Read Northern Rengma Naga LUK 24 Bible Online

LUK 24 - Northern Rengma Naga bible

LUK 24

¹Apvüwa tsathang wi ghanen mitu nzathu na mathu kiden ketheng hankedemvu tsü khuya nu ashüjjen wi wha.

²Mathu na ashüjjen jenka wi alon tsü khupheghe kethengla muya,

³tsalina mathu ciwi du, isala Apvüwa Jisu kamangwa tsü nmu.

⁴Mathu na ciwi ngan nu tsü jjügi meshen pi amansa keben wi meshu keni athsümeni cwencwe kesa mphi nu wan gho mathu kete wi nganya.

⁵Nzathu na messi ntsa nu ayyi wi nkhwendu, tsü keni na mathu wi khi, “Nthu mangkesa na keshü jawi hang kebenwa tsü bhaten nu?

⁶ Ma he wi nmi, ma hangneng-shaghadha. Ma Galilee wi keben mangwa le nthu kiza khe tsü meshenyalo.

⁷‘Anyi Tsawa tsü ghan pi kesami nyithu kwen wi chi nsathu yishü, ma pi kross miwi jenben, nu ma ghanan kecheng seng wi hangneng-shaghaben.’ ”

⁸Tsaseng wi nzathu na ma jüh tsü meshenya,

⁹nu ashüjjen wina kheneng gho hathu tsüdi khi pi sansikeyathu taghakhen nu kepathu tsüdi kiza.

¹⁰Nzathu tsüna Magdalen Maria, Joanna, James jja Maria; mathu nu nza kepa wi mathu gweghe ketenthu na hathu ha khi pi apostelthu kiza.

¹¹Isala apostelthu na nzathu kekhi jüh tsüna nyu jühjjüwa le sala mathu n-nondi.

¹²Isala Pitor na shagha bvü sen nu ashüjjen wi wa; ma kukedula ashüjjen wi ghangchi nan athsü ketan khe mangla nmu. Isanu ma ha mangwa sadha nu sala amansa nu ajjen wi kheneng ghoa.

¹³Tsü ghanan mathu meshu keni na anyu kesü Emma wi waden, tsüna Jerusalem manyi jü kilometer taghakhen-u saben.

¹⁴Manyi ciwi pala tsüthu kekuli cüki tsüdi khi pi keccünengli waden.

¹⁵Manyi keccünengli wa keten wi Jisu na ma ketanla manyi tetsaki gho nu mathu gweghe wa.

¹⁶Manyi ma mu lela ma chüshi meya.

¹⁷Jisu na manyi wi keü, “Nshinyi na mangwa jjügi keccünengli wa ten nu?” Manyi na ngan nu ahathanathi ghang wa.

¹⁸Manyi kesü nyan na Kleopa kesawa tsüna khineng, “Jerusalem wina kegho jawi hajü mangwa sa khe tsü cüki nkechüwa tsü no ketan man ha!”

¹⁹Ma manyi wi keü, “Mangwa cüki nu?” Manyi ma wi khineng, “Nazareth nyiwa Jisu, atusenjüh-kechü nyi kesü, Anyiza nu anyi tsüdi tuwi ma jüh nu kekuli kekhang kebenwa tsü miwi kuli kechi cüki le!

²⁰Ithu keqhaikedi ntsathu nu kekhang kesenthu na ma pi shü thsülo kesa ghena ghan pi nyu kwen wi chia, nu ma pi kross miwi jen.

²¹Isala ithu na ma Israel nyi hangshaya ketenwa tsüle kesa nondi ben. Hathu hati kesa na nansü ghanan kecheng sadha.

²²Ikhang jawi nzathu pahan ghena ikhang mansa; mathu na ghanen mitu ashüjjen wi wha,

²³isala ma kamang tsü nmu. Mathu kheneng gho ikhang wi mathu tangnyilothu muya nu tangnyilothu na mathu wi ma hangneng-shaghadha kesa kizale khi.

²⁴Ikhang jawi la pahan ashüjjen wi wha nu nzathu kekhi tsüti muya, isala mathu na ma nmu.”

²⁵Tsaseng wi Jisu na manyi kiza, “Nshinyi kejüphon, nshinyi khatila atusenjüh-kechüthu na kekhithu tsü nondi dhu ben nu!

²⁶Messiya na hathu ha wi ketizen sa nu ma nyankethang mu nkeya-u kwe?”

