Read Northern Rengma Naga AYENZHÜNENG 15 Bible Online

AYENZHÜNENG 15 - Northern Rengma Naga bible

AYENZHÜNENG 15

¹“Amapi tagü kecen kaghapen wi nyu nthu men pvü keben tsü teshi pi cüaben.

²Hatinu tsü saben: Anyi kesüle kesü lela apisa pi no Israel nyi nna thsü ketheng amenkepvü tsü teshi pi cülo; ma tsü khunengyale sayishü; Apvüwa na ma ketanla amenkepvü tsü teshi pi cüdhale khishidha.

³Nthu na asang kesü wi n-menkepvü tsü khunengya mehai, isala nthu ketanla nthu nyi wi amenkepvü tsü yaneng yishü.

⁴Apvüwa nthu Nyiza na ayyi pi nthu cü keben witsü sawegü pi nthu cüben. Nthu nyi kesüla ketha-u sa nben,

⁵keujüla nthu na ma jühkina nu hi nansü pi nthu kiza keben tsüdi nie kaketsü sa lethu.

⁶Apvüwa na ma khishiketheng ti sawegü pi nthu cüben. Nthu na apisa pi mizzatenti kejon nna thsüben, isala nthu na nyu wi mangla nna nben; nthu na mizzatenti kejon miwi kekhang senben, isala mizzatenti kesüla nthu miwi kekhang sen nben.

⁷ “Keujüla Apvüwa nthu Nyiza na anyutithu pi nthu cü keben wi no Israel nyi kesü na hhatu ben lethu, apvü-nmenela nu ma nkiqa mvu nsala.

⁸Tsüti kesawa nye, mohho ntsa nu ma nsenthu keyishü ju pi ma nna thsülo.

⁹Amenkepvü teshi pi cüaketen mapi tetsaki kesa ghena pala pi ma n-nna thsü mvu nsala. Kemeshen nkemehai hati ya nthu leben wi ndugho thsüla. Keujüla nthu pala pi ma n-nna thsü mvula, ma Apvüwa wi nthu shunla maghachi lethu, kesazzi tsüpi nthu miwi chiaben.

¹⁰Ma men nsala nu apvü-nmenela pi ma cülo, isathu Apvüwa na nthu kekuli tsüdi wi sawegü cüben.

¹¹ Ciwi Israel nyithu jawi keshüthangla pahan na hhatu nu ketha-u saben, tsalina hi nthu na mathu tuwi mohholo kizadha.

¹² “Keujüla no Israel nyithu nzale npvüza lela ma ketanlal ma pi nthu wi amagha sala jeüchi lethu, ma amapi tugho nthu kekuli kesa seng wi nthu na ma teshi chiaben. Amapi tagüwa na kegho wi nthu na ma teshi pi bvü thsü nsathu yishü.

¹³Nthu na ma keteshichi wi ma kwen kaghacang nbvü thsüla.

¹⁴Apvüwa na sawegü pi nthu kecü khaghaneni, kisengtssü, nu asu witsü mohho ntsa sapi ma cülo.

¹⁵Nthu na Ejipt wi nyu nssümagha sa nu Apvüwa nthu Nyiza na nthu lishachi kecü tsü meshenyalo; tsalina hi khili ayenkhukechi hapi nthu cüben.

¹⁶“Isala nthu nssümagha na nbvü mvu; ma nthu nu nthu theghi tizen nu gweghe anonkwen benlaya mehai.

¹⁷Isalethu ma ssi wa nthu jenka wi ma khuna wenbhilo; tsaseng wi ma kahang wi nthu nssümagha sa waben. Nza nssümagha lela tsü makesü saben.

¹⁸Khathansha wi nthu na nthu magha kesü teshichi khe nkisütula, kepaghenanye ma amagha na melliketen kutimen gishü pahan wina amapi tugho nthu kekuli sadha. Ha salo, isalethu, Apvüwa nthu Nyiza na nthu kekuli tsüdi wi sawegü cüben.”

¹⁹ “Apvüwa nthu Nyiza ghena nthu mesüsi nu khaghaneni zza asüponthu tssütse tsüdi khuthiya; kekuli kesa ghena amesüsi hathu kesüla nsenla, nu khaghaneni hathu kenyen kesüla nceela.

²⁰Amapi kaghapenla nthu nu nthu theghithu na kekinyipen kesü witsü Apvüwa tuwi na tsüthu dsaben.

²¹Isala keujüla asahang tsüna nyu ghojünkeya, accü nkemehai, anyon nmu, nyelela pahan wi nyu ghojünkeya ben lethu, nthu na tsüpi Apvüwa nthu Nyiza wi ahhansha nsala.

²²Nthu na ajjen wi asahang tsüthu dsaya mehai. Nthu tsüdi keccüna wi methale nmetha lela nthu na ameshü nyelela amejü sa kedsa ti tsüthu dsaya mehai.

²³ Isala nthu na tsüthu jjü ndsala; nthu na tsüpi ayyiwi atssü ti keji thsü nsathu yishü.”