Read Northern Rengma Naga LUK 9 Bible Online

LUK 9 - Northern Rengma Naga bible

LUK 9

¹Jisu na sansikeyathu Taghakeni cighu chi nu atsaghangthu jügüshiya nu kesakinaathu tsüdi sa pi mehaiya kemehai kekhang pi mathu cü.

²Tsaseng wi ma mathu ya Anyiza Kadiyyi cüki khi pi nyu sansi nu kesakinaathu sa pi mehai cülo kesa kesunshi chi.

³ Ma hati mathu wi kiza, “Nthu kijünyi kewa ghena mangla npvüla; akhhatssü, ajula, kedsakejjü, apisa, nu agwomejuwa gilli lela npvü la.

⁴Thowa na nthu ssiya khe anyu tsü npi keteshi chu ajjen ciwi benlo;

⁵ khie wi anyithu na nthu ssi meyala khe mathu na kemessi benle kesa zensu wina nthu na anyu tsü teshi wa keten wi nthu ccü wi ayyinikhu tsü kekhashalo.”

⁶Sansikeyathu na anyu tsüdi wi wala Ajühkemehaiwa pi nyu sansi nu anyithu kesakinaa sa pi mehai cü.

⁷ Galilee wi kekhang kesenwa Herod na pala hathu cüki tsüdi zakeya wi ma chükivvü wa, kepaghenanye anyi pahan na Johan Baptizwa na hangneng-shaghadha le khiben.

⁸Kepathu na Elijah na ghodha, nu kepathu na kheni atusenjüh-kechüthu kesü na hangneng-shaghadha le khiben.

⁹Herod na khi, “Hi Johan li wieya; isala hi hathu zaya keben ha anyi thowa sabenla ben nu?” Isanu ma Jisu metuya le sa wa.

¹⁰Apostelthu na gho neng nu mathu kekuli cüki tsüdi khi pi Jisu kiza. Ma mathu ssiya nu mathu gweghe anyuti kesü Bethsaida wi wa.

¹¹Anyitenti na tsü zaya nu ma nie wa. Ma mathu ssiya nu Anyiza Kadiyyi cüki khi pi mathu kiza, nu kesakinaa sa pi mehai ncüthu yishü kebenthu sa pi mehai cü.

¹²Aghani na du keten pang wi sansikeyathu Taghakeni na ma wi gho nu khi, “Anyithu kesun pi bvü thsü nu mathu yala wa ha kevü anyu nu allithu wi mathu kedsakejjü nu kejenpen bhaya thsülo, kepaghenanye he wi ha thola nkemi pen kesü.”

¹³Isala Jisu na mathu wi kiza, “Nthu pala pahan pi mathu dsa thsülo.” Mathu na luneng, “Ikhang na amesa be manga nu anga ben keni ketan ben le. No ikhang ya wala anyi hathu maben ghena pala pahan sheiya thsü mvuben kwe?”

¹⁴(Ciwi anyi na hazar manga-u na ben.) Jisu na ma sansikeyathu wi kiza, “Anyithu sa pi denini khang sala donki thsülo.”

¹⁵Sansikeyathu na pi tsüti kesa thsü seng wi

¹⁶Jisu na amesa manga nu anga keni tsü khuya nu tang wi ghang nu Anyiza wi keseng kekhie sachi, nu tsüthu pakhhiya, nu pi sansikeyathu cü nu pi anyithu wi gishüya thsü.

¹⁷Mathu tsüdila dsa pi anonkwenya, nu sansikeyathu na kedsatu ashijü taghakeni saghuya.

¹⁸Ghanan kesü Jisu na ma ketan kekhie saben nan sansikeyathu na ma wi gho, nu ma mathu wi keü, “Anyithu na hi pi thowa le khiten nu?”

¹⁹Mathu luneng, “Pahan na no Johan Baptizwa le khiden. Kepathu na no Elijah le khi, nu pahan na no kheni atusenjüh-kechüthu kesü na hangneng-shaghadha le khiden.

