Read Northern Rengma Naga LUK 7 Bible Online

LUK 7 - Northern Rengma Naga bible

LUK 7

¹Jisu na hathu ha tsüdi khi pi anyithu kiza cenkeya seng wi Kapernaum wi wa.

²Rom kedinyi kesü na amagha kesü ma ghali ntsa sa ketenwa tsüna naa pi shü keten ti saben.

³Kediwa na Jisu cüki zakeya wi ma Judah nyi keshenpfüthu pahan kesunchi pi Jisu ya ghola ma maghawa tsü sa pi mehai cülo cichi thsü.

⁴Mathu na Jisu wi gho keshikene nu khi, “Anyi hawa ha no ma ghena kulichi jiketsü.

⁵Ma ithu nyithu tizenten nu ma ithu ghena Sinagog kesü sacü le.”

⁶Tsalina Jisu na mathu gweghe wa. Ma wala ajjen tsü cu keten pang wi kediwa na ma pvüshangthu kesunchi pi Jisu wi kiza thsü, “Kediwa, no ketizen nsala, kepaghenanye hi no ya ijjen kekhwen wi la ndugho thsü qo,

⁷nyelela hi ntuwi lela ngho qo le! No ajüh ketan khichilo isanu imaghawa yala mehaiya thsülo.

⁸Hi la kedi kekhu wi keben nyi kesü nu ikekhu wi süpahithu la ben. Hi kesü kizala, ‘walo!’ isathu ma waden; kepawa kizala, ‘gholo!’ isathu ma ghoden; nu hi imaghawa kizala, ‘Ha salo!’ isathu ma tsü satenle!”

⁹Jisu na ha zakeya wi ma mansa; ma khapeghe wa anyitenti ma nie ketenthu wi khi, “Hi nthu kizaden, hi Israel nyithu jawi lela khiela kenondi hati npi muyale!”

¹⁰Nyilothu na kediwa jjen wi wha neng nan ma maghawa na mehaiya kebenla muya.

¹¹Tsaseng wi Jisu na ma sansikeyathu nu anyitenti keti kesü gweghe sen nu anyuti kesü Nain wi wa.

¹²Ma anyuti khweti tetsaki wa keten wi nyu na anyi keshü kesü pienu vhü waden. Keshüwa tsüna denyile kesü tsa ma ketan, nu anyuti wi anyitenti na ma gweghe waden.

¹³Jisu na ma mukeya wi ma ghena leben güccüya nu ma nzawa wi khi, “Nqai lalo.”

¹⁴Isanu ma atuwi whala kamang-nku tsü pachi nan anyi tsü pie ketenthu na ngan wa. Jisu na khi, “Pvüzawa! Hi no kizaben, shaghalo!”

¹⁵Tsümeyi keshüwa na shagha donki nu ajühkhi shagha, nu Jisu na ma pi ma jja ccü neng.

¹⁶Mathu tsüdila messi nu Anyiza seng, nu hati khi, “Atusenjüh-kechü keti kesü na ithu jawi ghodha. Anyiza na ma nyithu hangshayale ghodha.”

¹⁷Jisu cüki ha Judea nu ayyi tsü kevü tsüdi wi la khi wa.

¹⁸Johan sansikeyathu na pala hathu cüki tsüdi pi ma kekiza wi ma sansikeyathu meshu keni cichi,

¹⁹nu kesun pi Apvüwa wi hati keü thsü, “No, Johan na gho tenle kekhiwa tsüla ithu na kepa wi hie benla nu?”

²⁰Manyi na Jisu wi kegho wi hati khi, “Johan Baptizwa na ishinyi kesun pi no gho tenle kekhiwa tsüla ithu na kepa wi hie benlanu kesa keü thsüben?”

²¹Tsü tsüwi Jisu na kesakinaathu, khuma-khujü kepvüthu, nu nkemehai ghamu kessithu sa pi mehai cü, nu anyon nkemuthu ya muya thsüben.

²² Ma Johan nyilo keni wi kiza, “Whala nshinyi na mangwa muya nu zaya khe pi Johan kizalo: anyon nkemuthu na muya, accü nkemehaithu na lentsenya, agükedsakenaathu sa pi mehai cü, akhuna ketecuthu na zaya, keshüthu sa pi hangneng cü, nu Ajühkemehaiwa pi ketha-uthu sansi cü.

²³Anyi imiwi nkesütula kesathu na khatila mihhidha nu!”

²⁴Johan nyilothu na kebvü seng wi Jisu na Johan cüki khi pi anyitenti wi kiza: “Nthu na ayyikeshü wi Johan wi mangwa muya benle meshen nu wa nu? Ameghü na aghang mo kuli keben tsü kwe?

²⁵Nthu na mangwa muya nu? Athsümeni mehaitsü kiden pvü ketenthu tsü kwe? Anyi athsümeni tsüti kiden pvü nu keyakeshen sa hang ketenthu tsüna kadijjenthu wi muyaden!

