Read Northern Rengma Naga AYENZHÜNENG 1 Bible Online

AYENZHÜNENG 1 - Northern Rengma Naga bible

AYENZHÜNENG 1

¹Lesüshen hawi ajühthu hana Israel nyithu na Jordan Ghaku nishuwa aghansha wi keben wi Mosa na khipi mathu kekiza. Mathu na Jordan yyiketijü wi Suf kete pahanwa na anyuti Paran nu kepawa na anyutithu Tofel, Laban, Hazeroth, nu Dizahad jüwi tsü ben.

²(Tsüna Edom diyyiwa yyishiphon len wiwa na Sinai Yikha na wa Kadesh Barnea kecu ghanan taghakhen yaden.)

³Mathu na Ejipt teshi nu jügha mapiwa asha taghakhenwa ghanan atuwa wi Mosa na Apvüwa na pi ma kiza nu pi mathu kizalo kesa tsüdi khipi anyithu kiza.

⁴ Hawa ha Apvüwa na Amor nyi Sihon Kadimiwa Heshbon nyuti wi kekhang sen kebenwa, nu Bashan wi Og Kadimiwa Ashtaroth nu Edrei nyuti wi kekhang sen kebenwa miwi khangkeya seng wi sa.

⁵Tsüna anyithu na Jordan nishuwa Moab yyiwi keben wi Mosa na Anyiza yenthu khimetha nu kesansi ha sashhu.

⁶Ma khi, “Ithu na Sinai Yikha wi keben wi Apvüwa ithu Nyiza na ithu kizala, ‘Nthu na ayikha hewi sie mtsü bendha.

⁷Kemnanpenwa tsü pheghe nu apen ketsen walo. Amor nyi yyishiphon diyyiwa nu tsü kevü yegu tsüdi wi walo — Jordan yyiketijü, yyiketijü nu yyishiphon diyyiwa, acülawa yegu, nu Mediterranean tssükaten kecu. Kanaan yyi nu Lebanon Yikhathu tsü thenkeghe sen nu Eufrat Ghaku ketiwa kecu wi walo.

⁸Ayyi hathu ha tsüdi hi Apvüwa na pi nthu bamyithu Abraham, Isak, nu Jakob, nu mathu tsangathu cüle khishiketheng tsüle. Wa ciwi benyalo.’ ”

⁹Mosa na anyithu wi khi, “Ithu na Sinai Yikha wi keben wi hi nthu kiza, ‘Hi nthu ssile kesa hana ighena akhhi kiyan mtsüle. Hi ketan ha saya nben.

¹⁰Apvüwa nthu Nyiza na nthu sapi atssan wi ghotsithu ti ji thsüdha.

¹¹Apvüwa nthu bamyithu Nyiza yala ma khishi ketheng ti nthu sapi hazar tughu ji kayi neng nu ben kayi keyawa saya thsülo!

¹²Isala khati nu hi ketan akhhi kekiyan ha pvü nu nthu kicenalithu tsü südheya nu?

¹³Amizza kesüsü wi anyi kemetsa, chüshikeya, nu sakenan nyi pahan kessiyalo, nu hi mathu pi nthu ccülithu sa thsüden.’

¹⁴Nthu na ha ithu ghena kemehai kesüle khi.

¹⁵Tsalina hi nthu na nthu mizza wi kemetsa nu sakenan nyi ccülikesathu kessikechi tsü ssiya nu mathu pi nthu ccülithu sathsüa. Mathu pi pahan na anyi hazar kesü ghena, pahan na meza kesü ghena, pahan na deni ghena, nu pahan na tagha ghena tsüti akhhi pvü thsüa. Hi amizza tsüdi wi kedi kepathu la kessichi.

¹⁶“Hi tsü tsüwi mathu kecükegwechi, ‘Nthu nyithu jawi kicennali keshhugho tsü kinachi. Kecennali tsüna nthu nyithu jawi ketanla, asangthu nthu jawi hang kebenthu la saghuben khe ghang kemehai sayalo.

¹⁷Nthu na ajüh kesüdhe witsü nankepapa nsala; ma thowa khe mehhishala tsüdi tuwi makesü sala ajühkaghaten cülo. Nthu na Anyiza wina kegho ghena ajüh kesüdhe tsüghena thola nmessila. Keujüla ajjügi kesü na nthu ghena dhu mtsü lethu sen nu hiwi gholo, hi tsü südhe cüaben.’

¹⁸Tsüti hi pala tsüdi wila nthu ghena nsathu keyishü kecükegwe pi nthu cüdha.

¹⁹“Apvüwa ithu Nyiza na ithu kekiza ti ithu na tsü sale. Ithu na Sinai Yikha teshi nu Amor nyi yyishiphon diyyiwa wi kewa len yyikeshü keti nu kemessi tsü pvüdhi wa. Ithu na wa Kadesh Barnea cukeya wi,

²⁰hi nthu kiza, ‘Nthu na khili ghala Amor nyi yyishiphon diyyiwa, Apvüwa ithu Nyiza, ithu bamyithu Nyiza na pi ithu cü keben tsü cuyadha. Kawi katsü ghang chilo. Ma kekhi ti wa tsü nkayalo. Nkisütula nyelela nmessi lalo.’

