Read Northern Rengma Naga LUK 6 Bible Online

LUK 6 - Northern Rengma Naga bible

LUK 6

¹ Sabbath tsathang kesü wi Jisu na allithu pvüdhi wa. Ma sansikeyathu na asubi mahan pi mathu kwen wi menu nu dsaben.

²Farisithu pahan na keü, “Nthu mangkesa na Sabbath tsathang yen tsü pakhhi ben nu?”

³ Jisu na mathu luneng, “David nu ma nyithu na ghamaya kesa wi khati sa khe nthu na si meya kwe?

⁴ Ma Anyiza jjen wi du nu keqhaikedithu ketan khe kepa wi kedsa ayen nkemi mesawa tsü khuya nu dsa nu pi ma nyithu la cü.”

⁵Nu Jisu na khi, “Anyi Tsawa ha Sabbath Pvüwa la le.”

⁶Sabbath tsathang kepa wi Jisu na Sinagog wi wa nyu sansiben. Ciwi anyi kesü ma kwen ajewa kecügüshü na ben.

⁷Ayenkesansithu nu Farisithu na Jisu Sabbath tsathang wi nyu sa pi mehaicü tenlanu ghang ben, kepaghenanye mathu na ma kesazzi muyathu ma kimenni cüle saben.

⁸Isala Jisu na mathu kemeshen tsü chüya nu kecügüshüwa wi kiza, “Shagha nu he atuwi gholo.” isanan ma shagha ciwi nganya.

⁹Tsaseng wi Jisu na mathu wi kiza, “Hi nthu keüben: Sabbath tsathang wi pala kemehai kulila nkemehai kuli nu? Kahangli kesü hangshayala yasa pi kesa ayen ben nu?”

¹⁰Ma mathu tsüdi ghang kevüli chi nu anyi tsüwa wi kiza, “Nkwen chang chilo.” Anyi tsüwa na tsüti sachi nan ma kwen na mehai nengya.

¹¹Isala mathu na alebenminu nu mathu jawi Jisu pi khati sanu kesa keccünengli wa.

¹²Tsü tsüwi Jisu na kekhie sale ayikha kesü miwi ki nu ghaja thangthang Anyiza wi kekhie sa.

¹³Atsathang keshagha wi ma sansikeyathu ci pi ma wi chi nu mathu jawi meshu taghakeni kessiya nu tsü nyan pi Apostel ciya:

¹⁴Simon (pi Pitor le khi ketenwa) nu ma cünyuwa Andria; James nu Johan; Filip nu Bartholoma,

¹⁵Mathi, Thoma, Alfia tsa James, nu Simon (pi Leben kezüwa ciden),

¹⁶James tsawa Judah, nu Iskariot Judah nyu kematsawa.

¹⁷Jisu na ayikha wina apostelthu ssi dugho ketijü wi ngan nu ciwi ma sansikeyathu kejon na ben. Ciwi anyi kejon na Judea, Jerusalem, nu Tur nu Sidon tssüghüsa nyunutithu wina gho,

¹⁸mathu na ma jühkina nu mathu kesakinaa sa pi mehaiyale ghoben. Nkemehai ghamuthu na pondeja ketenthu la gho nu sa pi mehai cü.

¹⁹Anyi tsüdila ma payale sa, kepaghenanye ma wina kekhang shhugho nu mathu tsüdi sa pi mehai cüben.

²⁰“Nthu ketha-uthu kemihhi ntsa; kepaghenanye Anyiza Kadiyyi tsüna nthu ji saden!”

²¹“Nthu khili ghama kebenthu na kemihhi ntsa; kepaghenanye nthu na ben yaden!” “Nthu khili qai kebenthu na kemihhi ntsa; kepaghenanye nthu na anonghe yaden!”

²² “Anyi Tsawa ghena nyu na nthu nanmeghü, nthu meya mvu, nthu kimenni, nu nthu nkemehai khi lethu, nthu na kemihhi ntsa!

²³ Tsü ghanan nthu anonghe nu nashü benlo, kepaghenanye nthu kutimen tsüna tang wi ben. Kepaghenanye mathu bamyithu la atusenjüh-kechüthu miwi tsü makesü sale.

²⁴“Isala nthu khili kebenthu ghena qhethiketen saben; nthu na hang pi ccayadha!”

²⁵“Nthu khili kejonla kebenthu qhethiketen saben; nthu na ghama ben!” “Nthu khili anonghe kebenthu qhethiketen saben; nthu anongü nu qai ben!”

²⁶“Nyu na nthu seng kebenthu qhethiketen saben; kepaghenanye mathu bamyithu la milikemesa tusenjüh-kechüthu cüki tsü makesü khi .

²⁷“Isala ijüh za kebenthu, hi nthu kizaden: Nthu ghinyithu tizenyalo, nthu nanmeghü ketenthu ghena kemehaiwa sa,

²⁸sawegü pi nthu kishencü ketenthu cü, nu nthu nkhichila ketenthu ghena kekhie salo.

