma metsimeni, “Ikhang na anyi hawa ha ithu nyi mechu nu mathu na khajana pi Rom Kadimiwa wi nchi lalo kiza, nu ma ketanla ma pi Messiya, kadimiwa tsüle khi keten ghanya le!”

³Pilat na ma wi keü, “No Judah nyi Kadimiwa kwe?” Jisu luneng, “Nthu na hi tsüle khi.”

⁴Pilat na keqhaikedi ntsathu nu anyitenti wi khi, “Hi anyi hawa kemeshensa jjügi mangla mu meya.”

⁵Isala mathu na tsü miwi khi khvu sa. “Ma kesansijüh pi Judea wi anyithu jawi pakivvü shhugho Galilee wina khili he wi ghodha.”

⁶Pilat na ha zakeya wi “Anyi ha Galilee nyi kwe?” keü.

⁷Ma Jisu na Herod kedi sa keben yyi wina ghole kesa chükeya wi ma kesun pi Herod wi chia; tsü tsüwi Herod la Jerusalem wi ben.

⁸Herod na Jisu mukeya wi ma nonghe ntsa sa, kepaghenanye ma Jisu cüki zaya nu matsü kesiela ma ghangchi mvuthi saben. Ma Jisu na amankesa kekuli pahan muya benle saben.

⁹Tsalina Herod na Jisu wi pala kejon keü, isala Jisu na ajüh kesüla nkhi la.

¹⁰Keqhaikedi ntsathu nu Ayenkesansithu na ghola ngan nu kekimenni jüh khi pi Jisu shun ntsa sa.

¹¹Herod nu ma süpahithu na Jisu nankeqhe nu ma nkhichila sa; tsaseng wi mathu na athsümeni kemehai pi ma pvü thsü nu kesun pi Pilat wi chi neng.

¹²Tsü ghanan nten na Pilat nu Herod manyi apvüshang saya; ha tuwi manyi nankemeghüli keten.

¹³Pilat na keqhaikedi ntsathu, keshenpfüthu, nu anyithu cighu chi

¹⁴nu mathu wi khi, “Nthu na anyi hawa hana anyithu ssideja tenle nu ssinu hi wi gho. Hi khili nthu tuwi na ma ghan nandha, nu hi nthu na ma kesami kekimenni jüh kekhi wi tsü ma kesazzi kesü la mu meya.

¹⁵Herod lela ma kesami mu meya, kepaghenanye ma anyi ha kesun pi ikhang wi chi neng cüa. Anyi ha ma keshü qo kekuli kesüla sa nthengle!

¹⁶Tsalina hi ma kihhe cü nu ma teshi chiaden.”

¹⁷Shhukeya Kho kesa tsüdi wi Pilat na mathu ghena atssüzü kesü lisha chi cüden.

¹⁸Isala anyi tsüdila jisha nu “Anyi ha pathilo! Nu ikhang ghena Barabba lisha chi cülo!” isa khi.

¹⁹(Barabba na anyunutiwa wi anyi kepathi ghena kivvü nu ghan pi atssüzü sa theng.)

²⁰Pilat na Jisu teshichi mvu kesalina ma anyitentiwa wi khineng.

²¹Isala mathu na jisha nu “Ma pi kross miwi jenlo! Ma pi kross miwi jenlo!” isa khi.

²²Pilat na kecheng tughuwa mathu wi kiza, “Ma mangwa sazzi theng nu? Hi ma keshü qo kesami mangla mu meya. Tsalina hi ma kihhe cü nu ma teshi chiaden.”

²³Isala mathu na mathu hhai misi ntsa jisha nu Jisu pi kross miwi jenlo khi, nu asakhen wi mathu hhaiwa tsüna khangya.

²⁴Tsalina Pilat na mathu khie keben ti Jisu pi shü thsülo sa.

²⁵Ma mathu na anyi yamvu keben nyu kepathi ghena kivvü nu pi atssüzü sa thsü kethengwa tsü teshichia, nu Jisu pi mathu kemeshen sayalo pi mathu cüa.

²⁶Süpahithu na Jisu ssinu bvüa, nu mathu na wa keten wi Kuren nyi kesü ma nyan Simon, diyyiwa wina anyunutiwa wi gho keten metuya. Mathu na ma ghanya nu kross pi ma pvü thsü nu Jisu sennie thsü.

²⁷Anyitenti keti na ma nieden, tsü jawi nzathu pahan na ma ghena ahathana nu qaiben.

²⁸Jisu na khapeghe wa mathu wi kiza, “Jerusalem nzathu! Ighena nqai lalo, isala nthu ghena nu nthu tsangathu ghena qailo.

