Read Northern Rengma Naga AYENZHÜNENG 12 Bible Online

AYENZHÜNENG 12 - Northern Rengma Naga bible

AYENZHÜNENG 12

¹“Ayen hathu ha nthu na Apvüwa nthu bamyithu Nyiza na ayyi pi nthu cü keben wi hang keben chu nieben. Tsüthu kina chilo!

²Nthu na wala ayyi nkaya keten witsü anyithu na ayikha kemisi, yyishiphon, nu achanton cakhu wi mathu cenpvü kekinyipen tsü tsüdila yasalo.

³ Mathu kekinyipenthu pasha nu mathu lonkemetha kisheng tsü pacha-paghe cülo. Mathu na khiela apen ciwi kekinyi nsa neng thsüle kesalina mathu cenpvü nzawa Asherah zensu tsikezhüthu tsü whengshi pi mecanglo.

⁴“Anyi hathu na mathu cenpvü kekinyi tsüti Apvüwa nthu Nyiza nkinyila.

⁵Nthu mizza tsüdi yyiwi Apvüwa na apen kesü kessi pi anyithu ma tuwi gho ma kinyi thsüben.

⁶Ciwi na ahhanshathu pi mecang ketenthu tsü nu nthu hhansha kepathu gishü tagha wi kesü nu nthu kekinyi, Apvüwa wi khishiketheng nthu ju, nthu kenen wina kekinyi, nu nthu mesüsi nu khaghaneni zza tssütsethu pi kekinyi saben.

⁷Ciwi Apvüwa nthu Nyiza na sawegü pi nthu kecüwa tuwi nthu nu nthu theghithu na nthu kekuli ghena pala kemehai dsa nu anonkwen yaben.

⁸“Tsü tsüna gho lethu nthu na kheni sa kegho ti sayishü. Nansü kecu nthu na nthu kenen wi kinyi ghoben,

⁹kepaghenanye nthu na wala cca hangya keten pen Apvüwa nthu Nyiza na ayyi pi nthu cü keben witsü npi duya.

¹⁰Nthu na Jordan Ghaku pvüdhi waya lethu, Apvüwa na nthu ya ayyi tsü yaya nu ciwi hangya thsüaben. Ma nthu ya ciwi nthu ghinyithu tuwi yazishu nu cca hangya thsüaben.

¹¹Apvüwa na ma kinyilo kesa apen kesütan kessi yaben, nu ciwi hi mangwa sen gholo khie khe nthu na tsüdi sen nu ma wi ghoben: tsüna nthu na ahhanshathu pi mecang ketenthu tsü nu nthu hhansha kepathu, gishü tagha wi kesü, nu nthu kekinyi, nu Apvüwa wi khishiketheng nthu ju kemehai.

¹²Ciwi nthu tsangathu, nthu maghathu, nthu nyuti wi hang keten Levi nyithu gweghe Apvüwa tuwi anonghelo; Levi nyithu na mathu ji ayyi nmile kesa meshenyalo.

¹³Nthu ketanla ahhansha kesa pen kessi nu ciwi nkinyila.

¹⁴Apvüwa na nthu mizza kesü yyiwi kessikeya pen wi ketan nthu na kekinyi nsathu yishü. Ciwi ketan nthu na ahhansha pi mecang ketenthu nu hi nthu kekiza kepathu tsüdi salo.

¹⁵“Isala nthu na kahang pen kahe wi lela nthu kemeshen sala nthu sahangthu pathi dsaya mehai. Apvüwa na khaju pi nthu cü khe nthu na tsü dsaya mehai. Nthu tsüdila keccüna wi metha le nmetha lela nthu na ameshü nyelela amejü sa kedsa ti tsüthu dsaya mehai.

¹⁶ Isala nthu na tsüthu jjü ndsala; nthu na tsüpi ayyiwi atssü ti keji thsü nsathu yishü.

¹⁷Nthu na khiewa hang khe apen ciwi nthu na kekinyi sapi Apvüwa kecü tsse tsü ndsala; tsüti nthu na asu gishü tagha wi kesü, kisengtssü, oliv deli, nyelela nthu mesüsi nu khaghaneni zza tssütsethu, nthu na Apvüwa wi khishiketheng ju, nthu kenen wi kekinyi, nyelela kekinyi kepathu tsse kesüla ndsala.

¹⁸Nthu nu nthu tsangathu, nthu maghathu nu nthu nyuti wi hang keben Levi nyithu gweghe nu Apvüwa nthu Nyiza na ma kinyilo kesa apen kesü kessikeya witsü Apvüwa nthu Nyiza tuwi ketan kekinyi tsse tsü dsaben. Nthu na ciwi nthu kuliketheng tsüdi miwi anongheben.

¹⁹Nthu na nthu yyiwi hang keben chu Levi nyithu tsüla nmalila metsilo.

²⁰“Khathansha wi Apvüwa nthu Nyiza na ma khishiketheng ti nthu yyi sapi tisie kayi cü khe nthu na khathansha wi asa dsa mvu khe dsayaben.

²¹Keujüla kekinyipen kesü tsüna alen kesie wi lethu, nthu na kusi asa dsa mvu khe Apvüwa na pi nthu kecü amesüsi nu khaghaneni kesü le kesü lela pathi nu hi nthu kekiza jjen wi tsü dsaya mehai.

²²Anyi kesü le kesü lela keccüna wi methale nmetha lela ma ameshü nyelela amejü sa kedsa ti tsü dsaya mehai.

²³Ajjü na asa wi keben tsü ndsala. Kepaghenanye kahangli na ajjü wi ben, tsalina nthu na kahangli pi asa gweghe dsa yishü.

²⁴Ajjü pi atsse ti nsala, isala tsüpi ayyiwi atssü ti keji thsülo.

²⁵Keujüla nthu na ma yenkhukechi tsü nie lethu Apvüwa na ma nenben, nu pala tsüdi wi nthu nu nthu shicübvüghathu ghena mehaiben.

²⁶Nthu na Apvüwa wi khishiketheng nthu kekinyi nu ajuthu tsü khusen nu kekinyipen kesü witsü walo.

²⁷Ciwi ahhanshathu sapi Apvüwa kekinyipen wi mecangtha sa keten kekinyi salo. Ahhanshathu sa nu nthu na asa dsa nu ajjü pi kekinyipen kekighü kekinyi tsü la sachi.

²⁸Hi nthu kekiza tsüdila saya lethu pala tsüdi wi anuphanla nthu nu nthu shicübvüghathu ghena mehaiyaben, kepaghenanye nthu na kemeshonwa nu Apvüwa nthu Nyiza kenenwa tsü saben.

²⁹“Nthu na mizzatentithu yyi nka wathu Apvüwa nthu Nyiza na mathu yasa cüben, nu nthu na tsü yaya nu ciwi ben waben.

³⁰Apvüwa na mizzatenti hathu keyasa seng wi nthu na mathu keccüna kekuli tsü n-niela metsilo, kepaghenanye tsüna keshü saben. Mathu na khati nu mathu cenpvü kinyi khe nthu la tsü makesü sa kinyile kesalina tsü chüyale nsala.

³¹Mathu na mathu cenpvüthu kekinyi yen tsüti nthu Apvüwa nthu Nyiza kinyile nsala, kepaghenanye mathu na mathu cenpvüthu kekinyi wi pala nankiqanan kekuli Apvüwa na nanmeghü ketenthu tsüdi saden. Mathu na mathu tsangathu lela pi mathu kekinyipen anni wi ahhansha saden.”

³² Hi nthu kekiza tsüdila salo; ciwi gilli nyelela nkecen mangla nsala.