²²Isala nthu na hi wi gho nu khi, ‘Ithu na wahhaithu kesun pi ayyi ciwi chi nu mathu ya alen kemehai ntsawa nu anyunutithu tsü khati kesa khe pi ithu kiza thsüle kesalina.’ ”

²³“Tsüti sathu mehai kesalina hi amizza kesü wi meshu kesüsü sala anyi taghakeni kessiya.

²⁴Mathu na yyishiphon diyyiwa wi Eshkol yyiketijü kecu wa nu tsü hhainan.

²⁵Mathu na ciwi mukeya kedsau pahan pvü gho ithu cü, nu Apvüwa ithu Nyiza na pi ithu cü keben ayyi tsüna mehai ntsawale kesa ithu kiza.

²⁶ “Isala nthu na Apvüwa nthu Nyiza yenkhukechi tsü matang nu shun, nu nthu na ayyi ciwi ndu mvula.

²⁷Nthu na khokho wi nbvümugho nu khi, ‘Apvüwa na ithu nanmeghü ben. Ma Ejipt wina ithu ssi shhugho Amor nyi hathu kwen wi chi nu mathu ya ithu pathi thsüale kesalina.

²⁸Mangsale ithu ciwi wa nu? Ithu na messiben. Ithu anyi kesun kechithu na ciwi anyithu na ithu miwi züki nu sieki, nu mathu na anyunuti khweti sapi atssan la cukeben non wi hangbenle ithu kiza. Mathu na ciwi kücanyithu la muyale!’

²⁹“Isala hi nthu kizadha, ‘Anyi tsüthu tsü nmessila.

³⁰Apvüwa nthu Nyiza na nthu ssiden, nu nthu na mukeya ma Ejipt wi nthu ghena kesa ti ma nthu ghena nyu ssikesali ben,

³¹ tsüna ayyikeshü wi. Aba kesü na ma tsa kenoncca ti ma khatila alenca chuli nthu noncca sen shhugho apen ha cucüdha khe nthu na muyadha.’

³² Isala hi mangwa khi khe tsümi nthu na khilila Apvüwa n-nondi,

³³ma keshüthangla nthu tuwi wa nthu ghena kemnanpen bha cü, alen khipi nthu kiza, ma aghaja lethu anni cü nu aghanan lethu akulukeshü cü wina nthu tuwi wa lela.

³⁴“Apvüwa na nthu leben nkaghajüh kekhi tsü zaya nu ma lebentsu, tsalina ma kishen:

³⁵‘Nthu abvüye nkemehai hawi anyi kesütanla hi ayyi kemehai pi nthu bamyithu cüle khishi ketheng witsü dukeya nmi.

³⁶Jefune tsa Kaleb ketan ciwi duyaben. Ma hi wi jühtsentsa sa, nu hi ma ayyi hhainan kesa tsüpi ma nu ma shicübvüghathu cüden.’

³⁷Nthu ghena Apvüwa na imiwi la ma lebentsu nu khi, ‘Mosa, no lela ayyi ciwi duya nben.

³⁸Isala no kekiqawa Nun tsa Joshua tsü satezü cülo. Ma Israel ssi wala ayyi tsü nkaya thsüden.’

³⁹“Tsaseng wi Apvüwa na ithu tsüdi wi kiza, ‘Nthu tsangathu, khili kemehai keteshi npi chükeyathu na ayyi ciwi duyaben — ghanyithu nthu na nthu ghinyithu na ghanya benle kekhithu tsü. Hi ayyi tsüpi mathu cüden, nu mathu na wa ciwi benyaden.

⁴⁰Isala nthu tsü kheneng kevüli sen Aqaba yyitssüvü kewa len yyikeshü witsü wa neng shaden.’

⁴¹“Nthu na khineng, ‘Mosa, ithu na Apvüwa tuwi samidha. Isala khili Apvüwa na ithu kekiza ti ithu na nyu ssisaden.’ Tsaseng wi nthu tsüdi nyu ssisale kidenya, nthu na yyishiphon diyyiwa tsü lekete nkaya benle meshenla sa.

⁴²“Isala Apvüwa na hi kiza, ‘Mathu na nyu nssisa lalo kitsan chilo, kepaghenanye hi mathu ssi ntendha, nu mathu ghinyithu na mathu miwi khangya ben.’

⁴³Apvüwa na mangwa khi khe hi pi nthu kizale, isala nthu na tsü nkinala. Nthu na ma matang, nu nthu kekapvü wina lentsen sen nu yyishiphon diyyiwa wi wa.

⁴⁴Amor nyi yyishiphon ciwi hang kebenthu na anikhothu ti nthu ssisale shhugho. Mathu na Horma kecu nthu jügüchi nu ciwi Edom yyishiphon diyyiwa wi nthu miwi khangya.

⁴⁵Tsalina nthu na Apvüwa wi kekiqa khie, isala ma nthu hhai nkinala nyelela nthu n-nanchila.

⁴⁶“Tsalina ithu na Kadesh wi matsü kesie keben seng wi,”