²⁰ Ma mathu wi keü, “Isathu nthu tsü hi pi thowa le khiten nu?” Pitor na khineng, “No Anyiza Tsawa Messiya.”

²¹Jisu na mathu ajüh ha pi thola nkiza lalo kesa mathu kiza ntsa sachi,

²²nu hati la khineng, “Anyi Tsawa na ketizen sa ntsa sa, nu keshenpfüthu, keqhaikedi ntsathu, nu Ayenkesansithu na ma meya mvula saben. Ma pi shü thsüaben, isala ghanan kecheng seng wi ma hangneng-shagha ben.”

²³ Ma mathu tsüdi wi kiza, “Anyi thowa na hi nie gha mvu khe ma ketanla ma mali nu atsathangla ma kross pienu hi nie n-ghathu yishü.

²⁴ Kepaghenanye anyi thowa na ma kahangli hangshaya mvu khe dediaben, isala thowa na ighena ma kahangli khuchi khe tsü mu nengya shaben.

²⁵Keujüla anyi kesü na ayyi keben maben pi ma ji saya lela ma pvüwa bhatagha nyelela dedi lethu mangwa kekiyi ben nu? Mangla nmi!

²⁶Keujüla anyi kesü na ighena nu hi kesansijüh ghena nyu tujüghe lethu, Anyi Tsawa na ma nyankethang nu Abawa nu tangnyilo kemethathu nyankethang sa kegho wi anyi tsüwa cüki khi jügheaben.

²⁷Hi atsentsa nthu kizaden, anyi he wi kebenthu pahan na Anyiza Kadiyyi npi kemu chu shü nben.”

²⁸ Jisu na hathu ha khi nu ghanan tazen seng wi ma Pitor, Johan nu James ssisen ayikha kesü wi kekhie sale wa.

²⁹Ma kekhie sa keben wi ma tsikepa sa nu ma thsümeni na cwencwe mikithi sa.

³⁰Ciwi meshu keni na wan gho ma ccüneng ben. Tsüna Mosa nu Elijah manyi,

³¹tang kewegü wina ghola Jisu na ma Jerusalem wi wan Anyiza kekuli sacen nu bvüa keten cüki khi pi ma ccüneng.

³²Pitor nu ma pvüshangthu na jenben, isala mathu na shagha nan Jisu kewegü nu meshu keni na ma gweghe ngan keben muya.

³³Mosa nu Elijah manyi na Jisu teshi nu kebvü seng wi Pitor na Jisu wi kiza, “Kesansiwa, ikhang na he wi keben ha khatila mehai nu! Ikhang na anithsüjjen kecheng sa na; kesü nghena, kesü Mosa ghena, nu kesü Elijah ghena.” (Ma ajjügi mangwa khiben khe nchüla khi.)

³⁴Ma ajühkhitu keben wi akulukeshü na ghola mathu kejiya; sansikeyathu na akulukeshü na mathu miwi gho kesalina messi wa.

³⁵ Akulukeshü wi ahhai kesü na khi, “Hawa ha itsa, hi ma kessiyadha — ma jühkinalo!”

³⁶Ahhai nzala kesa seng wi Jisu na ma ketan benla. Sansikeyathu na ccen ben wa nu tsü tsüwi mathu na mu keyathu cüki mangla pi thola nkizala.

³⁷Dhitsüwa wi Jisu nu sansikeyathu kecheng na ayikha wina cü nu anyitenti kesü na gho Jisu metu.

³⁸Anyitenti jawi anyi kesü na magha nu jisha, “Kesansiwa, hi no wi khieben, itsa ma ketanwa ha ghangchi cülo!

³⁹Nkemehai ghamu kesü na ma ghantenyathu ma pashü pi ayyi wi khulidu kedheggü nu ma meceng n-nugha saben waden; isanu ma metenmesha ntsa sacüla ma bvü thsüden.

⁴⁰Hi no sansikeyathu na tsü jügü pi bvü thsülo mathu wi khie lela mathu na sa meyale.”

