Read Northern Rengma Naga AYENZHÜNENG 11 Bible Online

AYENZHÜNENG 11 - Northern Rengma Naga bible

AYENZHÜNENG 11

¹“Apvüwa nthu Nyiza tsü tizen nu keshüthangla ma yenthu tsüdila nie tenlo.

²Nthu nansü nthu kahang wi Apvüwa cüki chükeya ha meshenyalo. Tsüwa tsüna nthu na sakenan khe nthu tsangathu na nyele. Nthu na Apvüwa kedi, ma kekhang, ma kezü,

³ nu ma amankesa kekuli muyadha. Nthu na ma Ejipt kadimiwa nu ma diyyiwa tsüdi miwi mangwa sachi khe tsü la muyadha.

⁴Ma khati nu Ejipt süpahizi na goru nu gorugarithu ssinu nthu jügü kagha wi tsüthu pi Kenmie Tssükedone wi meyanthi thsü khe nthu na tsü muyadha.

⁵Nthu na gho hewi npi kecu wi Apvüwa na ayyikeshü wi nthu ghena mangwa sachi khe muyadha.

⁶ Ma Reuben mizza wi Eliab tsathu Dathan nu Abiram manyi miwi mangwa sachi khe tsü meshen neng chilo. Anyi tsüdi tuwi na ayyi na qankhhi nu manyi pi manyi theghithu, manyi nithsüjjen, manyi maghathu, nu manyi sahangthu tsüdi gweghe mejia.

⁷Apvüwa na pala kedi hathu sakechi tsüdila nthu na muyadhale.

⁸“Hi nansü pi nthu kekiza ha tsüdila nieyalo. Isalethu nthu na aghaku pvüdhi wa nthu na duyale kebenwa ayyi tsü yaya mehai.

⁹Apvüwa na ayyi kemehai nu kinyan pi nthu bamyithu nu mathu shicübvüghathu cüle khishiketheng witsü nthu na matsü kesiela hangya mehai.

¹⁰Nthu na wala yaya keten yyiwa tsüna kheni nthu kahangpen Ejipt yyi tsüti nyele. Ciwi nthu na allica lethu, nthu na agüccüla atssü hhipi alli wi chi;

¹¹isala ayyi nthu na wale kebenwa yyi tsüna ayikha, nu yyiketijü, atsankegho tssüna ten benden.

¹²Apvüwa nthu Nyiza na ayyi ha noncca nu amapi chuli tsü hieben.

¹³“Tsalina hi nansü ayenkhukechi pi nthu cü keben ha nieyalo; nthu leben tsüdi pi Apvüwa nthu Nyiza cü nu ma kekuli salo.

¹⁴Nthu na tsüti sa lethu, ma matsü wina vvüthimeyi nu leghe wi atsankegho kesunchi cüben, isanu nthu na asu, kisengtssü, nu oliv deli,

¹⁵nu nthu sahang ghena aghangthu benya thsüben. Nthu na nsenthu keyishü kedsakejjü tsüdila benyaben.

¹⁶Apvüwa wina nthu ssideja sen wa acenpvü kepa wi kinyi nu kekuli nsa thsüle kesalina kiden-kesha yalo.

¹⁷Nthu na tsüti sa lethu Apvüwa na nthu miwi aghepvü ben. Ma atsan ya ngho thsüla nu nthu yyi na keqha pi yangdsaketenthu mangla shigü meya thsüla shaben. Isalethu tsüna ayyi kemehai ma pi nthu cüben lela nthu na ciwi wan shüaben.

¹⁸ “Ayenkhukechi hathu ha meshen nu ghali tenlo. Meshenyale kesalina tsüthu pi nthu hahcü wi bhenki nu pi nthu tie wi zhüki pvülo.

¹⁹Tsüthu pi nthu tsangathu sansilo. Nthu na ajjen wi donki kebenle alentsenten lela, nthu na mnan kebenle kuli keben wi lela tsüthu cüki khibenlo.

²⁰Tsüthu pi ajenka donbvüthu nu ajjen kaghapeng jenkathu wi zhükiyalo.

²¹Isalethu nthu nu nthu tsangathu na Apvüwa nthu Nyiza na pi nthu bamyithu cüle khishiketheng yyiwi tsü matsü kesiela hangya ben. Atssan na ayyi miwi keben chu nthu na ciwi hangyaben.

²²“Hi nthu kekiza tsüdila nie kaketsü sayalo; Apvüwa nthu Nyiza tsü tizen, ma kekhi tsüdila sa, nu ma wi jühtsentsa salo.

²³Isalethu nthu na atujügüwathu ma mizzatenti hathu tsüdi jügüshi, nu nthu na nthu miwi ketiki nu kekhangki mizzatentithu yyi tsü yayaben.

²⁴ Nthu na nnikeben ayyi tsüdi nthu ji saben. Nthu yyi na acülawa ayyikeshü na wala aghawa Lebanon Yikha kecu, nu nishuwa Eufrat Ghaku na wala niduwa Mediterranean Tssükedone kecu saben.

²⁵Nthu na khathansha ayyi ciwi waya khe Apvüwa nthu Nyiza na khishiketheng ti anyithu sapi nthu messi thsüaben, nu thola nthu khenya nben.

²⁶“Hi nansü kesawegü nu kishen-keshi kessi kepapa saya kemehai pi nthu tuwi chi keben ha kessi yalo—

²⁷keujüla nthu na Apvüwa nthu Nyiza yenkhukechi tsü nie lethu, hi nansü pi nthu cü kebenwa ha kesawegü;

²⁸isala keujüla nthu na ayenkhukechi hathu n-niela khapeghe sen nthu na kheni kinyi nketen acenpvü kepa wi kinyi wa lethu, tsüna kishen-keshi saben.

²⁹ Apvüwa na khathansha wi nthu ssinu nthu na yaya keten yyiwi tsü ghoya khe nthu na Gerizin Yikha wi kesawegü nu Ebal Yikha wi kishen-keshi pi thangchilo.

³⁰(Ayikha ha keni hana Jordan Ghaku na niduwa Kanaan nyithu na Jordan yyiketijü wi hang keten yyiwi tsü ben. Tsüthu tsüna niduwa, Gilgal nyuti kete wi Moreh ji achanton kemethawa tsüna kesie wi nye.)

³¹Nthu na Jordan Ghaku pvüdhi wa Apvüwa nthu Nyiza na pi nthu cü keben ayyiwa tsü yaya tendha. Nthu na tsü yaya nu ciwi benya lethu,

³²hi nansü pi nthu cü keben ayenthu ha tsüdi nieya metsilo.”