²⁷Jisu na Ntsawajüh wi Mosa lesüshen na wala atusenjüh-kechüthu tsüdi wi ma cüki zhü ketheng tsü khimetha pi manyi kiza.

²⁸Mathu na gho anyu manyi wale kebenwa tsü tetsakiya, Jisu na ma tsü miwi wa keten ghe sa;

²⁹isala manyi ma cüten nu khi, “Ishinyi gweghe ben walo, minu wadha nu atsajang wa tendha le!” Tsalina ma mathu gweghe ben wa.

³⁰Ma mathu gweghe dsajjüle miz wi donki, amesa khuya nu kemihhi khiechi; tsaseng wi ma tsü pakhhiya nu pi manyi cü.

³¹Tsaseng wi manyi nyon shachi nu manyi na ma chüya, isala ma manyi tuwi na nmu la.

³²Manyi khokho wi khi, “Ma alenca wi ishinyi ccüneng nu Ntsawajüh khimetha pi ishinyi kekiza wi anni na ishinyi leben kemecang ti nsa kwe?”

³³Manyi wan shagha nu Jerusalem wi wha neng, ciwi manyi na sansikeyathu taghakhen na kepathu gweghe keben muya

³⁴nu khi, “Ntsakhiwa Apvüwa na hangneng- shaghadha! Ma Simon yala ma muya thsüdha!”

³⁵Tsaseng wi manyi na alenca wi khati sa nu Apvüwa na amesa pakhhi kechi wi manyi khati nu ma chüya khe khimetha pi mathu kiza.

³⁶Manyi ha khitu keben wi Jisu na wan gho mathu jawi nganya nu mathu wi kiza, “Kecca ya nthu ssiben keyawa salo.”

³⁷Mathu na qhethiketen sa nu acenpvü kesü mu bendhale meshen wa.

³⁸Isala ma mathu wi kiza, “Mangkesa na nthu leben ketizen sa nu nthu leben wi hathu ha n-nondila benten nu?

³⁹Ikwen nu iccüthu ghangchilo, nu ha hi le kesa chüya. Hi panan nu chüya, kepaghenanye acenpvü na asa nu agü nmi, isala nthu na mukeben ti hi tsü tsüthu benle.”

⁴⁰Ma tsüti khi nu ma kwen nu ma ccüthu pi mathu ccüca.

⁴¹Mathu na khili la n-nondi, mathu na anonghe ntsa nu amansa; tsalina ma mathu wi keü, “Nthu na he wi kedsawa mangla benla nmi nu?”

⁴²Mathu anga keshvu kesü pi ma cü,

⁴³nu ma tsü khuya nu mathu tuwi na dsa.

⁴⁴Tsaseng wi ma mathu wi khi, “Hi hathu cüki tsüdila kheni nthu gweghe keben wina khi pi nthu kizadha, Mosa Yenwa, atusenjüh-kechüthu na kezhü, nu Zakeci wi ighena zhü kethengthu tsüdila sacen shaben.”

⁴⁵Tsaseng wi ma mathu leben sha pi Ntsawajüh chüshiya thsü,

⁴⁶nu mathu wi khi, “Hati zhütheng, Khrista na ketizen sa ntsa saben nu ghanan kecheng seng wi keshü wina hangneng-shagha ben;

⁴⁷nu ma nyan wina leben khapeghekeya nu kesami teshi kecü ketsijüh tsü pi Jerusalem wi atuwa sala mizzatenti tsüdi wi nkizathu yishü.

⁴⁸Nthu na pala hathu ha ghena chüzathu.

⁴⁹ Nu hi iBa na khishi ketheng tsü pi nthu miwi kesunchi cüben. Isala nthu na tang wi kekhang na nthu miwi npi kedugho chu hie nbenlathu yishü.”

⁵⁰ Tsaseng wi ma anyunutiwa wina mathu ssi shhula Bethani kecu wi wa nu ciwi ma kwen zanki pi mathu miwi chi nu sawegü pi mathu cü.

⁵¹Ma sawegü pi mathu cü keben wi ma mathu teshi nu ma ssinu tang wi kia.

⁵²Mathu ma kinyi nu mathu nonghe ntsa sala Jerusalem wi wha neng,

⁵³nu matsü tsüdi wi mathu na Kekinyijjen wi ben nu Anyiza seng.