²⁹Kepaghenanye anyithu na hati kekhi matsü na ghoden, ‘Nza atsanga nkemithu, atsanga nkepvüghathu, atsanga nkessithu na kemihhi ntsa le!’

³⁰ Tsüna anyithu na ayikhathu wi hati kekhi matsü sadha, ‘Ithu miwi qanca dugholo!’ nu yyishiphon thu wi ‘Ithu shanbhon yalo!’

³¹Kepaghenanye keujüla anyithu na achanton mejjü kebenwa miwi hathu ha sa lethu, jüwa kesawa miwi khati saben nu?”

³²Kesami nyi kepa wi meshu keni la pi Jisu gweghe shü thsüale ssi wa.

³³Mathu na gho “Aligü pen” kesa cukeya wi mathu na Jisu pi kross miwi jen, kesami nyi keni kesü pi ma na ajewa nu kepawa pi tavüwa jen.

³⁴ Jisu na khi, “Iba, mathu kesami teshi pi cülo, kepaghenanye mathu na mangwa saben khe mathu nchü.” Mathu na akezen wwi nu ma thsümeni tsü pi mathu jawi gishüya.

³⁵ Anyithu na ciwi ngan nu ghangben nu Judah nyi ccülikesathu na hati khi nu ma nankeqhe, “Ma nyu kepa wi hangshaya benna ma ketanla ma hangshaya thsülo, keujüla ma Anyiza na kessikeyawa Messiya tsü lethu!”

³⁶ Süpahithu la ma nankeqhe, mathu ma wi gho kessetssü pi ma jjü thsü,

³⁷nu khi, “Keujüla no Judah nyi Kadimiwa lethu, no ketanla no hangsha yalo!”

³⁸Ajüh hati pi ma li wi zhütheng: “Hawa hana Judah nyithu Kadimiwa.”

³⁹Kross miwi jen ketheng kesami nyi kesü na ma kimenni nu khi, “No Messiya nye kwe? No ketanla no hangshaya nu ishinyi la hangsha cülo!”

⁴⁰Isala kepawa na ma kha nu khi, “No Anyiza nmessi kwe, no la kemeshensa wi benthu?

⁴¹Ishinyi tsü hati kesau wi saben, kepaghenanye ishinyi kekuli kutimen wina muyaben, isala ma tsü kesazzi mangla nmi.”

⁴²Isanu ma Jisu wi khi, “Jisu, no Kadimi sa kegho wi icüki la meshen chicülo.”

⁴³Jisu na ma wi khi, “Hi atsentsa no kizaden, no nansü nten na Paradis wi hi gweghe ben wa tendha.”

⁴⁴Amighe taghakeni na wala kecheng kekihhe kecu jüwi aghani na nwegü la nu diyyiwa mabenla jang;

⁴⁵ nu Kekinyijjen wi athsü pi ajenka shon ketheng tsü mezüqhe pi keni sa.

⁴⁶ Jisu na ahhai misikhhali maghachi, “IBa, hi ighamu pi nkwen wi chidha!” Ma ha khichi nu shü wa.

⁴⁷Süpahi meza miwi kediwa na pala tsüthu tsüdi kekuli mukeya wi Anyiza seng nu khi, “Ntsakhiwa ma anyi kemehai kesü le!”

⁴⁸Anyitenti ciwi ngan nu ghang kebenthu tsüdila tsüthu muya nu ahathanala mathu leben cen nu ajjen wi whashan.

⁴⁹ Anyi Jisu chü kebenthu tsüdi nu Galilee wina ma nie keten nzathu na temeja wi ben nu ghang.

⁵⁰Ciwi anyi kesü Judea nyuti kesü Arimatheya wina kegho ma nyan Josef na ben. Ma anyi kemehai nu ketsatan nyi kesü, ma Anyiza Kadiyyi gho keten tsü hieben. Ma la keshenpfüthu kemehu wi anyi kesü lela mathu ajühcen ketheng wi tsü ma jüh nkhuchi.

⁵¹

⁵²Ma Pilat tuwi wa nu Jisu kamang tsü khie.

⁵³Ma wa akamang tsü pieshaya nu linen pi mejuya nu pie wa alonshi wi ho ketheng kheni thola pi npi kechi wi tsü chia.

⁵⁴Hawa hana manga ghanan nu Sabbath tsathang sa wa tendha.

⁵⁵Nza Galilee wina Jisu nie keghothu na Josef gweghe wa nu ashüjjen nu Jisu kamang pi khati ciwi chi khe mu.

⁵⁶ Tsaseng wi mathu na ajjen wi kheneng gho, nu sen wa akamang tsü nyenle kesa ghena hankedemvu kidenya. Ayenwa wi keben ti mathu na Sabbath tsathang wi mnanya.