²⁶Hi kizalo, nthu na mangwa ghang wa nu? Atusenjüh- kechü kesü kwe? Anle, ntsakhiwa, isala nthu atusenjüh-kechü kesü miwi kediki muyadha.

²⁷ Kepaghenanye Johan ha ghena Ntsawajüh na khiben: ‘Anyiza na khi, hi ntuwi na hi nyilo kesun pi nlen sa thsüden.’

²⁸Jisu na khi, ‘Hi nthu kizaden, nza gwo wina hang keshagha jawi thola Johan miwi kediki nmi, isala Anyiza Kadiyyi wi kizza ntsawa na Johan miwi dikiben.’ ”

²⁹ Anyi tsüdila ma jüh zaya; mathu nu khajana kekhüthu na Anyiza ketsatan jüh nieya nu Johan wi baptaiz saya.

³⁰Isala Farisithu nu Ayenkesansithu na Anyiza wi mathu ghena kebenwa tsü meya mvula nu Johan wi baptaiz nsa mvula.

³¹Jisu na khineng, “Hi nansü ayyi nyithu ha pi mangwa ghapeya mehai nu? Mathu na khati kesa nu?

³²Mathu na ghanyithu asenkesapen wi donki kebenthu ti le. Mathu na khokho wi khi, ‘Ikhang na nthu ghena keshanyi khwi sa lela nthu na n-nashü! Ikhang na nthu ghena keshü khwi sa lela nthu na nqai!’

³³Johan Baptizwa na gho zi nu kisengtssü njjü, nthu na ‘Ma atsaghang ssiten le!’ khi.

³⁴Anyi Tsawa na gho dsa nu jjü nan, nthu na ‘Anyi ha ghangchilo! Ma ahhaisha nu kisengtssü jjüden, khajana kekhüthu nu kesami nyithu pvüshangwa le!’ isa khi.

³⁵Isala Anyiza kemetsawa tsü yakeyathu tsüdila atsentsa pi ccücaden.

³⁶Farisi kesü na Jisu ghola ma gweghe shitawa nün dsalo cichi, nu Jisu na ma jjen wi wa dsajjü le donkiben.

³⁷Anyuti ciwi nza kesami nyi kesü na hangben. Nza tsüwa tsüna Jisu na Farisiwa jjen wi dsajjü benle kesa zaya nu ma hankedemvu deli pi alabaster hikhu pongti chi sen nu gho,

³⁸Jisu sengwa ngan, nu ma ccü wi qai nu ma nyontssü lle pi Jisu ccü zügüben. Isanu ma lissen pi Jisu ccü nyen nu kimang, nu hankedemvu deli tsü pi ma ccü nyen.

³⁹Farisi Jisu ci kechiwa tsüna ha muya nu ma ketanla hati khi, “Keujüla anyi hawa ha ntsakhiwa atusenjüh-kechü kesü lethu, nza ma pa kebenwa ha thowa khe kechü-u; ma nza hawa ha khati kesami wi hangten khe kechü-u nale!”

⁴⁰Jisu na ma wi kiza, “Simon, hi pala kesü pi no kizaden.” Simon na khi, “Anlo, kesansiwa, pi hi kizalo.”

⁴¹Jisu na khi, “Ciwi meshu keni na apisa pi nyu nna thsü ketenwa menpvü ben; meshu kesü na akutimen meza manga nu kepawa na deni tsüti ma menpvü ben.

⁴²Manyi qho ma menkepvü tsü dhi meyala, tsalina ma menkepvü tsü teshi pi manyi qho cüa. Isathu, ma manyi thowa tizen kayi cü nu?”

⁴³Simon na luneng, “Hi kemeshen tsü amenkepvü kejiwa teshi pi kecüwa tsü le!” Jisu na khi, “No khiti yadha.”

⁴⁴Tsaseng wi ma nzawa wi khapegheya nu Simon wi kiza, “No nzawa ha muben ma? Hi njjen wi dugho lela no tsü atssü la pi iccü nbhu thsü, isala ma ma nyontssü pi iccü zügü nu ma lissen pi nyen cüdha.

⁴⁵No hi kimang nu ssi meya, isala ma tsü hi njjen wi dugho meyi iccü kekimang npi teshi.

⁴⁶No oliv deli pi ili nyen ncü, isala ma deli hankedemvu pi iccü nyen cüdha.

⁴⁷Hi no kizaden, ma ketizen keti pi ccüca kechi tsüna ma kesami kejon teshi pi cüdha. Isala thowa na kesami keu teshi pi cü khe ketizen keu ketan pi ccücaben.”

⁴⁸Tsaseng wi Jisu na nzawa wi kiza, “No kesamithu teshi pi cüdha.”

⁴⁹Ma gweghe miz wi donki kebenthu na mathu ketanla khi, “Nyu kesamithu lela teshi pi cü kebenwa ha thowa nu?”

⁵⁰Isala Jisu na nzawa wi khi, “No kenondi na no hangsha yadha, nleben cca whalo.”