⁴¹Jisu na luneng, “Nthu khatila nkenondi nu kesazzi nyithu nu! Hi matsü khathu nthu gweghe nbenthu yishü nu? Hi khathu nthu gweghe ben nu?” Tsaseng wi ma anyi tsüwa wi khi, “Ntsawa tsü ssinu he wi gholo.”

⁴²Isanu pvüzanyiwa tsüna gho keten wi atsaghang na ma whengshi pi ayyi wi chi nu ma kedheggü wa. Jisu na ajüh kekhang khi pi nkemehai ghamu satekü, nu pvüzanyiwa sa pi mehai cü nu pi ma ba cü neng.

⁴³Anyi tsüdila Anyiza kekhang ghena amansa. Anyi tsüdila ma kekuli tsü ghena amansa keben wi Jisu na ma sansikeyathu wi kiza,

⁴⁴“Hi mangwa pi nthu kizale ben khe ha nmali lalo! Anyi Tsawa tsü ghan pi anyithu kekhang kekhu wi chia tendha.”

⁴⁵Isala sansikeyathu na ha jjügi nchüla. Tsü pi mathu tuwi kuthi kesalina mathu na tsü jjügi chüshi meyala, nu mathu na ma wi tsü jjügi keü messi.

⁴⁶ Sansikeyathu jawi thowa na kedi ntsawa saten nu kesa ajüh keccücanli shagha.

⁴⁷Jisu na mathu kemeshen tsü chüya kesalina ma ghanyi kesü pi ma kete wi ngan thsü,

⁴⁸ nu mathu wi khi, “Thowa na inyan wina ghanyi ha ssiya khe hi la ssiyaden; nu thowa na hi ssiya khe hi kesun kechiwa la ssiyaden. Kepaghenanye nthu tsüdi jawi kizza ntsawa tsüna kedi ntsawa saben.

⁴⁹Johan na khi, “Kesansiwa, ikhang anyi kesü n-nyan wina atsaghangthu jügüshi keben mule, nu ikhang na ma khenle, kepaghenanye ma ithu gweghe nten.”

⁵⁰Jisu na ma nu sansikeya kepathu wi kiza, “Ma nkhen lalo, kepaghenanye thowa na nthu shun nten khe tsüna nthu ghena le.”

⁵¹Jisu zanki pi tang wi chiya keten pang wi ma Jerusalem wi wale meshen nu waden.

⁵²Ma nyilothu kesun pi ma tuwi na wala Samaria nyu kesü wi ma ghena kidenya thsüa.

⁵³Isala ciwi anyithu na Jisu ssi meya mvu, kepaghenanye ma Jerusalem wi waden.

⁵⁴ Sansikeya Johan nu James manyi na ha mukeya wi manyi na khi, “Apvüwa, no ishinyi yala tang wi anni khie chi nu dugho[1] mathu yasa thsü mvu benla nu?”

⁵⁵Jisu na khapeghe wa manyi kha.[2]

⁵⁶Tsaseng wi Jisu nu ma sansikeyathu na anyu kepa wi wa.

⁵⁷Mathu na alen wi wa keten wi anyi kesü na Jisu wi khi, “No khiewa waten khe hi no nie gha tenle.”

⁵⁸Jisu na ma wi khi, “Whewhethu na mathu ku ben, nu awathu la mathu ghacen ben, isala Anyi Tsawa tsü ma li pi keli nu mnankeya ben la nmi.”

⁵⁹Ma anyi kepawa wi kiza, “Hi nie ghalo.” Isala anyi tsüwa na khi, “Kesansiwa, hi yala atuwa wala iba pi chhüvhüya thsülo.”

⁶⁰Jisu na luneng, “Keshüthu ya mathu ketanla mathu chhüvhüya thsülo. No wala Anyiza Kadiyyi jüh pi nyu kizalo.”

⁶¹ Anyi kepawa na khi, “Kesansiwa, hi no nie ghaten; isala hi ya atuwa wala kemehai sabenlo itheghi kizaya thsülo.”

⁶²Jisu na ma wi khi, “Anyi kesü le kesü lela alli ca wa kesa seng wi asengwa ghang ben lethu ma Anyiza Kadiyyi nyi nsa qole.”