Read Northern Rengma Naga LUK 5 Bible Online

LUK 5 - Northern Rengma Naga bible

LUK 5

¹ Ghanan kesü Jisu na Gennesaret Ghajü ghüsa wi ngan nu anyitenti na ma vüsen nu Anyiza jüh kinaben.

²Ma ahun keni na aghajü katen wi keben mu; tsüna angakaghanthu na teshi nu mathu kaghanthsü bhu wa kesa jü.

³Jisu na ahun kesü, Simon ji wi tsü donkiya nu ma tsü deshen pi keu wha thsülo kiza. Jisu na ahun wi donkiya nu anyithu sansi.

⁴Jisu na ajüh kekhi cen seng wi Simon wi kiza, “Ahun deshen pi atssü kedhu wi du thsü nu nthu anga ghanle kesalina kaghanthsü pi cüchilo.”

⁵ Simon na luneng, “Kesansiwa, ikhang na khija ghaja thangthang cü lela mangla ghan meya. Isala no tsüti khi lethu hi kaghanthsü pi cüchi nanben.”

⁶ Isanu mathu na kaghanthsü pi kecüchi wi anga kejon ghanya kesalina mathu kaghanthsü na paqhea keten ti sa wa.

⁷Tsalina mathu kwen sa pi apvüshang ahun kepawa wi ketenthu cichi nu ghola mathu kiqa thsü. Mathu gho nu ahun keni qho anga pi pongti sa kesalina ahun na tssü wi dua keten ti sa wa.

⁸Simon Pitor na tsü mukeya wi Jisu tuwi akhhutsü nu khi, “Apvüwa, hi wina bvülo; kepaghenanye hi kesami nyi le!”

⁹Pitor nu ma gweghe ketenthu na anga kejon ghanya kesalina tsüdila amansa.

¹⁰Tsüti Simon gweghe keten Zebedee tsa keni James nu Johan manyi la amansa. Jisu na Simon wi kiza, “Nmessi lalo, nthu na khili nten na anyi kaghanthu sa wa tendha.”

¹¹Mathu na ahun zanshi pi aghüsa wi chitheng nu pala tsüdi teshi nu ma nie wa.

¹²Kuti wi Jisu na anyuti kesü wi keben ciwi agükedsakenaa nyi kesü na ben. Ma Jisu muya meyi ma mmi zan nccüggü nu khi, “Apvüwa, no saya mehai lethu hi sa pi mehai cülo!”

¹³Jisu na ma kwen chang pi ma miwi chi nu khi, “Hi saya mehai, mehai yalo!” Tsümeyi agükedsakenaa tsüna anyi tsü teshia.

¹⁴ Jisu na ma wi kiza, “No ha pi thola nkiza lalo, isala wa ngwo pi keqhaikediwa ccüca nu no mehai yadhale kesa tsüdila chüya thsüle kesalina Mosa na kekhi ti ahhansha sachilo.”

¹⁵Isala ma wa Jisu cüki khi pi kepong sa kechi wi anyitenti na ma jüh kina nu mathu kesakinaa sa pi mehai yale kesalina gho.

¹⁶Isala Jisu na kecaghang pen kesü wi wala kekhie sa wa.

¹⁷Ghanan kesü Jisu na nyu sansi keben wi Farisithu nu Ayenkesansithu na Galilee nu Judea wi anyuti tsüdi wi nu Jerusalem wina gho ciwi donkiben. Nu Apvüwa kekhang na Jisu yala kesakinaa sa pi mehai cüle ma ssiden.

¹⁸Anyi pahan na kecügüshü nyi kesü pi awe wi chi piegho nduku wi du nu pila Jisu tuwi chicüle sa.

¹⁹Isala anyi na ji mtsü kesalina mathu na ma pienu nduku wi kedulen mu meyala. Tsalina mathu na ma pienu ajjen mili wi ki aku bhiya nu ma pi awe miwi na anyithu jawi Jisu tuwi dugho thsü.

