Read Northern Rengma Naga LUK 3 Bible Online

LUK 3 - Northern Rengma Naga bible

LUK 3

¹Kadimi Tiberia na kadikesa mapi tagha mangawa wi Pontia Pilat na Judea wi ahng sa, Herod na Galilee wi kekhang sen, nu ma cünyuwa Filip na Ituria nu Trakhonit yyi wi kekhang sen; Lusania na Abilen yyi wi kekhang sen,

²nu Anna nu Kaifa manyi na keqhaikedi ntsathu sa. Tsü tsüwi Zekhariya tsa Johan na ayyikeshü wi keten wi Anyiza jüh na ma wi gho.

³Tsalina Johan na Jordan Ghaku kevü ayyi maben wi wa nu nyu sansi, “Nthu kesami wi leben khapegheya nu baptaiz sayalo, isathu Anyiza na nthu kesami teshi cüben.”

⁴ Hana atusenjüh- kechüwa Isa lesüshen wi zhü ketheng tsüti: “Anyi hhai kesü ayyikeshü wi jishaben: ‘Apvüwa len ghena kidenyalo; nu ma len satemeshon yalo.

⁵Ayyiketijü tsüdi sa pi misi, nu ayikha tsüdi sa pi menni thsüaben. Alen kekhhakhuthu sa pi meshon, nu ghagu-ghana sa pi tijü thsüaben.

⁶Anyi tsüdila Anyiza hangshakeya tsü muyaden.’ ”

⁷ Anyitenti na Johan wi baptaiz sayale shhugho. Ma mathu wi kiza, “Nthu amaghangthu! Thowa na Anyiza leben kekha gho keten wi tsü bvüshhu yalo nthu kiza nu?

⁸ Nthu na kesami wi leben khapegheyadha le kesa kekulithu sa pi nyu ccücalo. Nu nthu jawi Abraham tsüna nthu baqhai le nkhi lalo. Hi nthu kizaden, Anyiza na alon hathu pi Abraham tsangathu sacüya mehai le!

⁹ Ampvü na achanton ccü wi ben, achanton ma bi nkemehai kebünwa shüchi pi anni wi khala chiaden.”

¹⁰Anyithu na ma wi keü, “Isathu, ikhang khati sa nu?”

¹¹Ma luneng, “Anyi thowa na agwomejuwa keni ben khe kesü pi nkemiwa cü, nu anün kebenwa lela tsüti sayalo.”

¹² Khajana kekhüthu pahan na ma wi baptaiz sayale gho nu ma wi keü, “Kesansiwa, ikhang khati sa nu?”

¹³Ma mathu kiza, “Yalo sa ketheng miwi meyala.”

¹⁴Süpahithu pahan la ma wi keü, “Ikhang tsü khati sa nu?” Ma mathu wi khi, “Anyi kesü la meten nu apisa meyala nyelela milikemesa wi thola nkimennila. Nthu thün pi leben ghashu sen tenlo.”

¹⁵Anyithu na nkehiecha sa keben ghena mathu tsüdi aleben wi Johan ha Messiya la nyenu isa meshen.

¹⁶Tsalina Johan na mathu tsüdi wi kiza, “Hi atssü pi nthu baptaiz saben, isala anyi iseng wi gho ketenwa tsüna imiwi diki. Hi ma ccüguwen lela nlisha qo le! Ma Kemetha Ghamu nu anni wi nthu baptaiz sa cüben.

¹⁷Ma amagha kesü ma kwen wi ben, nu tsü pi asu kewhen pi nu ma non pi ma sabe wi chiya, isala ma gwen pi nyen nketen nni wi mecang shaben.”

¹⁸Alen kejon wi la Johan na Ajühkemehaiwa pi anyithu sansi nu mathu kahang kemili yalo khi khvu sa.

¹⁹ Isala Johan na Herod kha, kepaghenanye ma ma cünyuwa wubvü Herodia tsü yaya, nu pala nkemehai kejonla kuli.

²⁰Tsü miwi nkemehai kekuli tsüna Herod na Johan ghan pi atssüzüjjen wi chia.

²¹Anyi tsüdi baptaiz sa keya seng wi Jisu la baptaiz saya. Ma kekhie sa keben wi tang wi shachi,

²² nu Kemetha Ghamu na nkhetsü kesü ti ceng sen ma miwi dugho. Nu tang wi ahhai kesü na gho, “No hi kaghaliwa itsa. No hi kenen ntsawa.”

²³Jisu na ma kahang mapi changha jüwi ma kekuli sa shagha. Nyu na ma Josef tsa le meshen, Josef na Heli tsa,

²⁴ma Matthat tsa, ma Levi tsa, ma Melkhi tsa, ma Janai tsa, ma Josef tsa,

²⁵ma Mattathia tsa, ma Amos tsa, ma Nahum tsa, ma Esli tsa, ma Naggai tsa,

²⁶ma Maath tsa, ma Mattathia tsa, ma Semein tsa, ma Josef tsa, ma Judah tsa,

²⁷ma Joanan tsa, ma Rhesa tsa, ma Zerubbabel tsa, ma Shealtiel tsa, ma Neri tsa,

²⁸ma Melkhi tsa, ma Addi tsa, ma Kosam tsa, ma Elmadam tsa, ma Er tsa,

²⁹ma Joshua tsa, ma Eliezer tsa, ma Jorim tsa, ma Matthat tsa, ma Levi tsa,

³⁰ma Simeon tsa, ma Judah tsa, ma Josef tsa, ma Jonam tsa, ma Eliakim tsa,

³¹ma Melea tsa, ma Menna tsa, ma Mattatha tsa, ma Nathan tsa, ma David tsa,

³²ma Jesse tsa, ma Obed tsa, ma Boaz tsa, ma Salmon tsa, ma Nashon tsa,

³³ma Amminadab tsa, ma Admin tsa, ma Arni tsa, ma Hezron tsa, ma Perez tsa, ma Judah tsa,

³⁴ma Jakob tsa, ma Isak tsa, ma Abraham tsa, ma Tera tsa, ma Nahor tsa,

³⁵ma Serug tsa, ma Reu tsa, ma Peleg tsa, ma Eber tsa, ma Shela tsa,

³⁶ma Kainan tsa, ma Arfaxad tsa, ma Shem tsa, ma Noah tsa, ma Lamek tsa,

³⁷ma Methusela tsa, ma Enok tsa, ma Jared tsa, ma Mahalaleel tsa, ma Kenan tsa,

³⁸ma Enosh tsa, ma Seth tsa, ma Adam tsa, ma Anyiza tsa.