²⁹Keujüla nyu ndephi kesü cen cü lethu, ma ya pahanwa la cen thsülo; keujüla nyu nthsü khuya lethu, ma ya ngwomejuwa la khuya thsülo.

³⁰Nyu na nthu wi pala kekhie tsüdila pi cülo, nu nyu nthu ji khuya lela tsü nkhie neng lalo.

³¹ Nyu ya nthu kenenwa sa thsü mvu keben tsüti nthu la nyu kenenwa satenlo.

³²“Keujüla nthu na nthu tizen ketenthu ketan tizen lethu, nthu mangkesa na kemihhi ghang ten nu? Kesami nyithu lela nyu mathu tizen ketenthu tizenten le!

³³Nu keujüla nyu nthu ghena kemehai kuli ketenthu ghena ketan nthu la mathu ghena kemehaiwa kuli lethu, nthu mangkesa na kemihhi ghang ten nu? Kesami nyithu lela tsü makesü saten le!

³⁴Nu keujüla mu nengya kemehaithu wi ketan nthu ji pi nna thsü lethu, nthu mangkesa na kemihhi ghang ten nu? Kesami nyithu la mathu ji pi kesami nyithu nna thsü nu kejon mu nengyale sa tenle!

³⁵Isala nthu nankemeghüthu tizen, nu mathu ghena kemehaiwa salo; pala pi nyu nna thsü nu mu neng yale nsa la. Isathu nthu kutimen muyaben, nu nthu na Kemisintsa Anyiza tsangathu sayaben. Kepaghenanye ma nkemehaithu nu gheshighenathu tuwi lela mehaiden.

³⁶Nthu Ba na nyu nantizen keten ti nthu la nyu nantizen tenlo.

³⁷“Nyu kesami nbha la, isathu Anyiza la nthu kesami bha nben; nyu n-nyuwa nsa la, isathu Anyiza la nthu n-nyuwa sa nben; nyu kesami teshi pi cülo, isathu Anyiza la nthu kesami teshi pi cüben.

³⁸Pala pi nyu cülo, isathu Anyiza la pi nthu cüben; tsüna kede kemehai sala deshenchi, kecügüchi, nu zügüpongca pi nthu thsü wi keshuchi cüben. Kepaghenanye nthu na kede pi nyu kecü tsüti Anyiza la kede pi nthu ccü neng shaben.

³⁹ Nu Jisu na ajühkaghape ha pi mathu wi kiza, “Anyon nkemu nyi kesü na kepawa lentsütsonya nben; keujüla ma tsüti sa lethu manyi qho ayyiku wi khuliduaben.

⁴⁰ Shüka kebenwa tsüna ma kesansiwa miwi ndiki; isala shüka kebenwa tsü lela shüka cenya lethu ma la ma kesansiwa tsüti sayaben.

⁴¹“Mangkesa na n-nyon wi kenenkuwa keti keben tsü nchüla ncünyuwa nyon wi kenenkuwa kizzakeu keben tsü ghang ten nu?

⁴²No khati nu n-nyon wi kenenkuwa keti keben tsü nmula ncünyuwa wi ‘Icünyuwa, hi n-nyon wi kenenkuwa kizzakeu keben tsü khüshi cü na,’ isa khiya mehai nu? Nthu nkenyeghekesathu! Atuwa sa nthu nyon wi kenenkuwa keti keben tsü khüshilo, isathu ncünyuwa nyon wi kenenkuwa kizzakeu keben tsü mehaitsü mushiya mehai le.”

⁴³“Achanton kemehai na ma bi nkemehai bün nten; nyelela ma ton nkemehai na ma bi kemehai bün nten.

⁴⁴Achanton tsüdila ma bi wina chüyaden; nthu na aghazüton wi khhaghabvü bi laya nten, nyelela ataqaeton wi kemeshentsse bi laya nten.

⁴⁵ Anyi kemehai nyi na ma leben wi pala kemehai keben tsü sen shhugho den; nu anyi nkemehai nyi na ma leben wi pala nkemehai keben tsü sen shhugho den. Kepaghenanye anyi kesü ma leben wi mangwa ben khe ma pang pi tsü khishi chiden.

⁴⁶“Nthu mangkesa na, ‘Apvüwa, Apvüwa,’ hi ci nu hi salo pi nthu kekiza tsü sa nten nu?

⁴⁷Anyi thowa na hi wi gho ijühthu zaya nu tsü saten khe ma khati kesa khe hi pi nthu ccücaden.

⁴⁸Anyi tsüwa tsüna ma jjen pi alonshi hoh pi dhugü sa nu ma miwi kedegüki pi sa ketheng ti le! Aghaku na pong menni pi atssüdan sagho ajjen tsü shun lela qanca nben, kepaghenanye tsü na mehaitsü satheng.

⁴⁹Isala thowa na ijühthu zaya nu tsü sa nten khe tsüna anyi kesü na ma jjen pi ayyi nchhüla magi kedegüki pi sa ketheng ti le! Atssüdan sagho ajjen tsü shun nu tsüna qanca, nu tsü keyasa na qhethiketen sa!”