Read Northern Rengma Naga AYENZHÜNENG 14 Bible Online

AYENZHÜNENG 14 - Northern Rengma Naga bible

AYENZHÜNENG 14

¹“Nthu na Apvüwa nthu Nyiza nyithu. Tsalina nthu na nyu keshü wi anongü lethu, anyi kepathu na sa keten ti, nthu gwo handhi nyelela ali atu wiwa whi tsüti nsala.

² Nthu na Apvüwa nthu Nyiza ji; ma ayyiwi hang keben anyithu jawi nthu kessi pi ma nyithu sayadha.

³“Apvüwa na nmethale khishi kesathu tsü mangla ndsala.

⁴Nthu na asahang hathu ha dsaya mehai: amesüsi, khaghaneni, aneni,

⁵ameshü, amejü, adaqhe, nyelela aghang khaghaneni,

⁶asahang katsüha lela ma ccümezen gizighe nu ma tsse dekeshi pi dsa ketenthu sa lela.

⁷Isala asahang ma ccümezen n-gizighe nu ma tsse dekeshi pi dsa nketenthu kesüla ndsala. Nthu na sunsiesa, lishüsa nu amekhiethu tsü ndsala. Tsüthu tsüna nmetha; tsüthu na atsse dekeshi dsaden, isala ccümezen n-gizighe.

⁸Avü sa ndsala. Tsüthu tsüna nmetha, tsüthu na accümezen gizighe isala atsse dekeshi dsa nten. Asahang hathu ha ndsala nyelela tsüthu gwo la nkidhenla.

⁹“Nthu na anga ma gisha nu ma kü keben katsüha lela dsaya mehai,

¹⁰isala atssü wi hang keten sa katsüha lela ma gisha nu ma kü nkemi tsü ndsala; tsüthu tsüna nthu ghena nmethale.

¹¹“Nthu na awa kemethathu kesüle kesü lela dsaya mehai.

¹²Isala nthu na awa hathu ha ndsala: amumu, accüpvü, cencüggü, amuli; abipvü, kamang kemcüwa, aduwe; awaja kediwa; atssüwa, apang-kesiewa, accü kesiewa, aduku kepvüwa, awen wa; [4] ntsughu, nu ahola.

¹⁹Pala ghei ma gisha kepvü tsüdila nmetha; tsüthu ndsala.

²⁰Nthu na pala ghei kemetha katsüha lela dsaya mehai.

²¹ “Asahang katsüha lela ma ketanla keshü sa tsü ndsala. Asang nthu jawi hang kebenthu ya tsü dsa thsü, nyelela nthu na pi mathu wi jeüya mehai. Isala nthu na kemetha nyi, Apvüwa nthu Nyiza ji, nthu na ma nyithu. “Khaghaneni nyelela aneni zza nituketen tsü npathi dsala.

²² “Amapi kaghapengla nthu na alli wi mukeya tsüdi gishü tagha wi kesü tsü khushilo.

²³Isanu Apvüwa nthu Nyiza kekinyi ghena apen kesü kessi ketheng witsü wa; nu ciwi ma tuwi nthu ji gishü tagha wi kesü asu, kisengtssü, nu oliv deli, nu nthu mesüsi nu khaghaneni tssütsewa tsü dsaben. Ha salo isathu nthu na keshüthangla Apvüwa nthu Nyiza kekinyikü yen chüyaben.

²⁴Keujüla kekinyipen tsüna nthu jjen na alen kesie wi kesalina Apvüwa na sawegü pi nthu kecü wi mukeya gishü tagha wi kesü tsü pvü nu wa meya lethu, hati salo:

²⁵Nthu na mukeya tsüpi jeüya nu apisa tsü khusen nu kekinyipen kesü witsü wa.

²⁶Nu tsüpi nthu na mangwa samvu ben khe saya — amesü nu aneni sa, kisengtssü, kisengtssü kekhang — nu ciwi Apvüwa nthu Nyiza tuwi nthu nu nthu theghithu na tsü dsa nu anonghethi salo.

²⁷“Nthu nyunuti wi hang keben Levi nyithu tsü nmalila; mathu na keben-keyeng nmi.

²⁸Amapi kecheng cheng kaghapen nthu na yangdsaketen gishü tagha wi kesü tsüdi sengho nthu nyunutithu wi saghu thenglo.

²⁹Atsse hawa ha Levi nyithu ghena, mathu na keben-keyeng nkemi lina, nu asangthu, amaghathu, nu denyile nthu nyunuti wi hang ketenthu ghena. Mathu na gho mathu nsenthu keyishü tsüdi muyaben. Ha salo, isalethu, Apvüwa nthu Nyiza na nthu kekuli tsüdi wi sawegü cüben.”