²⁰Jisu na mathu kenondi mukeya wi ma anyi tsüwa wi kiza, “Ipvüshangwa, no kesami teshi pi no cüdha le!”

²¹Farisithu nu Ayenkesansithu na mathu jawi kekeüli, “Anyi hawa ha khati kesa na Anyiza kethenjüh khiben nu? Anyiza ketan khe thowa na nyu kesami teshi pi cüya mehai nu?”

²²Jisu na mathu kemeshen tsü chüya nu mathu wi khi, “Mangkesa na nthu leben wi tsüti meshenben nu?

²³‘No kesami teshi pi cüdha,’ nyelela ‘Shaghanu alentsen walo,’ manyi khawa kekhiwa le nu?

²⁴Hi Anyi Tsawa na ayyi wi kesami teshi pi cüya kemehai kekhang benle kesa pi nthu ccücaden.” Tsalina ma anyi kecügüshüwa wi khi, “Hi no kizaden, shaghala nwe keshiphi pieya nu njjen wi whalo!”

²⁵Tsümeyi mathu tuwi na ma shagha kheni ma jen keten we keshiphi tsü khuya nu Anyiza seng sen nu ma jjen wi wha.

²⁶Mathu tsüdila amansa ntsa sa. Mathu na messi nu Anyiza seng nu khi, “Ikhang na nansü pala amankesa ntsa muyadha!”

²⁷Tsaseng wi Jisu na wa khajana kekhü nyi ma nyan Levi tsüna ma pen wi donki keben muya. Jisu na ma wi kiza, “Hi nie ghalo.”

²⁸Levi na shagha pala tsüdila teshi nu ma nie wa.

²⁹Levi na Jisu ghena ma jjen wi kemishu kesü kiden, nu akejjenthu jawi khajana kekhüthu nu anyi kepathu la kejon gweghe donkiben.

³⁰ Farisithu nu Ayenkesansithu pahan na Jisu sansikeyathu ssinu keccücanli nu khi, “Nthu mangkesa na khajana kekhüthu nu kesami nyithu gweghe dsajjüten nu?”

³¹Jisu na mathu luneng, “Anyi sanaa kebenthu ketan khe mehai kebenthu na dawa kechüwa nsenla mehai.

³²Hi anyi ketsatanthu ciyale ngho, isala kesami nyithu leben khapegheya thsüle kesalina ghole!”

³³Anyi pahan na Jisu wi kiza, “Johan sansikeyathu na matsü kejon wi la zi nu kekhie saten nu Farisithu la tsüti saden. Isala no sansikeyathu tsü dsajjü benden.”

³⁴Jisu na mathu wi kiza, “Nthu na keshanyi kemishu wi akejjenthu na shanyiwa mathu gweghe keben chu ndsajjüla ben thsüya mehai kwe? Tsüti saya nben le!

³⁵Isala mathu jawi na shanyiwa ssibvüa keten matsü na ghoden, ciwi ccüna mathu na ziben.”

³⁶Jisu na ajühkaghape ha la pi mathu kiza, “Thola athsü ketheü mezüqhe pi kaghawen khhwen nten. Keujüla ma tsüti sa lethu, athsü ketheüwa tsü mezüqhe nu ketheüwa kemezüqhe tsü la kaghawenwa ghena satiya nben.

³⁷Nyelela thola kisengtssü ketheü pi akhüti kaghawen wi chi nten. Keujüla ma tsüti sa lethu, kisengtssü ketheü tsüna akhüti tsü pvükhhi, nu kisengtssü na khatsü nu akhüti la yasaben.

³⁸Tsüti kesawa nye, kisengtssü ketheü tsü pi akhüti ketheü wi nchithu yishü.

³⁹Thola kisengtssü kaghawen kejjü seng wi ketheüwa tsü jjü mvu nten, kepaghenanye ‘ma kaghawenwa mehai le khiden.’ ”